ഉത്സവ സീസണില്‍ ഷോപ്പിംഗിനും യാത്രയ്ക്കും ദൈനംദിന ചെലവുകള്‍ക്കും റിവാര്‍ഡ് പോയിന്റുകള്‍ സഹായിക്കും. പക്ഷേ കാലാവധി തീരാറാകുമ്പോള്‍ 'ഇപ്പോള്‍ ഉപയോഗിച്ചില്ലെങ്കില്‍ നഷ്ടപ്പെടും' എന്ന സമ്മര്‍ദം ഉണ്ടാകാം. പോയിന്റ് തീര്‍ക്കാന്‍ ആവശ്യമില്ലാത്ത സാധനം വാങ്ങരുതെന്നാണ് സാമ്പത്തിക വിദഗ്ധര്‍ പറയുന്നത്. അനാവശ്യ ചെലവഴിക്കല്‍ തിരിച്ചടവ് മുടക്കിയാല്‍ ക്രെഡിറ്റ് പ്രൊഫൈലിനെ ബാധിക്കാം.
മിക്ക ഇന്ത്യന്‍ കാര്‍ഡുകളിലും പോയിന്റുകളുടെ കാലാവധി 12 മുതല്‍ 36 മാസം വരെയാണ്. ബാങ്കും കാര്‍ഡും അനുസരിച്ച് ഇത് മാറും. റിഡീം ചെയ്യുന്ന രീതിയനുസരിച്ച് മൂല്യം മാറും. ചില കാര്‍ഡുകളില്‍ ട്രാവല്‍ പോര്‍ട്ടല്‍ വഴി ഒരു പോയിന്റിന് ഏകദേശം 50 പൈസ കിട്ടുമ്പോള്‍ സ്റ്റേറ്റ്‌മെന്റ് ക്രെഡിറ്റിന് 20 പൈസ മാത്രമാണ്.
റിവാര്‍ഡ് പോയിന്റ് ശരിക്കും മൂല്യമുള്ളത് എല്ലാ മാസവും ബില്‍ മുഴുവനായി അടയ്ക്കുന്നവര്‍ക്ക് മാത്രമാണെന്നാണ് വിദഗ്ധര്‍ പറയുന്നത്.
എസ്ബിഐ കാര്‍ഡില്‍ 2026 ഏപ്രില്‍ മുതല്‍ സ്റ്റേറ്റ്‌മെന്റ് ക്രെഡിറ്റ് റിഡംപ്ഷന് പ്രതിമാസ പരിധി (60,000 പോയിന്റ്) വന്നു. കാര്‍ഡ് ഡിഫോള്‍ട്ടുകള്‍ കൂടിയതും ക്രെഡിറ്റ് കാര്‍ഡ് വായ്പകളുടെ റിസ്‌ക് വെയ്റ്റ് ആര്‍ബിഐ 150 ശതമാനമാക്കിയതുമാണ് ബാങ്കിനെ ഇതിന് പ്രേരിപ്പിക്കുന്നതെന്ന് വിലയിരുത്തലുണ്ട്. അതായത്, 'പിന്നീട് നോക്കാം' എന്ന് വച്ചാല്‍ നിയമം മാറി പോയിന്റ് മൂല്യം കുറയാനും സാധ്യതയുണ്ട്.
എക്‌സ്പയറി ഡേറ്റ് നോക്കുക: ബാങ്ക് ആപ്പിലെ 'Rewards വിഭാഗത്തില്‍ കാണാം; കലണ്ടറില്‍ റിമൈന്‍ഡര്‍ വയ്ക്കുക.
ഓപ്ഷനുകള്‍ താരതമ്യം ചെയ്യുക: വൗച്ചര്‍, ട്രാവല്‍, സ്റ്റേറ്റ്‌മെന്റ് ക്രെഡിറ്റ്, മര്‍ച്ചന്‍ഡൈസ് എന്നിവയില്‍ ഓരോ പോയിന്റിനും എത്ര രൂപ കിട്ടുമെന്ന് നോക്കുക.
നിബന്ധനകള്‍ വായിക്കുക: മിനിമം പോയിന്റ്, പ്രതിമാസ പരിധി, ഫീസ് എന്നിവ ഉറപ്പാക്കുക.
ആവശ്യമുള്ളത് മാത്രം വാങ്ങുക: പോയിന്റ് തീര്‍ക്കാന്‍ അധികം ചെലവാക്കേണ്ടി വരുമെങ്കില്‍, ബജറ്റില്‍ ഒതുങ്ങുന്നതും ശരിക്കും ആവശ്യമുള്ളതുമാണോ എന്ന് ചോദിക്കുക.
പോയിന്റ് പോകട്ടെ: കടം കൂട്ടുന്നതിനെക്കാള്‍ നല്ലത് ചെറിയ പോയിന്റുകള്‍ നഷ്ടപ്പെടുന്നതാണ്.
വ്യക്തിഗത ക്രെഡിറ്റ് കാര്‍ഡ് ഉപയോഗത്തില്‍ കിട്ടുന്ന റിവാര്‍ഡ് പോയിന്റുകള്‍ക്ക് മിക്കപ്പോഴും നികുതി ബാധകമല്ല. എങ്കിലും നിബന്ധനകള്‍ മാറാമെന്നതിനാല്‍ കാര്‍ഡ് ഇഷ്യൂവറുടെ ഏറ്റവും പുതിയ T&C പരിശോധിക്കുക.
Read DhanamOnline in English
Subscribe to Dhanam Magazine