ഇക്വിറ്റി മ്യൂച്വൽ ഫണ്ടുകളിൽ പ്രതിദിനം 100 രൂപ വീതം നിക്ഷേപിക്കുന്നതും പ്രതിമാസം 3,000 രൂപ വീതം നിക്ഷേപിക്കുന്നതും കാഴ്ചയിൽ സമാനമായി തോന്നാം. എന്നാൽ, 12 ശതമാനം വാർഷിക റിട്ടേൺ (CAGR) അടിസ്ഥാനമാക്കി കണക്കാക്കുമ്പോൾ, 5, 10, 15 വർഷത്തെ കാലയളവുകളിൽ ലഭിക്കുന്ന അന്തിമ തുകയിൽ (Corpus) ചില വ്യത്യാസങ്ങൾ കാണാനാകും.
5 വർഷത്തെ നിക്ഷേപം: പ്രതിദിന എസ്‌.ഐ.പി (SIP) വഴി ആകെ 1.82 ലക്ഷം രൂപ നിക്ഷേപിക്കുമ്പോൾ 12% റിട്ടേണിൽ അന്തിമ മൂല്യം 2.50 ലക്ഷം രൂപ ആയി മാറും. അതേസമയം, പ്രതിമാസ എസ്‌.ഐ.പിയിൽ ആകെ 1.80 ലക്ഷം രൂപ നിക്ഷേപിച്ച് 2.47 ലക്ഷം രൂപ ലഭിക്കും. ഇവിടുത്തെ വ്യത്യാസം ഏകദേശം 3,000 രൂപയാണ്.
10 വർഷത്തെ നിക്ഷേപം: പ്രതിദിന എസ്‌.ഐ.പിയിലെ ആകെ നിക്ഷേപം 3.65 ലക്ഷം രൂപയും അന്തിമ മൂല്യം 7.06 ലക്ഷം രൂപയുമാണ്. പ്രതിമാസ എസ്‌.ഐ.പിയിൽ ആകെ നിക്ഷേപം 3.60 ലക്ഷം രൂപയും അന്തിമ മൂല്യം 6.97 ലക്ഷം രൂപയുമാണ്. ഇവിടെ ദിവസേനയുള്ള എസ്‌.ഐ.പി 9,000 രൂപയുടെ അധിക നേട്ടം നൽകുന്നു.
15 വർഷത്തെ നിക്ഷേപം: പ്രതിദിന എസ്‌.ഐ.പി വഴി ആകെ 5.47 ലക്ഷം നിക്ഷേപിക്കുമ്പോൾ 15.36 ലക്ഷം രൂപയുടെ ഫണ്ട് ലഭിക്കുന്നു. പ്രതിമാസ എസ്‌.ഐ.പിയിൽ ആകെ 5.40 ലക്ഷം നിക്ഷേപിക്കുമ്പോൾ 15.14 ലക്ഷം രൂപയാണ് ലഭിക്കുക. 15 വർഷത്തിൽ ദിവസേനയുള്ള എസ്‌.ഐ.പി 22,000 രൂപയുടെ അധിക തുക നൽകുന്നു.
പ്രതിദിന എസ്‌.ഐ.പി കൂടുതൽ നേട്ടം നൽകുന്നതിന്റെ പ്രധാന കാരണം നിക്ഷേപത്തിന്റെ ഇടവേള മാത്രമല്ല, വർഷത്തിൽ നിക്ഷേപിക്കുന്ന ആകെ തുകയിലെ വ്യത്യാസമാണ്. പ്രതിദിനം 100 രൂപ വീതം 365 ദിവസം നിക്ഷേപിക്കുമ്പോൾ ഒരു വർഷം 36,500 രൂപ നിക്ഷേപിക്കപ്പെടുന്നു; എന്നാൽ പ്രതിമാസം 3,000 രൂപ വീതം നിക്ഷേപിക്കുമ്പോൾ പ്രതിവർഷം 36,000 രൂപ മാത്രമാണ് വരുന്നത് (വർഷത്തിൽ 500 രൂപയുടെ അധിക നിക്ഷേപം).
ദീർഘകാലയളവിൽ രണ്ട് രീതികളും ഏതാണ്ട് സമാനമായ സമ്പത്താണ് സൃഷ്ടിക്കുന്നത്. അതിനാൽ, ദിവസേനയുള്ളതാണോ മാസാന്തമുള്ളതാണോ എന്നത് നിക്ഷേപകന്റെ വരുമാന ലഭ്യത (Cash flow), സൗകര്യം, തുടർച്ചയായി നിക്ഷേപിക്കാനുള്ള കഴിവ് എന്നിവയെ ആശ്രയിച്ചിരിക്കണം. നിക്ഷേപത്തിന്റെ ഇടവേളയേക്കാൾ പ്രധാനം നിക്ഷേപ അച്ചടക്കവും ദീർഘകാലം വിപണിയിൽ തുടരുന്നതുമാണ്.
Read DhanamOnline in English
Subscribe to Dhanam Magazine