കടബാധ്യതകൾ നിങ്ങളെ തളർത്തുന്നുണ്ടോ? സാമ്പത്തിക ഞെരുക്കമില്ലാതെ വായ്പകൾ മാനേജ് ചെയ്യാൻ ഈ കാര്യങ്ങൾ ശ്രദ്ധിക്കൂ

വീട്ടുവായ്പ, വാഹന വായ്പ, ക്രെഡിറ്റ് കാർഡ് ഇഎംഐകൾ, അടിയന്തര ആവശ്യങ്ങൾക്കായി എടുത്ത പേഴ്സണൽ ലോൺ എന്നിങ്ങനെ ഒന്നിലധികം ബാധ്യതകൾ ഒരേസമയം കൈകാര്യം ചെയ്യുന്നത് പലരുടെയും സാമ്പത്തിക ജീവിതത്തിൽ സാധാരണമാണ്. ശരിയായ ഘടനയും അച്ചടക്കവും ഇല്ലെങ്കിൽ ഇത്തരം വായ്പകൾ നിങ്ങളുടെ സാമ്പത്തിക അടിത്തറയെ തകർക്കും. നിങ്ങളുടെ വായ്പകൾ നിയന്ത്രണത്തിലാക്കാൻ സഹായിക്കുന്ന പ്രധാന വഴികളാണ് ഇവിടെ പരിശോധിക്കുന്നത്.

മാര്‍ഗങ്ങള്‍

1. യഥാർത്ഥ ബാധ്യത കണക്കാക്കുക: ആദ്യഘട്ടമെന്ന നിലയിൽ, ഓരോ മാസവും ഇഎംഐകൾക്കായി കൃത്യം എത്ര തുക പോകുന്നുണ്ടെന്ന് കണക്കാക്കുക. ക്രെഡിറ്റ് കാർഡ് മിനിമം പേയ്‌മെന്റുകൾ ഉൾപ്പെടെ എല്ലാ തിരിച്ചടവുകളും ഇതിൽ ഉൾപ്പെടുത്തണം. നിങ്ങളുടെ ആകെ വരുമാനത്തിന്റെ 40 മുതൽ 50 ശതമാനത്തിൽ കൂടുതൽ ഇഎംഐകൾക്കായി പോകുന്നത് സാമ്പത്തിക സമ്മർദത്തിന് കാരണമാകും.

2. ഉയർന്ന പലിശയുള്ള വായ്പകൾക്ക് മുൻഗണന നൽകുക: എല്ലാ വായ്പകളും ഒരേപോലെയല്ല. ക്രെഡിറ്റ് കാർഡ് കുടിശ്ശിക, പേഴ്സണൽ ലോൺ എന്നിവയ്ക്കാണ് സാധാരണയായി ഉയർന്ന പലിശ ഈടാക്കുന്നത്. കൈവശം അധിക പണം വരുമ്പോൾ, കുറഞ്ഞ പലിശയുള്ള ഹോം ലോണിനേക്കാൾ മുൻപായി 30 ശതമാനത്തോളം പലിശയുള്ള ക്രെഡിറ്റ് കാർഡ് കടങ്ങൾ തീർക്കുന്നതാണ് ബുദ്ധി. ക്രെഡിറ്റ് കാർഡുകളിൽ 'മിനിമം ഡ്യൂ' (Minimum Due) മാത്രം അടയ്ക്കുന്നത് ഒഴിവാക്കുക; ഇത് പലിശ കുമിഞ്ഞുകൂടാൻ മാത്രമേ സഹായിക്കൂ.

3. വായ്പകളുടെ ഏകീകരണം (Consolidation): ഉയർന്ന പലിശയുള്ള പല ചെറിയ വായ്പകൾക്ക് പകരം കുറഞ്ഞ പലിശ നിരക്കുള്ള ഒരു വലിയ പേഴ്സണൽ ലോൺ എടുത്ത് പഴയവ തീർക്കുന്നത് വായ്പകൾ ട്രാക്ക് ചെയ്യുന്നത് എളുപ്പമാക്കും. എന്നാൽ ഇതിനുശേഷം പുതിയ വായ്പകൾ എടുക്കാതിരിക്കാൻ പ്രത്യേകം ശ്രദ്ധിക്കണം.

4. സുരക്ഷാ കവചം ഒരുക്കുക: വായ്പകൾക്കിടയിലും കുറഞ്ഞത് മൂന്ന് മാസത്തെ ചെലവിനുള്ള തുകയെങ്കിലും എമർജൻസി ഫണ്ടായി സൂക്ഷിക്കണം. ഇത് അപ്രതീക്ഷിതമായ മെഡിക്കൽ ആവശ്യങ്ങൾക്കോ മറ്റോ വീണ്ടും വായ്പയെടുക്കുന്നത് ഒഴിവാക്കാൻ സഹായിക്കും.

5. ക്രെഡിറ്റ് സ്കോർ സംരക്ഷിക്കുക: തിരിച്ചടവുകൾ മുടങ്ങുന്നത് ക്രെഡിറ്റ് സ്കോറിനെ ബാധിക്കും. അതിനാൽ ഓട്ടോ ഡെബിറ്റ് സൗകര്യം ഉപയോഗിക്കുകയും ബാങ്ക് അക്കൗണ്ടിൽ ഒരു ഇഎംഐ തുകയെങ്കിലും അധികമായി കരുതുകയും ചെയ്യുക. തിരിച്ചടവ് അസാധ്യമാകുന്ന സാഹചര്യത്തിൽ ബാങ്കുമായി നേരത്തെ സംസാരിച്ച് പുനഃക്രമീകരണത്തിനുള്ള (Restructuring) സാധ്യതകൾ തേടുക.

സാമ്പത്തിക സുസ്ഥിരത കൈവരുന്നത് വരെ പുതിയ ഗാഡ്‌ജെറ്റുകൾ വാങ്ങുന്നതോ ഇഎംഐയിൽ യാത്ര ചെയ്യുന്നതോ ആയ ജീവിതശൈലി മാറ്റങ്ങൾ ഒഴിവാക്കേണ്ടത് അത്യാവശ്യമാണ്. ശരിയായ അച്ചടക്കം പാലിച്ചാൽ വായ്പകൾ നിങ്ങളുടെ ജീവിതത്തെ തകിടം മറിക്കില്ല.

_{Effective strategies to manage multiple loans without financial stress – from EMI planning to credit score protection.}