ഓൺലൈൻ തട്ടിപ്പുകൾ വർധിക്കുന്ന സാഹചര്യത്തിൽ വ്യാജ സൈറ്റുകളെ തിരിച്ചറിയാൻ https:// തുടങ്ങിയ സുരക്ഷിത യുആർഎൽ, പാഡ്ലോക്ക് ഐക്കൺ, വ്യക്തമായ കോൺടാക്റ്റ് വിവരങ്ങൾ എന്നിവ പരിശോധിക്കണം. അമിത ക്ലിക്ക്ബെയ്റ്റ് പരസ്യങ്ങളും ‘വിശ്വസിക്കാൻ പറ്റാത്ത’ ഓഫറുകളും കണ്ടാൽ ജാഗ്രത പാലിച്ച് വ്യക്തിഗത, ബാങ്കിംഗ് വിവരങ്ങൾ നൽകുന്നത് ഒഴിവാക്കേണ്ടതാണ്.
1. യുആർഎൽ (URL) പരിശോധിക്കുക: വെബ്സൈറ്റ് വിലാസം ശ്രദ്ധാപൂർവം പരിശോധിക്കുക എന്നതാണ് ആദ്യ പടി. സുരക്ഷിതമായ വെബ്സൈറ്റുകൾ സാധാരണയായി "https://" ലാണ് ആരംഭിക്കുന്നത്, വെറും "http" എന്നല്ല. പ്രമുഖ ബ്രാൻഡുകളുടെയോ സർക്കാർ പോർട്ടലുകളുടെയോ പേരിൽ ചെറിയ അക്ഷര മാറ്റങ്ങൾ വരുത്തി തട്ടിപ്പുകാർ വ്യാജ സൈറ്റുകൾ നിർമ്മിക്കാറുണ്ട്, അതിനാൽ സ്പെല്ലിംഗ് കൃത്യമാണെന്ന് ഉറപ്പുവരുത്തുക.
2. പാഡ്ലോക്ക് (Padlock) ഐക്കൺ: ബ്രൗസറിൽ വെബ്സൈറ്റ് വിലാസത്തിന് സമീപം ഒരു പൂട്ടിന്റെ അടയാളം (Padlock icon) ഉണ്ടോ എന്ന് നോക്കുക. ഇത് വെബ്സൈറ്റുമായുള്ള ബന്ധം എൻക്രിപ്റ്റ് ചെയ്തതാണെന്ന് സൂചിപ്പിക്കുന്നു. ഈ അടയാളം ഇല്ലെങ്കിൽ പാസ്വേഡുകളോ ബാങ്കിംഗ് വിവരങ്ങളോ നൽകുന്നത് ഒഴിവാക്കണം.
3. പരസ്യങ്ങളും പോപ്പ്-അപ്പുകളും: അമിതമായ പരസ്യങ്ങളും അനാവശ്യമായ പോപ്പ്-അപ്പുകളും (Pop-ups) വ്യാജ സൈറ്റുകളുടെ ലക്ഷണമാണ്. വഴിതെറ്റിക്കുന്ന തരത്തിലുള്ള വാഗ്ദാനങ്ങൾ നൽകുന്ന ഇത്തരം 'ക്ലിക്ക്ബെയ്റ്റ്' വെബ്സൈറ്റുകൾ ഉടൻ തന്നെ ക്ലോസ് ചെയ്യേണ്ടതാണ്.
4. കോൺടാക്റ്റ് വിവരങ്ങൾ: വെബ്സൈറ്റിലെ 'About Us', 'Contact Us' പേജുകൾ പരിശോധിക്കുക. യഥാർത്ഥ വെബ്സൈറ്റുകളിൽ പ്രവർത്തനക്ഷമമായ ഫോൺ നമ്പർ, ഔദ്യോഗിക ഇമെയിൽ വിലാസം, കമ്പനിയുടെ രജിസ്റ്റർ ചെയ്ത അഡ്രസ് എന്നിവ ലഭ്യമായിരിക്കും. ഇത്തരം വിവരങ്ങളുടെ അഭാവം ഒരു മുന്നറിയിപ്പായി കണക്കാക്കാം.
5. അവിശ്വസനീയമായ ഓഫറുകൾ: സൗജന്യ ലാപ്ടോപ്പ് അല്ലെങ്കിൽ ഒറ്റ ക്ലിക്കിൽ സർക്കാർ ജോലി തുടങ്ങിയ വിശ്വസിക്കാൻ പ്രയാസമുള്ള വാഗ്ദാനങ്ങൾ നൽകുന്ന വെബ്സൈറ്റുകളെ വിശ്വസിക്കരുത്. ഇത്തരം ആകര്ഷകമായ പരസ്യങ്ങളിൽ വീഴാതിരിക്കാൻ ഉപയോക്താക്കൾ എപ്പോഴും ജാഗ്രത പാലിക്കണമെന്നും പിഐബി ഫാക്ട് ചെക്ക് ഓർമ്മിപ്പിക്കുന്നു.
Read DhanamOnline in English
Subscribe to Dhanam Magazine