ശരിയായ ലൈഫ് ഇൻഷുറൻസ് കമ്പനിയെ എങ്ങനെ തിരഞ്ഞെടുക്കാം? തീര്‍ച്ചയായും പരിഗണിക്കേണ്ട 6 ഘടകങ്ങൾ

ലൈഫ് ഇൻഷുറൻസ് പോളിസി തിരഞ്ഞെടുക്കുമ്പോൾ പലരും കുറഞ്ഞ പ്രീമിയം മാത്രം നോക്കി കമ്പനിയെ തിരഞ്ഞെടുക്കുന്ന പ്രവണതയുണ്ട്. എന്നാൽ സാമ്പത്തിക സ്ഥിരത, ക്ലെയിം കൈകാര്യം ചെയ്യാനുള്ള കാര്യക്ഷമത, ഉപഭോക്തൃ സംതൃപ്തി എന്നിവയെക്കുറിച്ച് സൂചന നൽകുന്ന ആറ് നിർണായക ഘടകങ്ങൾ അറിഞ്ഞിരിക്കേണ്ടത് അത്യാവശ്യമാണ്. ഈ ഘടകങ്ങൾ വിലയിരുത്തിക്കൊണ്ട് മാത്രമേ വിശ്വസനീയമായ ഒരു ഇൻഷുറൻസ് കമ്പനിയെ തിരഞ്ഞെടുക്കാൻ സാധിക്കൂ.

ക്ലെയിം സെറ്റിൽമെന്റ് അനുപാതം (CSR)

ഇൻഷുറൻസ് കമ്പനി ഒരു വർഷം എത്ര ക്ലെയിമുകൾ തീർപ്പാക്കി എന്നതിൻ്റെ ശതമാനമാണിത്. ക്ലെയിം സെറ്റിൽമെന്റ് അനുപാതം 95 ശതമാനത്തിൽ കൂടുതലുള്ള കമ്പനികളെ തിരഞ്ഞെടുക്കാൻ ശ്രമിക്കുക.

തീർപ്പാക്കിയ ക്ലെയിമുകളുടെ എണ്ണവും നൽകിയ തുകയും അനുസരിച്ച് ഈ അനുപാതം രണ്ട് തരത്തിൽ വിലയിരുത്തണം. തുക അടിസ്ഥാനമാക്കിയുള്ള അനുപാതം മൊത്തം ക്ലെയിം മൂല്യത്തിന്റെ എത്ര തുക യഥാർത്ഥത്തിൽ കമ്പനി നൽകുന്നുവെന്ന് കാണിക്കുന്നു, പ്രത്യേകിച്ച് ഉയർന്ന മൂല്യമുള്ളതോ സങ്കീർണ്ണമായതോ ആയ കേസുകളിൽ.

സോൾവൻസി അനുപാതം (Solvency Ratio)

കഠിനമായ സാമ്പത്തിക സാഹചര്യങ്ങളിൽ പോലും ക്ലെയിമുകൾ നൽകാൻ കമ്പനിക്ക് മതിയായ ഫണ്ടുകളുണ്ടോ എന്ന് ഈ അനുപാതം സൂചിപ്പിക്കുന്നു. ഇൻഷുറൻസ് റെഗുലേറ്ററി അതോറിറ്റി ഓഫ് ഇന്ത്യ (IRDAI) അനുശാസിക്കുന്ന മിനിമം സോൾവൻസി അനുപാതം 1.5 (അല്ലെങ്കിൽ 150%) ആണ്. ഈ പരിധിക്ക് മുകളിലുള്ള കമ്പനികൾക്ക് മികച്ച സാമ്പത്തിക സ്ഥിരതയുണ്ടെന്ന് ഉറപ്പിക്കാം.

പെർസിസ്റ്റൻസി അനുപാതം (Persistency Ratio)

പോളിസി ഉടമകളിൽ എത്രപേർ കൃത്യമായി പ്രീമിയം അടച്ച് തങ്ങളുടെ പോളിസി തുടരുന്നു എന്നതിനെയാണ് ഇത് പ്രതിഫലിക്കുന്നത്. ഉയർന്ന പെർസിസ്റ്റൻസി അനുപാതം, ഉപഭോക്താക്കൾക്ക് കമ്പനിയുടെ ഉൽപ്പന്നങ്ങളിലും സേവനങ്ങളിലും തൃപ്തിയുണ്ട് എന്നതിൻ്റെ സൂചനയാണ്.

പരാതി പരിഹാര അനുപാതം (Grievance Redressal Ratio)

കമ്പനിക്കെതിരെ എത്ര പരാതികൾ ലഭിക്കുന്നു, അതിൽ എത്രയെണ്ണം ഫലപ്രദമായി പരിഹരിക്കുന്നു എന്ന് ഈ അനുപാതം വെളിപ്പെടുത്തുന്നു. കുറഞ്ഞ പരാതികളും ഉയർന്ന പരിഹാര നിരക്കുമുള്ള കമ്പനികൾക്ക് മെച്ചപ്പെട്ട ഉപഭോക്തൃ സേവനമുണ്ടായിരിക്കും.

ചെലവ് അനുപാതം (Expense Ratio)

കമ്പനിയുടെ പ്രവർത്തനപരമായ ചെലവുകൾ (ശമ്പളം, മാർക്കറ്റിംഗ്, കമ്മീഷനുകൾ) പ്രീമിയം വരുമാനവുമായി താരതമ്യം ചെയ്യുന്നതാണിത്. കുറഞ്ഞ ചെലവ് അനുപാതം, കൂടുതൽ പണം ക്ലെയിം സെറ്റിൽമെന്റിനും പോളിസി ഉടമകൾക്കുമുള്ള ആനുകൂല്യങ്ങൾക്കുമായി മാറ്റിവെക്കാൻ കമ്പനിയെ സഹായിക്കും.

ഉപഭോക്തൃ അഭിപ്രായങ്ങൾ (Customer Feedback)

മുകളിൽ പറഞ്ഞ കണക്കുകൾക്കപ്പുറം, നിലവിലുള്ള ഉപഭോക്താക്കളുടെ അഭിപ്രായങ്ങളും പ്രതികരണങ്ങളും ശ്രദ്ധിക്കുന്നത് പ്രായോഗിക തലത്തിൽ കമ്പനിയുടെ സേവന നിലവാരം മനസ്സിലാക്കാൻ സഹായിക്കും.

ഈ ആറ് ഘടകങ്ങളും വിലയിരുത്തുന്നത് നിങ്ങൾക്ക് ഏറ്റവും അനുയോജ്യമായ പോളിസി ഉറപ്പാക്കാനായി ലൈഫ് ഇൻഷുറൻസ് കമ്പനിയെ തിരഞ്ഞെടുക്കാന്‍ സഹായിക്കും.

_{Six key factors to consider when choosing a reliable life insurance company beyond just premium costs.}