ആദായനികുതി റിട്ടേൺ (ITR) സമർപ്പിക്കുന്നത് പകുതി ജോലി മാത്രമാണ്. നിശ്ചിത സമയത്തിനുള്ളിൽ അത് വെരിഫൈ ചെയ്തില്ലെങ്കിൽ നിങ്ങൾ റിട്ടേൺ ഫയൽ ചെയ്തിട്ടില്ല എന്ന രീതിയിലാണ് ആദായനികുതി വകുപ്പ് കണക്കാക്കുക. ഇന്നാണ് (ജൂലൈ 31) ഐടിആർ സമർപ്പിക്കാനുള്ള അവസാന തീയതിയെങ്കിലും, റിട്ടേൺ വെരിഫൈ ചെയ്യുന്നതിനായി 30 ദിവസത്തെ സാവകാശം (Verification window) നികുതിദായകർക്ക് ലഭിക്കുന്നുണ്ട്.
ഒരാൾ ജൂലൈ 31-ന് ഐടിആർ ഫയൽ ചെയ്യുകയാണെങ്കിൽ, അപ്ലോഡ് ചെയ്ത് 30 ദിവസത്തിനുള്ളിൽ വെരിഫിക്കേഷൻ പൂർത്തിയാക്കിയാൽ റിട്ടേൺ ഫയൽ ചെയ്ത തീയതി ജൂലൈ 31 ആയി തന്നെ കണക്കാക്കും. അതായത്, ജൂലൈ 31-ന് റിട്ടേൺ സമർപ്പിച്ച ഒരാൾക്ക് ഓഗസ്റ്റ് മാസത്തിൽ വെരിഫിക്കേഷൻ പൂർത്തിയാക്കിയാലും അത് കൃത്യസമയത്ത് ഫയൽ ചെയ്ത റിട്ടേണായി പരിഗണിക്കും.
വെരിഫിക്കേഷൻ വൈകിയാൽ എന്ത് സംഭവിക്കും? ഐടിആർ സമർപ്പിച്ച് 30 ദിവസത്തിന് ശേഷമാണ് വെരിഫിക്കേഷൻ നടത്തുന്നതെങ്കിൽ, വെരിഫിക്കേഷൻ പൂർത്തിയാക്കിയ തീയതിയാകും റിട്ടേൺ ഫയൽ ചെയ്ത തീയതിയായി കണക്കാക്കുന്നത്. ഇത് നിങ്ങളുടെ റിട്ടേണിനെ 'വൈകിയ റിട്ടേൺ' (Belated return) ആക്കി മാറ്റുകയും ലേറ്റ് ഫീയും മറ്റ് പിഴകളും ഈടാക്കാൻ കാരണമാവുകയും ചെയ്യും. നിശ്ചിത സമയപരിധിക്കുള്ളിൽ (ഡിസംബർ 31) വെരിഫൈ ചെയ്തില്ലെങ്കിൽ റിട്ടേൺ അസാധുവാകാൻ സാധ്യതയുണ്ട്.
ആദായനികുതി പോർട്ടലിൽ ലോഗിൻ ചെയ്ത് 'e-file' മെനുവിൽ നിന്ന് 'Income Tax Returns' വഴി 'e-Verify Return' തിരഞ്ഞെടുത്ത് ഇത് ചെയ്യാം. താഴെ പറയുന്ന മാർഗങ്ങളിലൂടെ ഓൺലൈനായി വെരിഫിക്കേഷൻ പൂർത്തിയാക്കാം:
ആധാർ രജിസ്റ്റർ ചെയ്ത മൊബൈൽ നമ്പറിൽ ലഭിക്കുന്ന ഒടിപി (OTP).
നെറ്റ് ബാങ്കിംഗ്.
പ്രീ-വാലിഡേറ്റഡ് ബാങ്ക് അല്ലെങ്കിൽ ഡീമാറ്റ് അക്കൗണ്ട് വഴിയുള്ള ഇവിസി (EVC).
എടിഎം വഴി (ഓഫ്ലൈൻ രീതി).
റിട്ടേൺ സമർപ്പിച്ച ഉടൻ തന്നെ വെരിഫിക്കേഷൻ പൂർത്തിയാക്കുന്നതാണ് പിഴകൾ ഒഴിവാക്കാൻ എപ്പോഴും ഉചിതം. കൂടുതൽ വിവരങ്ങൾക്കായി നികുതിദായകര്ക്ക് ആദായനികുതി വകുപ്പിന്റെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
Read DhanamOnline in English
Subscribe to Dhanam Magazine