ഐടിആർ ഫയലിംഗ് സമയപരിധി വീണ്ടും ദീർഘിപ്പിക്കുമോ? നീട്ടാനുളള കാരണങ്ങള്‍ ഇവയാണ്

2025–2026 അസസ്‌മെന്റ് വർഷത്തിലെ ആദായനികുതി റിട്ടേണുകൾ (ITR) സമർപ്പിക്കുന്നതിനുള്ള അവസാന തീയതിയായ സെപ്റ്റംബർ 15-ലേക്ക് അടുക്കുമ്പോൾ, ഇ-ഫയലിംഗ് പ്ലാറ്റ്‌ഫോമിൽ നികുതിദായകര്‍ സാങ്കേതിക ബുദ്ധിമുട്ടുകൾ നേരിടുകയാണ്. ഐടി യൂട്ടിലിറ്റി ഫോമുകള്‍ പുറത്തിറങ്ങാന്‍ വൈകിയതിനാല്‍ ടാക്സ് പ്രൊഫഷണലുകളും പ്രതിസന്ധി നേരിടുകയാണ്. സ്ഥിരമായ പോർട്ടൽ പ്രശ്നങ്ങളും ഫോം 26AS നും വാർഷിക വിവര പ്രസ്താവനയ്ക്കും (AIS) ഇടയിലുള്ള പൊരുത്തക്കേടുകളും കാര്യങ്ങൾ കൂടുതൽ വഷളാക്കുന്നു.

ഓഡിറ്റ് ചെയ്യാത്ത കേസുകൾക്ക് ഐടിആർ സമർപ്പിക്കുന്നതിനുള്ള അവസാന തീയതിയായ സെപ്റ്റംബർ 15 ന് രണ്ടാഴ്ചയോളമാണ് ബാക്കിയുളളത്. അവസാന തീയതി നീട്ടുമോ എന്ന കാര്യത്തില്‍ അനിശ്ചിതത്വം നിലനിൽക്കുകയാണ്. ഫയലിംഗ് സിസ്റ്റത്തിലെ നിരന്തരമായ പ്രശ്നങ്ങളും ഫോം 26AS ഉം എ.ഐ.എസു തമ്മിലുള്ള പൊരുത്തക്കേടുകളും ചൂണ്ടിക്കാട്ടി നികുതി സ്ഥാപനങ്ങളും വിദഗ്ധരും ഇതിനകം ഐടി വകുപ്പിനോട് നടപടിയെടുക്കാൻ ആവശ്യപ്പെട്ടിട്ടുണ്ട്.

സമയപരിധി നീട്ടുന്നതിന് പ്രേരകമാകുന്ന ഘടകങ്ങൾ

ITR-5, ITR-6, ITR-7 എന്നിവയ്ക്കുള്ള ഫോമുകള്‍ ഓഗസ്റ്റിലാണ് പുറത്തിറങ്ങിയത്. ഐടിആര്‍ 2, ഐടിആര്‍ 3 ഫോമുകള്‍ ജൂലൈ 11 ന് പതിവിലും വളരെ വൈകിയാണ് പുറത്തിറങ്ങിയത്. ഇതിനെ തുടര്‍ന്ന് പ്രൊഫഷണലുകൾക്കും നികുതിദായകർക്കും ഫയലിംഗ് പൂർത്തിയാക്കാൻ പരിമിതമായ സമയമാണ് ലഭിച്ചത്.

ഫോം 26AS ഉം എ.ഐ.എസും തമ്മിലുള്ള പൊരുത്തക്കേടുകൾ നികുതി ക്രെഡിറ്റുകളെക്കുറിച്ചുള്ള തെറ്റിദ്ധാരണകളിലേക്ക് നയിച്ചു. ഡാറ്റ പൊരുത്തപ്പെടുത്തുന്നതിന് നികുതിദായകര്‍ക്ക് കൂടുതൽ പരിശ്രമം ആവശ്യമായി വന്നു.

ലോഗിൻ പ്രശ്നങ്ങൾ, വെബ്സൈറ്റിന്റെ മോശം പ്രതികരണം, ഡിജിറ്റൽ സിഗ്നേച്ചർ സർട്ടിഫിക്കറ്റുകളുടെ പ്രാമാണീകരണത്തിലെ കാലതാമസം, ഒടിപി മൂല്യനിർണയ പിശകുകൾ എന്നിവ നികുതിദായകർക്ക് അനുഭവപ്പെടുന്നുണ്ട്. ഇ-ഫയലിംഗ് പോർട്ടലിലെ കനത്ത ട്രാഫിക് കാരണം ഐടിആര്‍ സമര്‍പ്പിക്കുന്നത് മന്ദഗതിയിലാകുകയോ ലോഗിൻ പ്രശ്‌നങ്ങൾക്കോ ​​കാരണമാകുന്നു.

സമയപരിധി അടുക്കുന്തോറും സമയം കൂടുതൽ നീട്ടണമെന്ന നികുതിദായകരുടെ ആവശ്യം ശക്തമാകുകയാണ്. അതേസമയം സെൻട്രൽ ബോർഡ് ഓഫ് ഡയറക്ട് ടാക്സസ് ഔദ്യോഗികമായി സമയപരിധി നീട്ടുന്നത് സംബന്ധിച്ച പ്രഖ്യാപനം നടത്തിയിട്ടില്ല. സമയപരിധി നീട്ടണോ വേണ്ടയോ എന്ന് തീരുമാനിക്കേണ്ടത് സി.ബി.ഡി.ടി യാണ്.

നേരത്തെ ഫയല്‍ ചെയ്യുന്നത് ഉത്തമം

സമയപരിധിക്ക് അടുത്തായി ഐടിആര്‍ ഫയൽ ചെയ്യുന്നതില്‍ അപകടസാധ്യതകള്‍ ഉളളതായി നികുതി വിദഗ്ധര്‍ ഓര്‍മിപ്പിക്കുന്നു. ഉയർന്ന ട്രാഫിക് മൂലം ആദായനികുതി പോർട്ടലില്‍ കാലതാമസം ഉണ്ടാകാനോ പോര്‍ട്ടല്‍ നിശ്ചലമാകാനോ സാധ്യതയുണ്ട്. സ്ഥിരീകരണ ശ്രമങ്ങളിലെ പിഴവുകള്‍, വൈകിയ ആധാർ ഒടിപികൾ, പോർട്ടൽ അറ്റകുറ്റപ്പണികളിലെ തടസങ്ങൾ തുടങ്ങിയവ ഉൾപ്പെടുന്നതാണ് സാധാരണ സാങ്കേതിക പ്രശ്നങ്ങള്‍. നേരത്തെ ഐടിആര്‍ ഫയൽ ചെയ്യുന്നത് കൃത്യത ഉറപ്പാക്കുന്നുവെന്ന് മാത്രമല്ല നികുതിദായകന് മേലുളള സമ്മർദം കുറയ്ക്കുകയും ചെയ്യുന്നു.

_{ITR filing deadline may be extended as taxpayers face persistent e-filing portal glitches and mismatched data.}