ഒരു നിശ്ചിത ലക്ഷ്യം കൈവരിക്കാൻ വായ്പകൾ നിങ്ങളെ സഹായിക്കുമെങ്കിലും, അവ നിങ്ങളുടെ ഭാവി വരുമാനത്തിന്റെ ചെലവിടല് പരിധി മുൻകൂട്ടി നിശ്ചയിക്കുന്നു എന്ന കാര്യം മറക്കരുത്. ഇന്നത്തെ കാലത്ത് മൊബൈൽ ആപ്പുകളിലൂടെയും മറ്റും വായ്പകൾ വളരെ എളുപ്പത്തിൽ ലഭ്യമാണ്. കടം വാങ്ങുന്നതിന് മുൻപ് താഴെ പറയുന്ന ചോദ്യങ്ങൾ സ്വയം ചോദിക്കുന്നത് ഭാവിയിലെ സാമ്പത്തിക സമ്മർദ്ദം ഒഴിവാക്കാൻ സഹായിക്കും.
എന്തിനാണ് ഞാൻ വായ്പ എടുക്കുന്നത്? എന്നതാണ് ഏറ്റവും പ്രധാനപ്പെട്ട ചോദ്യം. വീട് നിർമ്മാണം, വിദ്യാഭ്യാസം എന്നിവയ്ക്കായി വായ്പ എടുക്കുന്നത് ദീർഘകാലാടിസ്ഥാനത്തിൽ മൂല്യവത്താണ്. എന്നാൽ ആഡംബര യാത്രകൾക്കോ വിലകൂടിയ ഫോണുകൾക്കോ വേണ്ടി കടം വാങ്ങുന്നത് ഒഴിവാക്കി, പകരം പണം സ്വരൂപിച്ച് വാങ്ങുന്നതാണ് ഉചിതം.
ഇഎംഐ (EMI) കൃത്യമായി അടയ്ക്കാൻ എനിക്ക് സാധിക്കുമോ? എന്നത് ശമ്പളം മാത്രം അടിസ്ഥാനമാക്കി തീരുമാനിക്കരുത്. വാടക, പലചരക്ക് സാധനങ്ങൾ, സ്കൂൾ ഫീസ്, ഇൻഷുറൻസ് പ്രീമിയം തുടങ്ങിയ സ്ഥിര ചെലവുകൾ കഴിഞ്ഞ് ബാക്കി തുക കൊണ്ട് ഇഎംഐ അടയ്ക്കാൻ സാധിക്കുമെന്ന് ഉറപ്പാക്കണം.
ശരിയായ വായ്പയാണോ ഞാൻ തിരഞ്ഞെടുക്കുന്നത്? എന്ന് പരിശോധിക്കുക. പെഴ്സണൽ ലോണുകൾ എളുപ്പത്തിൽ ലഭിക്കുമെങ്കിലും, വീട് വായ്പയോ എഫ്.ഡി.ക്ക് എതിരെയുള്ള വായ്പയോ (Loan against FD) ഇതിനേക്കാൾ പലിശ കുറഞ്ഞവയാകാം.
കുറഞ്ഞ ഇഎംഐ എന്നാൽ ലാഭകരമായ വായ്പ എന്നർത്ഥമില്ല: കാലാവധി കൂടുന്തോറും പലിശ ഭാരവും വർദ്ധിക്കും. കൂടാതെ പ്രോസസിംഗ് ഫീസ്, പിഴകൾ എന്നിവയും ശ്രദ്ധിക്കണം.
ഒടുവിലായി, നിലവിലുള്ള മറ്റ് ബാധ്യതകളെ ഇത് എങ്ങനെ ബാധിക്കുമെന്നും അപ്രതീക്ഷിതമായി വരുമാനത്തിൽ കുറവുണ്ടായാൽ തിരിച്ചടയ്ക്കാൻ സാധിക്കുമോ എന്നും ചിന്തിക്കണം. വായ്പകൾ എളുപ്പത്തിൽ ലഭ്യമാണ് എന്നതിനാലല്ല, മറിച്ച് അത് സാമ്പത്തികമായി അനിവാര്യമാണെങ്കിൽ മാത്രമേ കടം വാങ്ങാവൂ. ഒരു വായ്പാ കരാറിൽ ഒപ്പിടാൻ മിനിറ്റുകൾ മതിയെങ്കിലും അതിന്റെ ബാധ്യത വർഷങ്ങളോളം നീണ്ടുനിൽക്കുമെന്ന് ഓർക്കുക.
Read DhanamOnline in English
Subscribe to Dhanam Magazine