മാറുന്ന കാലത്ത് സുരക്ഷിതമായ വിരമിക്കൽ ജീവിതത്തിന് കൂടുതല്‍ സമ്പാദ്യം അനിവാര്യമാകുന്നത് എന്തുകൊണ്ട്?

മുൻകാലങ്ങളിൽ വിരമിക്കൽ ജീവിതം എന്നത് 10 മുതൽ 15 വർഷം വരെ നീണ്ടുനിൽക്കുന്ന ഒരു ഹ്രസ്വ കാലയളവായാണ് കണക്കാക്കപ്പെട്ടിരുന്നത്. എന്നാൽ ഇന്ന് സ്ഥിതി മാറി. മെച്ചപ്പെട്ട ജീവിതസാഹചര്യങ്ങൾ കാരണം മനുഷ്യന്റെ ആയുർദൈർഘ്യം വർദ്ധിച്ചിരിക്കുന്നു. 50 കളുടെ അവസാനത്തിലോ 60 കളുടെ തുടക്കത്തിലോ വിരമിക്കുന്ന ഒരാൾ 80 വയസിന് അപ്പുറം ജീവിക്കാനുള്ള സാധ്യത ഇന്ന് കൂടുതലാണ്. അതായത്, നിങ്ങളുടെ വിരമിക്കൽ കാലം 25 മുതൽ 30 വർഷം വരെ നീണ്ടുനിൽക്കാം. ഈ മാറ്റം നിങ്ങളുടെ സാമ്പത്തിക ആസൂത്രണത്തിൽ വരുത്തേണ്ട മാറ്റങ്ങളെക്കുറിച്ചാണ് ഇവിടെ പരിശോധിക്കുന്നത്.

പണം തീർന്നുപോകാനുള്ള സാധ്യത

വിരമിക്കൽ കാലയളവ് കുറച്ചു കാണുന്നതാണ് നിക്ഷേപകർ വരുത്തുന്ന ഏറ്റവും വലിയ പിഴവ്. ഇത് ആവശ്യത്തിന് പണം സമ്പാദിക്കാതിരിക്കാനോ അല്ലെങ്കിൽ ഉള്ള പണം അമിതമായി പിൻവലിക്കാനോ കാരണമാകുന്നു. 70 കളിലോ 80 കളിലോ എത്തുമ്പോൾ കൈവശമുള്ള പണം തീർന്നുപോയാൽ അത് തിരിച്ചുപിടിക്കുക എന്നത് അസാധ്യമാണ്. അതിനാൽ ദശാബ്ദങ്ങളോളം നീണ്ടുനിൽക്കുന്ന ചെലവുകളെ നേരിടാൻ നിങ്ങളുടെ സമ്പാദ്യം പര്യാപ്തമായിരിക്കണം.

പണപ്പെരുപ്പത്തിന്റെ ആഘാതം

വിരമിച്ചു കഴിഞ്ഞാൽ ചെലവുകൾ കുറയുമെന്ന് പലരും കരുതുന്നു, എന്നാൽ വിപണിയിലെ പണപ്പെരുപ്പം (Inflation) ഒരിക്കലും നിൽക്കുന്നില്ല. വരുമാനം നിൽക്കുമ്പോഴും സാധനങ്ങളുടെയും സേവനങ്ങളുടെയും വില വർദ്ധിച്ചുകൊണ്ടിരിക്കും. ഇരുപതോ മുപ്പതോ വർഷം നീണ്ടുനിൽക്കുന്ന ഒരു കാലയളവിൽ പണപ്പെരുപ്പം നിങ്ങളുടെ സമ്പാദ്യത്തിന്റെ മൂല്യം ഗണ്യമായി കുറയ്ക്കും. ഇന്ന് നിങ്ങൾക്ക് സുഖകരമെന്ന് തോന്നുന്ന തുക ഭാവിയിൽ ഒന്നിനും തികയാതെ വന്നേക്കാം.

ആരോഗ്യ സംരക്ഷണം: പ്രായം കൂടുന്തോറും ആരോഗ്യ സംരക്ഷണത്തിനായുള്ള ചെലവുകളും വർദ്ധിക്കുന്നു. ഇത് പലപ്പോഴും മുൻകൂട്ടി പ്രവചിക്കാൻ കഴിയില്ല. ഒരു വലിയ ശസ്ത്രക്രിയയോ ദീർഘകാല ചികിൽസയോ നിങ്ങളുടെ സാമ്പത്തിക അടിത്തറ തകർക്കാൻ സാധ്യതയുണ്ട്. അതുകൊണ്ട് ആവശ്യമായ ഹെൽത്ത് ഇൻഷുറൻസിനൊപ്പം ചികിത്സാ ആവശ്യങ്ങൾക്കായി ഒരു പ്രത്യേക ഫണ്ടും (Buffer) കരുതേണ്ടത് അനിവാര്യമാണ്.

നിക്ഷേപങ്ങളിലെ വളർച്ച: സുരക്ഷ കണക്കിലെടുത്ത് വിരമിച്ച ഉടനെ എല്ലാ പണവും റിസ്ക് കുറഞ്ഞ നിക്ഷേപങ്ങളിലേക്ക് മാറ്റുന്നത് ബുദ്ധിയല്ല. പണപ്പെരുപ്പത്തെ മറികടക്കാൻ നിങ്ങളുടെ പണം തുടർന്നും വളരേണ്ടതുണ്ട്. കൃത്യമായ വരുമാനം നൽകുന്ന നിക്ഷേപങ്ങൾക്കൊപ്പം പണത്തിന്റെ മൂല്യം വർദ്ധിപ്പിക്കുന്ന വളർച്ചാ സാധ്യതയുള്ള നിക്ഷേപങ്ങളും (Growth exposure) ചേർന്ന ഒരു സന്തുലിത രീതി പിന്തുടരണം.

ഫ്ലെക്സിബിലിറ്റി: 30 വർഷത്തെ ജീവിതത്തിനിടയിൽ നിങ്ങളുടെ ആവശ്യങ്ങൾ മാറിയേക്കാം. വിരമിക്കലിന്റെ ആദ്യ വർഷങ്ങളിൽ യാത്രകൾക്കും വിനോദങ്ങൾക്കും കൂടുതൽ പണം ചെലവാക്കിയേക്കാം, എന്നാൽ പിന്നീടുള്ള വർഷങ്ങളിൽ അത് ചികിത്സയ്ക്കായി വേണ്ടി വന്നേക്കാം. ഇത്തരം മാറ്റങ്ങളെ നേരിടാൻ നിങ്ങളുടെ സാമ്പത്തിക പ്ലാൻ കൂടുതല്‍ ഫ്ലെക്സിബിള്‍ ആയിരിക്കണം.

വിരമിക്കൽ ആസൂത്രണം വെറും കണക്കുകൂട്ടലല്ല, മറിച്ച് യാഥാർത്ഥ്യബോധത്തോടെയുള്ള തയാറെടുപ്പാണ്. സാമ്പത്തികമായി ഒരു സുരക്ഷാ കവചം (Buffer) ഒരുക്കുന്നത് നിങ്ങളുടെ വിശ്രമകാലം സമാധാനപരമാക്കും.