മ്യൂച്വൽ ഫണ്ട് നിക്ഷേപകർ പലപ്പോഴും രണ്ടക്ക വരുമാനം പ്രതീക്ഷിക്കാറുണ്ട്. എന്നാൽ അഞ്ച് വർഷത്തെ എസ്.ഐ.പി (SIP) വരുമാനം എട്ട് ശതമാനത്തിൽ താഴെയാകുമ്പോൾ നിക്ഷേപം നിർത്താൻ പലരും ആലോചിക്കാറുണ്ട്. ഇത്തരം സാഹചര്യങ്ങളിൽ നിക്ഷേപം തുടരുന്നത് ദീർഘകാലാടിസ്ഥാനത്തിൽ കൂടുതൽ ഗുണകരമാകുമെന്നാണ് ചരിത്രപരമായ കണക്കുകൾ സൂചിപ്പിക്കുന്നത്.
ആദ്യ അഞ്ച് വർഷങ്ങളിൽ 8 ശതമാനത്തില് അല്ലെങ്കിൽ അതിൽ താഴെ മാത്രം വരുമാനം നൽകിയ എസ്.ഐ.പികൾ അടുത്ത 10 വർഷത്തിനുള്ളിൽ ശരാശരി 18.3 ശതമാനം വരെ മികച്ച വളർച്ച രേഖപ്പെടുത്തിയിട്ടുള്ളതായി വൈറ്റ് ഓക്ക് ക്യാപിറ്റൽ മ്യൂച്വൽ ഫണ്ട് നടത്തിയ പഠനം വ്യക്തമാക്കുന്നു. ഇതിനു വിപരീതമായി, തുടക്കത്തിൽ 8 ശതമാനത്തിന് മുകളിൽ വരുമാനം നൽകിയ നിക്ഷേപങ്ങൾ പത്ത് വർഷത്തിനുള്ളിൽ ശരാശരി 14.7% ലാഭമാണ് നൽകിയത്.
എന്തുകൊണ്ട് നിക്ഷേപം തുടരണം? വിപണി മന്ദഗതിയിലായിരിക്കുമ്പോഴോ ഇടിയുമ്പോഴോ ആണ് 'രൂപ-കോസ്റ്റ് ആവറേജിംഗ്' (Rupee-cost averaging) എന്ന തത്വത്തിലൂടെ നിക്ഷേപകർക്ക് കൂടുതൽ യൂണിറ്റുകൾ കുറഞ്ഞ വിലയ്ക്ക് ലഭിക്കുന്നത്. വിപണി പിന്നീട് തിരിച്ചുകയറുമ്പോൾ ഈ യൂണിറ്റുകൾ വലിയ ലാഭത്തിന് കാരണമാകുന്നു. ഓഹരി വിപണിയിലെ ലാഭം എല്ലായ്പ്പോഴും നേർരേഖയിലായിരിക്കില്ല എന്നതിനാൽ അഞ്ച് വർഷം എന്നത് ഒരു നിക്ഷേപത്തെ പൂർണമായി വിലയിരുത്താൻ മതിയായ കാലയളവല്ല.
നിക്ഷേപം നിർത്തുന്നതിന് മുൻപ് ചില കാര്യങ്ങൾ പരിശോധിക്കേണ്ടതുണ്ട്:
നിങ്ങളുടെ ഫണ്ട് അതിന്റെ ബെഞ്ച്മാർക്കുമായും സമാന വിഭാഗത്തിലുള്ള മറ്റ് ഫണ്ടുകളുമായും താരതമ്യം ചെയ്യുമ്പോൾ സ്ഥിരമായി പിന്നിലാണോ എന്ന് നോക്കുക.
ഫണ്ട് മാനേജർ മാറുകയോ നിക്ഷേപ രീതിയിൽ വലിയ മാറ്റം വരികയോ ചെയ്തിട്ടുണ്ടോ എന്ന് പരിശോധിക്കണം.
നിക്ഷേപം പിൻവലിക്കുമ്പോൾ ഉണ്ടാകുന്ന നികുതി ബാധ്യത കൂടി കണക്കിലെടുക്കുക. 12 മാസത്തിന് ശേഷം പിൻവലിക്കുമ്പോൾ ലഭിക്കുന്ന ലാഭം 1.25 ലക്ഷത്തിന് മുകളിലാണെങ്കിൽ 12.5 ശതമാനം ദീർഘകാല മൂലധന നേട്ട നികുതി നൽകേണ്ടി വരും.
കേവലം ഒരു അഞ്ച് വർഷത്തെ കുറഞ്ഞ വരുമാനം കണ്ട് നിക്ഷേപം നിർത്താതെ, സാമ്പത്തിക ലക്ഷ്യവും കാലയളവും മുൻനിർത്തി ക്ഷമയോടെ തുടരുന്നതാണ് ബുദ്ധിപരമായ നിക്ഷേപ രീതി.
Read DhanamOnline in English
Subscribe to Dhanam Magazine