സാങ്കേതികവിദ്യയുടെ വികാസം, വിപുലമായ വിതരണ ശൃംഖല, വർദ്ധിച്ചുവരുന്ന സാമ്പത്തിക അവബോധം എന്നിവയുടെ കരുത്തിൽ ഇന്ത്യയിലെ ചെറുകിട നഗരങ്ങളിൽ (B30 നഗരങ്ങളിൽ) മ്യൂച്വൽ ഫണ്ട് നിക്ഷേപം അതിവേഗം വളരുകയാണ്. മുൻപ് മെട്രോ നഗരങ്ങളിൽ മാത്രം കേന്ദ്രീകരിച്ചിരുന്ന ഈ മേഖല ഇന്ന് സാധാരണക്കാരായ കുടുംബങ്ങളിലേക്ക് പടരുന്നു.
പ്രധാന 30 നഗരങ്ങൾക്ക് പുറത്തുള്ള നഗരങ്ങളിൽ നിന്നുള്ള മ്യൂച്വൽ ഫണ്ട് നിക്ഷേപം (AUM) 2021 മാർച്ചിലെ 5.2 ലക്ഷം കോടി രൂപയിൽ നിന്ന് 2026 മാർച്ചിൽ 13.9 ലക്ഷം കോടി രൂപയായി 2.5 മടങ്ങ് വർദ്ധിച്ചതായി ആംഫി-ക്രിസിൽ (AMFI-Crisil) കണക്കുകൾ വ്യക്തമാക്കുന്നു. വ്യക്തിഗത നിക്ഷേപകരുടെ ആകെ വിഹിതത്തിൽ ബി 75 നഗരങ്ങളുടെ വിഹിതം 5.8 ശതമാനത്തിൽ നിന്ന് 8.6 ശതമാനത്തിലേക്ക് കുതിച്ചുയർന്നു.
ഇന്ത്യയിലെ ഏറ്റവും വലിയ ആദ്യത്തെ 30 നഗരങ്ങൾക്ക് പുറത്തുള്ള ചെറിയ നഗരങ്ങളെയും ടൗണുകളെയും (Tier 2, Tier 3 നഗരങ്ങൾ) സൂചിപ്പിക്കാനാണ് ബി30 (Beyond Top 30) എന്ന പേര് ഉപയോഗിക്കുന്നത്. മുംബൈ, ഡൽഹി, ബെംഗളൂരു, കൊച്ചി തുടങ്ങിയ മ്യൂച്വൽ ഫണ്ട് നിക്ഷേപം ഏറ്റവും കൂടുതലുള്ള ഇന്ത്യയിലെ മുൻനിര മെട്രോ നഗരങ്ങളെയാണ് ടി30 (Top 30) എന്ന വിഭാഗത്തില് ഉള്പ്പെടുത്തിയിരിക്കുന്നത്.
സാങ്കേതികവിദ്യ: മൊബൈൽ ആപ്പുകൾ, കേന്ദ്രീകൃത കെ.വൈ.സി (KYC), യു.പി.ഐ (UPI) എന്നിവ നിക്ഷേപം എളുപ്പമാക്കി മാറ്റുകയും ഭൗതികമായ തടസങ്ങൾ ഇല്ലാതാക്കുകയും ചെയ്തു. പ്രാദേശിക ഭാഷകളിലുള്ള വിവര ലഭ്യതയും നിക്ഷേപകരെ ആകർഷിക്കുന്നു.
വിതരണക്കാരുടെ വർദ്ധനവ്: ബി30 നഗരങ്ങളിലെ മ്യൂച്വൽ ഫണ്ട് വിതരണക്കാരുടെ എണ്ണത്തിൽ 61 ശതമാനം വർദ്ധനവ് (61,018 പുതിയ വിതരണക്കാർ) രേഖപ്പെടുത്തി.
സെബിയുടെ പ്രോത്സാഹനം: ബി30 നഗരങ്ങളിൽ നിന്നും പുതിയ വനിതാ നിക്ഷേപകരെയും പങ്കാളികളാക്കുന്ന വിതരണക്കാർക്ക് സെബി (SEBI) പ്രത്യേക ആനുകൂല്യങ്ങൾ നൽകുന്നുണ്ട്.
സ്ത്രീകളുടെ പങ്കാളിത്തം: ചെറുകിട നഗരങ്ങളിലെ സ്ത്രീകളുടെ മ്യൂച്വൽ ഫണ്ട് നിക്ഷേപം മൂന്നിരട്ടിയായും എസ്.ഐ.പി (SIP) നിക്ഷേപം നാലിരട്ടിയായും വർദ്ധിച്ചു. ബി30 നഗരങ്ങളിലെ സ്ത്രീകളുടെ നിക്ഷേപം മൊത്തം സ്ത്രീകളുടെ നിക്ഷേപത്തിന്റെ 26 ശതമാനമായി ഉയർന്നു.
ഇന്ത്യയിലെ ആകെ മ്യൂച്വൽ ഫണ്ട് നിക്ഷേപകരുടെ എണ്ണം 2.3 കോടിയിൽ നിന്ന് 6.1 കോടിയായി ഉയർന്നതിൽ ചെറിയ നഗരങ്ങൾ വഹിച്ച പങ്ക് വളരെ വലുതാണ്.
Read DhanamOnline in English
Subscribe to Dhanam Magazine