വരുമാനത്തിലോ ശമ്പളത്തിലോ വർദ്ധനവുണ്ടാകുമ്പോൾ കൂടുതൽ തുക നിക്ഷേപിക്കാൻ സാധിക്കുന്നത് സന്തോഷകരമായ കാര്യമാണ്, എന്നാൽ അധികമായി ലഭിക്കുന്ന തുക നിക്ഷേപിക്കാൻ ഉടൻ തന്നെ മറ്റൊരു പുതിയ മ്യൂച്വൽ ഫണ്ട് സ്കീം തിരഞ്ഞെടുക്കണമെന്ന് നിർബന്ധമില്ല. നിലവിലുള്ള ഫണ്ടുകൾ സാമ്പത്തിക ലക്ഷ്യങ്ങൾക്കും റിസ്ക് പ്രൊഫൈലിനും അസറ്റ് അലോക്കേഷനും ഇപ്പോഴും അനുയോജ്യമാണെങ്കിൽ, അവയിലെ എസ്.ഐ.പി (SIP) തുക വർധിപ്പിക്കുന്നതും പരിഗണിക്കാവുന്ന ഒരു മാർഗമാണ്.
കൂടുതൽ മ്യൂച്വൽ ഫണ്ടുകളിൽ നിക്ഷേപിക്കുന്നത് കൊണ്ട് മാത്രം മികച്ച വൈവിധ്യവൽക്കരണം (Diversification) ഉണ്ടാകണമെന്നില്ല, മറിച്ച് ഒരേ തരത്തിലുള്ള ഓഹരികളുടെ ആവർത്തനത്തിന് (Portfolio Overlap) വഴിതെളിക്കുകയും പോർട്ട്ഫോളിയോ നിരീക്ഷിക്കുന്നത് പ്രയാസകരമാക്കുകയും ചെയ്തേക്കാം. നിലവിലെ ഫണ്ടുകളുടെ പ്രകടനം തൃപ്തികരമാണെങ്കിൽ അധിക തുക അവയിലേക്ക് തന്നെ തിരിച്ചുവിടുന്നതാണ് അനുയോജ്യം. കൂടാതെ ഫണ്ടുകളുടെ പ്രകടനം, റിസ്ക്, നിക്ഷേപ ലക്ഷ്യം തുടങ്ങിയവ കൂടി പരിഗണിക്കുക.
പോർട്ട്ഫോളിയോയിൽ നിലവിൽ ഇല്ലാത്ത ഏതെങ്കിലും അസറ്റ് ക്ലാസ്, മാർക്കറ്റ്-ക്യാപ് വിഭാഗം അല്ലെങ്കിൽ നിക്ഷേപ ശൈലി എന്നിവ ഉൾപ്പെടുത്താൻ ഒരു പുതിയ ഫണ്ടിന് സാധിക്കുമെങ്കിൽ മാത്രം പുതിയ സ്കീമുകൾ പരിഗണിക്കാം. അതുപോലെ, വരാനിരിക്കുന്ന സാമ്പത്തിക ലക്ഷ്യങ്ങൾക്കനുസരിച്ച് അസറ്റ് അലോക്കേഷനിൽ (Asset Allocation) മാറ്റം വരുത്തേണ്ടതുണ്ടെങ്കിലും പുതിയ ഫണ്ടുകൾ കണ്ടെത്താവുന്നതാണ്.
ആംഫി (AMFI) കണക്കുകൾ പ്രകാരം 2026 ഓഗസ്റ്റിൽ പ്രതിമാസ എസ്.ഐ.പി നിക്ഷേപം 32,297 കോടി രൂപയെന്ന റെക്കോർഡ് ഉയരത്തിലെത്തിയിരുന്നു. ജൂലൈയിലെ 31,961 കോടി രൂപയിൽ നിന്നുളള വർധനയാണിത്. അതിനാൽ, നിക്ഷേപ തുക വർദ്ധിപ്പിക്കുമ്പോൾ അന്ധമായി പുതിയ ഫണ്ടുകൾ തിരഞ്ഞെടുക്കാതെ നിലവിലെ പോർട്ട്ഫോളിയോ വിലയിരുത്തുകയാണ് ആദ്യം ചെയ്യേണ്ടത്.
(Disclaimer: Mutual fund investments market risks-ന് വിധേയമാണ്; scheme തിരഞ്ഞെടുപ്പ് വ്യക്തിയുടെ ലക്ഷ്യം, സമയപരിധി, risk capacity എന്നിവയെ ആശ്രയിച്ചിരിക്കും. ആവശ്യമെങ്കിൽ SEBI-registered investment adviserന്റെ സഹായം തേടാം.)
Read DhanamOnline in English
Subscribe to Dhanam Magazine