ജിഎസ്ടി റിട്ടേണ്‍ ഫയലിംഗ് വര്‍ഷത്തില്‍ ഒരിക്കലാക്കാന്‍ നീക്കം, ചെറുകിട വ്യാപാരികള്‍ക്ക് ആശ്വാസം പകരുമോ, എന്താണ് എആര്‍ക്യുപി?

രാജ്യത്തെ ചെറുകിട സംരംഭകരുടെ നികുതി ബാധ്യത ഗണ്യമായി കുറയ്ക്കുന്നതിന്റെ ഭാഗമായി നിര്‍ണായക ചുവടുവെപ്പുമായി ജിഎസ്ടി കൗണ്‍സില്‍. ഒക്ടോബര്‍ 8-ന് ചേര്‍ന്ന 57-ാമത് ജിഎസ്ടി കൗണ്‍സില്‍ യോഗമാണ് ചെറിയ ബിസിനസുകള്‍ക്കായി പുതിയ 'ആന്‍വല്‍ റിട്ടേണ്‍ ക്വാര്‍ട്ടര്‍ലി പേയ്‌മെന്റ്' (ARQP - Annual Return Quarterly Payment) സ്‌കീമിന് തത്വത്തില്‍ അംഗീകാരം നല്‍കിയത്. ഔദ്യോഗിക വിജ്ഞാപനങ്ങള്‍ വരുന്നതോടെ ലക്ഷക്കണക്കിന് ചെറുകിട വ്യാപാരികള്‍ക്ക് ഇതിന്റെ പ്രയോജനം ലഭിക്കും.

പ്രധാന സവിശേഷതകള്‍

നിലവിലുള്ള ആവര്‍ത്തിച്ചുള്ള റിട്ടേണ്‍ ഫയലിംഗ് നടപടികള്‍ ലളിതമാക്കുകയാണ് പുതിയ പദ്ധതിയുടെ പ്രധാന ലക്ഷ്യം. പതിവുള്ള സങ്കീര്‍ണ്ണമായ റിട്ടേണ്‍ ഫയലിംഗ് രീതികള്‍ക്ക് പകരം അര്‍ഹരായ ബിസിനസുകള്‍ക്ക് വര്‍ഷത്തില്‍ ഒരിക്കല്‍ മാത്രം റിട്ടേണ്‍ ഫയല്‍ ചെയ്യാനുള്ള അവസരം ലഭിക്കും. ഇത് അക്കൗണ്ടിംഗ് ജോലികളും ഭരണപരമായ നടപടികളും എളുപ്പമാക്കും.

റിട്ടേണ്‍ വാര്‍ഷികമാണെങ്കിലും നികുതി ബാധ്യത ക്വാര്‍ട്ടര്‍ അടിസ്ഥാനത്തില്‍ (മൂന്ന് മാസം കൂടുമ്പോള്‍) അടയ്ക്കുന്ന സംവിധാനമാണ് വിഭാവനം ചെയ്തിരിക്കുന്നത്. ഇത് ബിസിനസുകള്‍ക്ക് കൃത്യമായ ക്യാഷ് ഫ്‌ളോ പ്ലാനിംഗിന് സഹായിക്കും.

ആര്‍ക്കൊക്കെയാണ് അര്‍ഹത?

ഈ പുതിയ പദ്ധതി എല്ലാ ബിസിനസുകള്‍ക്കും ബാധകമല്ല. കൃത്യമായ ചില മാനദണ്ഡങ്ങള്‍ പാലിക്കുന്നവര്‍ക്കാണ് ഇതിന്റെ പ്രയോജനം ലഭിക്കുക.

* മുന്‍ സാമ്പത്തിക വര്‍ഷത്തില്‍ മൊത്തം വിറ്റുവരവ് 5 കോടി രൂപയില്‍ കവിയാത്ത ബിസിനസുകള്‍ക്ക്.

* രജിസ്റ്റര്‍ ചെയ്യാത്ത ഉപഭോക്താക്കള്‍ക്ക് മാത്രം നേരിട്ട് സാധനങ്ങള്‍ വില്‍ക്കുന്ന ബിസിനസുകള്‍ക്കായി (B2C supplies exclusively). ഉദാഹരണത്തിന്, ഇന്‍പുട്ട് ടാക്‌സ് ക്രെഡിറ്റ് (ITC) ക്ലെയിം ചെയ്യാത്തതും 1.75 കോടി രൂപ വിറ്റുവരവുള്ളതുമായ ഒരു ചെറിയ പലചരക്ക് കടയ്ക്ക് ഭാവിയില്‍ ഈ രീതിയിലൂടെ വലിയ തോതില്‍ കംപ്ലയന്‍സ് ഭാരം കുറയ്ക്കാന്‍ സാധിക്കും.

ചെറുകിട ബിസിനസുകള്‍ക്ക് ലഭിക്കുന്ന നേട്ടങ്ങള്‍

ആവര്‍ത്തിച്ചുള്ള ടാക്‌സ് ഫയലിംഗുകള്‍ ഒഴിവാകുന്നതിലൂടെ ഭരണപരമായ നടപടികള്‍ക്ക് ചെലവഴിക്കുന്ന സമയവും പ്രയത്‌നവും ലാഭിക്കാം. ക്വാര്‍ട്ടര്‍ അടിസ്ഥാനത്തിലുള്ള നികുതി അടയ്ക്കല്‍ രീതി സംരംഭകര്‍ക്ക് അവരുടെ സാമ്പത്തിക ബാധ്യതകള്‍ കൂടുതല്‍ ചിട്ടയോടെ കൈകാര്യം ചെയ്യാന്‍ സഹായിക്കും.

ടാക്‌സ് സംബന്ധമായ സങ്കീര്‍ണ്ണതകളില്‍ നിന്ന് മോചനം ലഭിക്കുന്നതോടെ ചെറുകിട സംരംഭകര്‍ക്ക് അവരുടെ ബിസിനസ് വിപുലീകരണത്തില്‍ കൂടുതല്‍ ശ്രദ്ധ കേന്ദ്രീകരിക്കാന്‍ സാധിക്കും.

ലക്ഷക്കണക്കിന് റീറ്റെയ്ല്‍ വ്യാപാരികള്‍ക്കും ചെറുകിട സ്ഥാപനങ്ങള്‍ക്കും വലിയ ആശ്വാസമാകുന്ന പ്രഖ്യാപനമാണിത്. എങ്കിലും, ജിഎസ്ടി കൗണ്‍സില്‍ ഇത് നിലവില്‍ തത്വത്തില്‍ മാത്രമാണ് അംഗീകരിച്ചിരിക്കുന്നത് എന്ന കാര്യം ശ്രദ്ധിക്കേണ്ടതാണ്. പദ്ധതി ഔദ്യോഗികമായി വിജ്ഞാപനം (Notification) ചെയ്യപ്പെടുകയും കൃത്യമായ നിയമങ്ങളും മാര്‍ഗ്ഗനിര്‍ദ്ദേശങ്ങളും പുറത്തുവരികയും ചെയ്തതിന് ശേഷമേ ഇത് പൂര്‍ണ്ണമായും പ്രവര്‍ത്തനക്ഷമമാകൂ. അതിനാല്‍ സംരംഭകര്‍ ഔദ്യോഗിക ഉത്തരവുകള്‍ വരുന്നതുവരെ കാത്തിരിക്കേണ്ടതുണ്ട്.

The 57th GST Council meeting has in-principle approved the Annual Return Quarterly Payment (ARQP) Scheme for small B2C businesses with up to ₹5 crore turnover.