എഐ സാങ്കേതികവിദ്യയുടെ സഹായത്തോടെ സൈബർ ആക്രമണങ്ങൾ വേഗത്തിൽ ആസൂത്രണം ചെയ്യപ്പെടുന്നു. സുരക്ഷാ വീഴ്ചകൾ കണ്ടെത്താനും ചൂഷണം ചെയ്യാനും ആവശ്യമായ സാങ്കേതിക വൈദഗ്ധ്യം എഐ കുറച്ചതോടെ, സൈബർ സുരക്ഷാ ഭീഷണികൾ വ്യാപകമാകുന്നു.
ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യ ഹാക്കിങ്ങിന്റെ സങ്കീർണത കുറയ്ക്കുകയും സൈബർ ആക്രമണശേഷി കൂടുതൽ പേരിലേക്ക് വ്യാപിപ്പിക്കുകയും ചെയ്യുന്നു. സോഫ്റ്റ്‌വെയറുകളിലെ സുരക്ഷാവീഴ്ചകൾ എളുപ്പത്തിൽ കണ്ടെത്താനും അവ ചൂഷണം ചെയ്യാനുള്ള മാർഗങ്ങൾ വികസിപ്പിക്കാനും എഐയ്ക്ക് കഴിയുന്നതോടെ സൈബർ കുറ്റകൃത്യങ്ങളുടെ സ്വഭാവത്തിലും വേഗത്തിലും നിർണായക മാറ്റമാണ് സംഭവിക്കുന്നത്. ഇതോടെ ഹാക്കിങ് അല്ലെങ്കിൽ സൈബർ ആക്രമണം നടത്താൻ സാങ്കേതികവിദ്യയിൽ പരിമിതമായ അറിവുള്ളവർക്കുപോലും സാധിക്കുമെന്നതാണ് വിഷയത്തിന്റെ ഗൗരവം വർധിപ്പിക്കുന്നത്.
സോഫ്റ്റ്‌‍‍വെയറിലെ സുരക്ഷാപിഴവ് പൊതുവായി വെളിപ്പെടുന്നതും അത് ഉപയോഗിച്ചുള്ള ആക്രമണം നടക്കുന്നതും തമ്മിലുള്ള ഇടവേള ചില സാഹചര്യങ്ങളിൽ മാസങ്ങളിൽനിന്ന് മണിക്കൂറുകളിലേക്ക് ചുരുങ്ങിയതായി, മൈക്രോസോഫ്റ്റിന്റെ കീഴിലുള്ള ആപ്ലിക്കേഷൻ കോഡുകളുടെ ഹോസ്റ്റിങ് സേവനമായ ഗിറ്റ്ഹബ്ബിന്റെ സുരക്ഷാ വിഭാഗം ചൂണ്ടിക്കാട്ടുന്നു. ചില സുരക്ഷാവീഴ്ചകൾ പൊതുജനങ്ങൾ അറിയുന്നതിനുമുമ്പുതന്നെ ആക്രമണങ്ങൾക്ക് വിധേയമാകുന്നുണ്ട്.
സുരക്ഷാവീഴ്ചകൾ കണ്ടെത്തുന്നതിനും അവ പ്രയോജനപ്പെടുത്തി സൈബർ ആക്രമണം ആസൂത്രണം ചെയ്യുന്നതിനും മുമ്പ് ആവശ്യമായിരുന്ന ആഴത്തിലുള്ള സാങ്കേതിക പരിജ്ഞാനം എഐയുടെ സഹായത്തോടെ ഭാഗികമായി മറികടക്കാനാകുന്നു. അതായത്, ഹാക്കിങ്ങിന്റെ സാങ്കേതിക വൈദഗ്ധ്യത്തിന്മേലുള്ള പ്രവേശനതടസ്സമാണ് എഐ ഗണ്യമായി കുറച്ചിരിക്കുന്നതെന്ന് സാരം.
കാലപ്പഴക്കംകൊണ്ട് അപകടസാധ്യത കുറഞ്ഞതായി കരുതിയ സുരക്ഷാവീഴ്ചകൾ പോലും ഇപ്പോൾ അതീവ ഭീഷണിയുയർത്തുന്നതായി മാറുന്നു. 2004-ലെ ഒരു സുരക്ഷാവീഴ്ചയ്ക്കുപോലും എഐ ഏജന്റിന്റെ സഹായത്തോടെ ഏതാനും ആഴ്ചകൾക്കുള്ളിൽ പുതിയ ചൂഷണരീതി വികസിപ്പിക്കാനായതായി ഗിറ്റ്ഹബ്ബ് ചൂണ്ടിക്കാട്ടുന്നു. സങ്കീർണമായ റിവേഴ്സ് എൻജിനീയറിങ്ങും എക്സ്പ്ലോയിറ്റ് വികസനവും ആവശ്യമായിരുന്ന ഇത്തരം പ്രവർത്തനങ്ങൾ കൂടുതൽ എളുപ്പമാകുന്നതിന്റെ സൂചനയാണിത്.
ഇതോടെ സൈബർ ആക്രമണശേഷി ഏതാനും വിദഗ്ധ സംഘങ്ങളിൽ ഒതുങ്ങുന്ന സാഹചര്യം മാറുന്നു. വാണിജ്യപരമായും ഓപ്പൺ സോഴ്‌സ് രൂപത്തിലും ലഭ്യമായ എഐ സംവിധാനങ്ങൾ ഉപയോഗിച്ച് കുറഞ്ഞ സാങ്കേതിക പരിജ്ഞാനമുള്ളവർക്കുപോലും സങ്കീർണമായ ആക്രമണങ്ങൾ ഇനി പരീക്ഷിക്കാനാകും.
എഐ സഹായത്തോടെ സോഫ്റ്റ്‌‍വെയർ വികസനം വേഗത്തിലാകുമ്പോൾ അതിനൊപ്പം സുരക്ഷാ പരിശോധനയുടെ ഭാരം കൂടുകയാണ്. പുതിയ കോഡിന്റെ അളവിനും സുരക്ഷാ സംഘങ്ങൾക്ക് പരിശോധിക്കാനാകുന്ന ശേഷിക്കും ഇടയിൽ വലിയ അന്തരം രൂപപ്പെടുന്നു. കഴിഞ്ഞ ആറുമാസത്തിനിടെ ഗിറ്റ്ഹബ്ബിന്റെ ഡിപെൻഡബോട്ട് (Dependabot) മുഖേന ഡെവലപ്പർമാർ സുരക്ഷാ പ്രശ്നങ്ങൾ പരിഹരിക്കുന്നതിന്റെ വേഗത അഞ്ചിരട്ടിയായി വർധിച്ചതായാണ് കമ്പനി വ്യക്തമാക്കുന്നത്. ആയിരക്കണക്കിന് പരിഹരിക്കപ്പെടാത്ത സുരക്ഷാവീഴ്ചകൾ കൈകാര്യം ചെയ്യുന്ന സ്ഥാപനങ്ങൾക്ക് ഓരോ മുന്നറിയിപ്പും മനുഷ്യവിഭവശേഷി ഉപയോഗിച്ച് പരിശോധിക്കുക പ്രായോഗികമല്ല. മുന്നറിയിപ്പുകളുടെ എണ്ണം മാത്രമല്ല, അവയിൽ യഥാർഥത്തിൽ ആക്രമണസാധ്യതയുള്ളവ ഏതൊക്കെയെന്നു തിരിച്ചറിയുന്നതും നിർണായകമാകുന്നു.
ഈ വെല്ലുവിളിക്ക് മറുപടിയായി സോഫ്റ്റ്‌‍വെയർ വികസനത്തിന്റെ ഓരോ ഘട്ടത്തിലും സുരക്ഷാ പരിശോധന ഉൾച്ചേർക്കുന്ന ഏജന്റിക് സുരക്ഷാ സംവിധാനമാണ് ഗിറ്റ്ഹബ്ബ് വികസിപ്പിക്കുന്നത്. നിയമാധിഷ്ഠിത പരമ്പരാഗത പരിശോധനയ്ക്കൊപ്പം എഐ വിശകലനവും പ്രയോജനപ്പെടുത്തുന്ന ഈ സംവിധാനം കോഡിലെ യുക്തിപരമായ പിഴവുകൾ, ആധികാരികതാ പരിശോധനയിലെ വീഴ്ചകൾ, അനധികൃത പ്രവേശനസാധ്യതകൾ എന്നിവ കണ്ടെത്താൻ ലക്ഷ്യമിടുന്നു.
ഏകദേശം ഏഴ് എഐ മോഡലുകളെ വിവിധ പരിശോധനാഘട്ടങ്ങളിൽ വിന്യസിക്കുന്ന സംവിധാനവും ഗിറ്റ്ഹബ്ബ് ഉപയോഗിക്കുന്നു. മൈക്രോസോഫ്റ്റിന്റെ മൾട്ടി-ഏജന്റ് സുരക്ഷാ സാങ്കേതികവിദ്യയുമായി സംയോജിപ്പിച്ച് ഒരു കോഡ് ശേഖരത്തിൽ നൂറുകണക്കിന് ഏജന്റുമാരെ ഒരേസമയം പ്രവർത്തിപ്പിക്കാനുള്ള നീക്കവുമുണ്ട്.
എഐയുടെ വരവോടെ സൈബർ സുരക്ഷയിലെ മുൻഗണനകളും മാറേണ്ടിവരും. എത്ര സുരക്ഷാവീഴ്ചകൾ കണ്ടെത്തി എന്നതിലുപരി, ഏതൊക്കെയാണ് യഥാർഥത്തിൽ ചൂഷണം ചെയ്യപ്പെടാൻ സാധ്യതയുള്ളത്, അവ സ്ഥാപനത്തിന്റെ പ്രവർത്തനങ്ങളെ എത്രത്തോളം ബാധിക്കും എന്നതിനെ അടിസ്ഥാനമാക്കിയുള്ള അപകടസാധ്യതാ നിർണയമാണ് ഇനി പ്രധാനം.
എഐ സൈബർ ആക്രമണങ്ങളുടെ ചെലവും മുന്നിലുണ്ടായിരുന്ന സാങ്കേതിക തടസ്സങ്ങളും കുറയ്ക്കുമ്പോൾ പ്രതിരോധ സംവിധാനങ്ങളും അതേ വേഗത്തിൽ വികസിക്കേണ്ടതുണ്ട്. ആക്രമണത്തിനും പ്രതിരോധത്തിനും ഒരുപോലെ കരുത്തേകുന്ന സാങ്കേതികവിദ്യയായി എഐ മാറുമ്പോൾ, സൈബർ സുരക്ഷ ഇനി ഐടി വിഭാഗത്തിന്റെ മാത്രം ഉത്തരവാദിത്തമല്ല, സ്ഥാപനങ്ങളുടെ നിലനിൽപ്പിനെയും സാമ്പത്തിക സുരക്ഷയെയും നേരിട്ട് ബാധിക്കുന്ന ബിസിനസ് മുൻഗണന കൂടിയാകുന്നു.
AI is lowering the technical barriers to cyberattacks, pushing companies to adopt AI-powered security tools and risk-based vulnerability management.
Read DhanamOnline in English
Subscribe to Dhanam Magazine