ഇന്ത്യൻ ഐ.ടി ഭീമന്മാർക്ക് വെല്ലുവിളിയുമായി ആന്ത്രോപിക് ബംഗളൂരുവിൽ; ഇന്ത്യ രണ്ടാമത്തെ വലിയ വിപണിയെന്ന് കമ്പനി

ആഗോള ആർട്ടിഫിഷ്യൽ ഇന്റലിജൻസ് മേഖലയിലെ പ്രമുഖരായ ആന്ത്രോപിക് (Anthropic) ഇന്ത്യയിലെ തങ്ങളുടെ ആദ്യത്തെ ഓഫീസ് ബംഗളൂരുവിൽ തുറന്നു. ഏഷ്യാ പസഫിക് മേഖലയിലെ കമ്പനിയുടെ രണ്ടാമത്തെ ഓഫീസാണിത്. ലോകമെമ്പാടുമുള്ള ക്ലോഡ് (Claude.ai) ഉപയോക്താക്കളുടെ എണ്ണത്തിൽ ഇന്ത്യ രണ്ടാം സ്ഥാനത്താണ് എന്നത് ഈ തീരുമാനത്തിന്റെ പ്രാധാന്യം വർദ്ധിപ്പിക്കുന്നു.

ആപ്ലിക്കേഷനുകൾ നിർമ്മിക്കുന്നതിനും സിസ്റ്റങ്ങൾ നവീകരിക്കുന്നതിനുമുള്ള കമ്പ്യൂട്ടർ, മാത്തമാറ്റിക്കൽ ജോലികൾക്കായാണ് ഇന്ത്യയിലെ ക്ലോഡ് ഉപയോഗത്തിന്റെ പകുതിയോളം വിനിയോഗിക്കപ്പെടുന്നത്. ഉത്തരവാദിത്തമുള്ള എഐ (Responsible AI) കൂടുതൽ ആളുകളിലേക്കും സംരംഭങ്ങളിലേക്കും എത്തിക്കുകയാണ് കമ്പനി ലക്ഷ്യമിടുന്നതെന്ന് ആന്ത്രോപിക് ഇന്ത്യയുടെ മാനേജിംഗ് ഡയറക്ടർ ഐറിന ഘോസ് പറഞ്ഞു. ഇതിനായി ബിസിനസ്, വിദ്യാഭ്യാസം, കൃഷി തുടങ്ങിയ മേഖലകളിൽ പുതിയ പങ്കാളിത്തങ്ങൾ കമ്പനി പ്രഖ്യാപിച്ചു.

ഇന്ത്യയിലെ വിവിധ പ്രാദേശിക ഭാഷകളിലെ എഐ പ്രകടനം മെച്ചപ്പെടുത്തുന്നതിനായി മലയാളം ഉൾപ്പെടെ പത്ത് ഔദ്യോഗിക ഭാഷകളിൽ കമ്പനി വലിയ തോതിലുള്ള ഗവേഷണം നടത്തുന്നുണ്ട്. കൃഷി, നിയമം എന്നീ മേഖലകളിൽ പ്രാദേശികമായ വെല്ലുവിളികൾ നേരിടുന്നതിനായി 'കാര്യ' (Karya), 'കളക്ടീവ് ഇന്റലിജൻസ് പ്രോജക്റ്റ്' തുടങ്ങിയ സംഘടനകളുമായും ഡിജിറ്റൽ ഗ്രീൻ പോലുള്ള എൻജിഒകളുമായും സഹകരിച്ചാണ് ആന്ത്രോപിക് പ്രവർത്തിക്കുന്നത്.

ഇന്ത്യയിലെ മികച്ച സാങ്കേതിക പ്രതിഭകളുടെ സഹകരണത്തോടെ ജനങ്ങളുടെ ജീവിതം മെച്ചപ്പെടുത്താൻ സഹായിക്കുന്നതിനാണ് എഐ സാങ്കേതികവിദ്യ ഉപയോഗിക്കുകയെന്ന് ഐറിന പറഞ്ഞു. അടുത്തിടെ 30 ബില്യൺ ഡോളർ ഫണ്ടിംഗ് നേടിയ കമ്പനിയുടെ ഈ ഇന്ത്യൻ വിപുലീകരണം എഐ വ്യവസായത്തിൽ നിർണായകമാകുമെന്നാണ് കരുതുന്നത്.

_{Anthropic expands into India with its first Bengaluru office, citing India as its second-largest market for Claude AI users.}