ആമസോണിന്റെ 'റിംഗ്' (Ring), ഗൂഗിളിന്റെ 'നെസ്റ്റ്' (Nest) എന്നിവയോട് മത്സരിച്ച് സ്മാർട്ട് ഹോം വിപണിയിൽ സാന്നിധ്യം ശക്തമാക്കാൻ പുതിയ നീക്കങ്ങളുമായി ആപ്പിൾ (Apple). സാങ്കേതിക വിന്യാസം വിപുലീകരിക്കുന്നതിന്റെ ഭാഗമായി ദക്ഷിണ കൊറിയൻ കമ്പനിയായ എൽ.ജി ഇലക്ട്രോണിക്‌സുമായി (LG Electronics) ആപ്പിൾ തന്ത്രപരമായ പങ്കാളിത്തത്തിൽ ഏർപ്പെട്ടു.
ആപ്പിൾ പുതിയതായി അവതരിപ്പിക്കുന്ന സ്മാർട്ട് ഹോം ഹബ്ബ്, അപ്‌ഗ്രേഡ് ചെയ്ത ഹോംപോഡ് മിനി (HomePod mini), പുതിയ ടിവി സെറ്റ്-ടോപ്പ് ബോക്സ് എന്നിവയുമായി ചേർന്ന് പ്രവർത്തിക്കുന്ന രീതിയിലാണ് ഈ ഇക്കോസിസ്റ്റം ഒരുക്കുന്നത്. എൽ.ജിയുമായി ചേർന്ന് സ്മാർട്ട് ഡോർബെൽ, തെർമോസ്റ്റാറ്റ്, ഇൻഡോർ-ഔട്ട്‌ഡോർ സെക്യൂരിറ്റി ക്യാമറകൾ, ഫ്ലഡ്‌ലൈറ്റ് ക്യാമറ, എൽജി ടെംപറേച്ചര്‍ സെൻസർ, സ്മാർട്ട് ഡെഡ്‌ബോൾട്ട് ലോക്ക് എന്നിവ വികസിപ്പിക്കുന്നതായി ബ്ലൂംബെര്‍ഗ് റിപ്പോര്‍ട്ട് ചെയ്യുന്നു. ഈ ഉൽപ്പന്നങ്ങൾ എൽ.ജി ബ്രാൻഡിൽ തന്നെയായിരിക്കും വിപണിയിലെത്തുക; ഇവയുടെ നിർമ്മാണവും ഉപഭോക്തൃ സേവനവും എൽ.ജി നേരിട്ട് നിർവഹിക്കും.
ആപ്പിൾ സ്മാർട്ട്-ഹോം ഹബ്, പുതുക്കിയ ഹോംപോഡ് മിനി, പുതിയ ടിവി സെറ്റ്-ടോപ്പ് ബോക്സ് എന്നിവ ഒക്ടോബര്‍ 13 ന് അവതരിപ്പിക്കപ്പെടുമെന്ന് പ്രതീക്ഷിക്കുന്നു. എല്‍ജി ആക്സസറികള്‍ ഉപഭോക്താക്കൾക്ക് ലഭിക്കാൻ ഏതാനും മാസങ്ങൾ കൂടി വേണ്ടിവരും.
സാങ്കേതിക മികവ്: കണക്റ്റിവിറ്റിക്കായി വൈഫൈ, ബ്ലൂടൂത്ത് എന്നിവയ്ക്ക് പുറമെ മാറ്റർ (Matter), ത്രെഡ് (Thread) തുടങ്ങിയ ആധുനിക സ്മാർട്ട് ഹോം പ്രോട്ടോക്കോളുകളും പല ഡിവൈസുകളും പിന്തുണയ്ക്കും. ഉപഭോക്താക്കൾ വാതിലിന് സമീപത്തേക്ക് എത്തുമ്പോൾ ഓട്ടോമാറ്റിക്കായി അൺലോക്ക് ആകുന്ന യു.ഡബ്ല്യു.ബി (UWB) സാങ്കേതികവിദ്യ സ്മാർട്ട് ലോക്കിൽ ഉൾപ്പെടുത്തുമെന്നും കരുതുന്നു.
തന്ത്രപരമായ വിജയം: സ്വന്തമായി വലിയ നിർമ്മാണച്ചെലവുകളും സങ്കീർണതകളും വഹിക്കാതെ തന്നെ ഹോംകിറ്റ് (HomeKit) ഇക്കോസിസ്റ്റം അതിവേഗം വളർത്താൻ ബെൽക്കിൻ (Belkin), ലോഗിടെക് (Logitech) തുടങ്ങിയ കമ്പനികളുമായി മുൻപ് സ്വീകരിച്ച 'സെക്കൻഡ് പാർട്ടി' സഹകരണ രീതിയാണ് ആപ്പിൾ ഇവിടെയും പ്രയോജനപ്പെടുത്തുന്നത്.
Read DhanamOnline in English
Subscribe to Dhanam Magazine