ലാപ്ടോപ്പ് വാങ്ങാന്‍ 14 ലക്ഷം രൂപയോളം ചെലവാക്കേണ്ടി വന്നാലോ? അതും ഈ തുകയുടെ പകുതിയോളം സ്റ്റോറേജിനുവേണ്ടി മാത്രം നല്‍കേണ്ടിവന്നാലോ? ടെക് ഭീമനായ ആപ്പിളിന്റെ പുതിയ ടച്ച് സ്‌ക്രീന്‍ മാക്ബുക്ക് പ്രോ (MacBook Pro) അവതരിപ്പിച്ചതോടെ പ്രീമിയം ലാപ്ടോപ്പുകളുടെ വില വീണ്ടും ചര്‍ച്ചയാകുകയാണ്.
പുതിയ 16 ഇഞ്ച് മാക്ബുക്ക് പ്രോയുടെ ഏറ്റവും ഉയര്‍ന്ന കോണ്ഫിഗറേഷന് അമേരിക്കയില്‍ 14,549 ഡോളറാണ് വില. ഇന്ത്യന്‍ രൂപയില്‍ ഏകദേശം 13.87 ലക്ഷം രൂപ. ഇതില്‍ 16 ടെറാബൈറ്റ് (TB) എസ്എസ്ഡി സ്റ്റോറേജിലേക്ക് അപ്ഗ്രേഡ് ചെയ്യാന്‍ മാത്രം 7,000 ഡോളര്‍, അതായത് ഏകദേശം 6.67 ലക്ഷം രൂപ അധികം നല്‍കണം.
ആപ്പിളിന്റെ പുതിയ മാക്ബുക്ക് പ്രോയില്‍ 16TB വരെയാണ് സ്റ്റോറേജ് ലഭ്യമാകുന്നത്. എന്നാല്‍ സ്റ്റോറേജ് ശേഷി വര്‍ധിപ്പിക്കുന്നതിനനുസരിച്ച് വിലയും കുത്തനെ ഉയരും. ഉയര്‍ന്ന M5 Max കോണ്‍ഫിഗറേഷനില്‍ അടിസ്ഥാന 2TB സ്റ്റോറേജില്‍നിന്നുള്ള അപ്ഗ്രേഡ് നിരക്കുകള്‍ ഇങ്ങനെ:
4TB SSD: 1,000 ഡോളര്‍ അധികം (ഏകദേശം ₹95,300)
8TB SSD: 3,000 ഡോളര്‍ അധികം (ഏകദേശം ₹2.86 ലക്ഷം)
16TB SSD: 7,000 ഡോളര്‍ അധികം (ഏകദേശം ₹6.67 ലക്ഷം)
128GB യൂണിഫൈഡ് മെമ്മറി: 48GB കോണ്‍ഫിഗറേഷനില്‍നിന്നുള്ള അപ്ഗ്രേഡിന് 2,000 ഡോളര്‍ അധികം (ഏകദേശം ₹1.91 ലക്ഷം)
2TBയില്‍നിന്ന് 16TBയിലേക്കുള്ള അപ്ഗ്രേഡ് കണക്കാക്കിയാല്‍ ഓരോ അധിക ടെറാബൈറ്റിനും ശരാശരി 500 ഡോളറാണ് ചെലവ്. ഇന്ത്യന്‍ രൂപയില്‍ ഏകദേശം ₹47,650 വരും.
സ്റ്റോറേജ് വര്‍ധിപ്പിക്കാന്‍ മാത്രം ഇത്രയും ഉയര്‍ന്ന തുക നല്‍കേണ്ടിവരുന്നത് സാധാരണ ഉപയോക്താക്കള്‍ക്ക് വലിയ സാമ്പത്തിക ബാധ്യതയാണ്. എന്നാല്‍ വലിയ വീഡിയോ ഫയലുകളും 3D പ്രോജക്ടുകളും കൈകാര്യം ചെയ്യുന്ന പ്രൊഫഷണലുകളെയാണ് ഉയര്‍ന്ന സ്റ്റോറേജ് കോണ്‍ഫിഗറേഷനുകള്‍ പ്രധാനമായും ലക്ഷ്യമിടുന്നത്.
പുതിയ മാക്ബുക്ക് പ്രോയുടെ ഇന്ത്യന്‍ വിപണിയിലെ ആരംഭവില 3,49,900 ആണ്. M5 Pro, M5 Max ചിപ്പുകളുമായി 14 ഇഞ്ച്, 16 ഇഞ്ച് വേരിയന്റുകളിലാണ് ലാപ്ടോപ്പ് എത്തുന്നത്.
14 ഇഞ്ച് M5 Pro: ₹3,49,900
16 ഇഞ്ച് M5 Pro: ₹4,09,900
14 ഇഞ്ച് M5 Max: ₹5,49,900
16 ഇഞ്ച് M5 Max: ₹5,89,900
ടച്ച് സ്‌ക്രീനോടുകൂടിയ PROLED XDR ഡിസ്പ്ലേ, 128GB വരെ യൂണിഫൈഡ് മെമ്മറി, 16TB വരെ സ്റ്റോറേജ് എന്നിവയാണ് പ്രധാന സവിശേഷതകള്‍. ഒക്ടോബര്‍ 28 മുതല്‍ പ്രീ-ഓര്‍ഡര്‍ ആരംഭിച്ച ലാപ്ടോപ്പിന്റെ ഇന്ത്യയിലെ വില്‍പന നവംബര്‍ 9 മുതല്‍ ആരംഭിക്കുമെന്നാണ് ആപ്പിളിന്റെ അറിയിപ്പ്.
പുതിയ മാക്ബുക്ക് പ്രോയുടെ വിലക്കണക്കുകള്‍ ഉപയോക്താക്കള്‍ക്ക് നല്‍കുന്ന പ്രധാന സന്ദേശം ആവശ്യത്തിനനുസരിച്ച് കോണ്ഫിഗറേഷന് തിരഞ്ഞെടുക്കണമെന്നതാണ്.
സാധാരണ ഓഫീസ് ജോലികള്‍, പഠനം, ഇന്റര്‍നെറ്റ് ഉപയോഗം, അടിസ്ഥാന വീഡിയോ എഡിറ്റിങ് എന്നിവയ്ക്കായി 16TB സ്റ്റോറേജ് ആവശ്യമില്ല. മിക്ക സാധാരണ ഉപയോക്താക്കള്‍ക്കും 512GB മുതല്‍ 2TB വരെയുള്ള സ്റ്റോറേജ് മതിയാകാം.
വലിയ ഫയലുകള്‍ സൂക്ഷിക്കേണ്ടവര്‍ക്ക് എക്സ്റ്റേണല്‍ SSD ഉപയോഗിക്കുന്നതിന്റെ ചെലവും പരിശോധിക്കാം. എന്നാല്‍ പ്രവര്‍ത്തനവേഗം, പോര്‍ട്ടബിലിറ്റി, ഡാറ്റ സുരക്ഷ, പ്രൊഫഷണല്‍ ആവശ്യങ്ങള്‍ എന്നിവയും പരിഗണിക്കണം.
Read DhanamOnline in English
Subscribe to Dhanam Magazine