നിര്മിത ബുദ്ധിയുടെ കാര്യത്തില് അമേരിക്കയുമായി കടുത്ത എഐ മത്സരം തുടരുന്നതിനിടയില്, രാജ്യത്തെ പ്രമുഖ എഐ വിദഗ്ധര്ക്ക് വിദേശയാത്രയില് നിയന്ത്രണം ഏര്പ്പെടുത്തി ചൈന. ആലിബാബ, ഡീപ്സീക് പോലുള്ള സ്വകാര്യ കമ്പനികളിലെ പ്രധാന എഐ ഗവേഷകര്, സ്റ്റാര്ട്ടപ് സ്ഥാപകര്, മുതിര്ന്ന എക്സിക്യൂട്ടീവുകള് എന്നിവര് ഇനി വിദേശത്തേക്ക് പോകാന് മുന്കൂര് സര്ക്കാര് അനുമതി തേടണം.
ചൈനയുടെ എഐ തന്ത്രത്തില് നിര്ണായക പങ്കുള്ളവരെയാണ് നിയന്ത്രണ പരിധിയില് കൊണ്ടുവന്നിരിക്കുന്നത്. അമേരിക്കന് സാങ്കേതിക നിയന്ത്രണങ്ങളും ചിപ്പ് വിലക്കുകളും കടുപ്പിക്കുന്ന സാഹചര്യത്തില്, രാജ്യത്തിന്റെ എഐ ശേഷി സംരക്ഷിക്കാനും സാങ്കേതിക ചോര്ച്ച തടയാനുമാണ് നീക്കമെന്നാണ് വിലയിരുത്തല്.
എഐ എഞ്ചിനീയര്മാരെയും ഗവേഷകരെയും ഇനി സാധാരണ ടെക് ജീവനക്കാരായല്ല, ദേശീയ തന്ത്രപ്രധാന ആസ്തികളായി തന്നെയാണ് ബെയ്ജിംഗ് കാണുന്നതെന്ന സൂചന കൂടിയാണ് ഈ തീരുമാനം. വിദേശ കമ്പനികളുടെ 'ടാലന്റ് പോച്ചിങ്', സെന്സിറ്റീവ് വിവരങ്ങളുടെ ചോര്ച്ച, വിദേശ സ്വാധീനം എന്നിവ കുറയ്ക്കാനാണ് നിയന്ത്രണങ്ങളിലൂടെ ശ്രമിക്കുന്നത്.
കഴിഞ്ഞ കുറച്ച് വര്ഷങ്ങളായി ചൈന ടെക് മേഖലയിലെ സര്ക്കാര് നിയന്ത്രണം ശക്തമാക്കിയിരുന്നു. ഫിന്ടെക്, ഡാറ്റ, ഗെയിമിങ്, ക്ലൗഡ്, എഐ തുടങ്ങി പല മേഖലകളിലും സ്വകാര്യ കമ്പനികള്ക്ക് മേല് കര്ശന മേല്നോട്ടം കൊണ്ടുവന്നിരുന്നു. പുതിയ യാത്രാ നിയന്ത്രണം അതിന്റെ തുടര്ച്ചയായാണ് കാണപ്പെടുന്നത്.
ചൈനയുടെ എഐ വളര്ച്ചയില് സ്വകാര്യ കമ്പനികള്ക്ക് ഇപ്പോള് വലിയ പങ്കുണ്ട്. പ്രത്യേകിച്ച് ഡീപ്സീക് (DeepSeek) കുറഞ്ഞ ചെലവില് ശക്തമായ എഐ മോഡലുകള് വികസിപ്പിച്ച് ആഗോള ശ്രദ്ധ നേടിയിരുന്നു. അമേരിക്കന് ചിപ്പ് നിയന്ത്രണങ്ങള്ക്കിടയിലും ചൈന എഐ രംഗത്ത് വേഗത്തില് മുന്നേറുന്നുവെന്ന ചര്ച്ചകള്ക്കും ഇത് വഴിവെച്ചിരുന്നു.
2030ഓടെ ആഗോള എഐ ശക്തിയാകുക എന്നതാണ് ചൈനയുടെ പ്രഖ്യാപിത ലക്ഷ്യം. അതിനായി ചിപ്പ് നിര്മാണം, ഡാറ്റാ സെന്ററുകള്, എഐ ഇന്ഫ്രാസ്ട്രക്ചര്, ഗവേഷണം, ടാലന്റ് വികസനം എന്നിവയില് രാജ്യം വന് നിക്ഷേപമാണ് നടത്തുന്നത്.
പുതിയ നീക്കം ഒരു കാര്യം കൂടി വ്യക്തമാക്കുന്നു: എഐ പോര് ഇനി വെറും ടെക്നോളജിയുടെ പോരാട്ടമല്ല. ടാലന്റിനും അറിവിനും മേല് നിയന്ത്രണം നേടാനുള്ള ജിയോപൊളിറ്റിക്കല് പോരാട്ടമായി അത് മാറിക്കൊണ്ടിരിക്കുകയാണ്.
Read DhanamOnline in English
Subscribe to Dhanam Magazine