കഴിഞ്ഞ രണ്ട് ദിവസമായി ഇന്റർനെറ്റിലും ടെക് ലോകത്തും വലിയ കോളിളക്കം സൃഷ്ടിച്ചുകൊണ്ടിരിക്കുന്ന ഒന്നാണ് 'PHP2Shell' എന്ന സൈബർ ആക്രമണം. ലോകത്തിലെ മൊത്തം വെബ്‌സൈറ്റുകളിൽ 75 ശതമാനത്തോളവും (സാധാരണ വേർഡ്പ്രസ്സ് സൈറ്റുകൾ ഉൾപ്പെടെ) പ്രവർത്തിക്കുന്നത് PHP എന്ന പ്രോഗ്രാമിംഗ് ലാംഗ്വേജിലാണ്. ഈ PHP സിസ്റ്റത്തിലാണ് ഇപ്പോൾ ഗുരുതരമായ സുരക്ഷാ വീഴ്ച കണ്ടെത്തിയിരിക്കുന്നത്.
വിക്കിപീഡിയ, 4chan എന്നിവയ്‌ക്കൊപ്പം ഫ്രാൻസ്, ജർമ്മനി, കാനഡ തുടങ്ങിയ രാജ്യങ്ങളുടെ ഔദ്യോഗിക വെബ്‌സൈറ്റുകൾ പോലും മുൻകരുതലായി താൽക്കാലികമായി ഓഫ്ലൈനാക്കേണ്ടി വന്നു.
സാധാരണയായി ഹാക്കർമാർ ഒരു വെബ്‌സൈറ്റ് ഹാക്ക് ചെയ്യാൻ ശ്രമിക്കുമ്പോൾ അഡ്മിൻ പാസ്‌വേഡ് കണ്ടെത്താനോ, അതിനുള്ളിലേക്ക് വ്യാജ ഫയലുകൾ അപ്‌ലോഡ് ചെയ്യാനോ ആണ് നോക്കാറുള്ളത്. എന്നാൽ PHP2Shell അറ്റാക്കിന്റെ പ്രത്യേകത തികച്ചും വ്യത്യസ്തമാണ്:
👉 ലോഗിൻ ഐഡിയോ പാസ്‌വേഡോ വേണ്ട: ഹാക്കർമാർക്ക് വെബ്‌സൈറ്റിന്റെ കോഡിലേക്ക് പോലും കടക്കേണ്ട ആവശ്യമില്ല.
👉 സെർവർ പൂർണ്ണമായി കയ്യിലെടുക്കാം: വെറുമൊരു സാധാരണ സന്ദർശകൻ അയക്കുന്നതുപോലെയുള്ള ചെറിയൊരു റിക്വസ്റ്റ് സെർവറിലേക്ക് അയച്ച് മെമ്മറി തകരാറിലാക്കി (Memory Corruption വഴി) ഹാക്കർക്ക് സെർവറിന്റെ ഫുൾ കൺട്രോൾ (Shell Access) നേടിയെടുക്കാൻ സാധിക്കും.
ഓപ്പൺ എഐയുടെ (OpenAI) 'പാച്ച് ദി പ്ലാനറ്റ്' (Patch the Planet) മുൻകൈയിൽ ജിപിടി മോഡലുകളും സെക്യൂരിറ്റി റിസർച്ചർമാരായ 'Calif', 'Wiz' ടീമുകളും ചേർന്ന് നടത്തിയ ഗവേഷണത്തിലാണ് ഈ ബഗ്ഗുകൾ പുറത്തുകൊണ്ടുവന്നത്. ഈ ബഗ്ഗിന്റെ വിവരങ്ങളും ഹാക്കിംഗ് കോഡുകളും (Proof of Concept) ഇന്റർനെറ്റിൽ പരസ്യമായി ചോർന്നതോടെ, ചെറിയ ഹാക്കർമാർക്ക് പോലും എളുപ്പത്തിൽ സൈറ്റുകൾ ആക്രമിക്കാൻ കഴിയുന്ന അവസ്ഥയായി. ആമസോണും ക്ലൗഡ്‌ഫ്ലെയറും (Cloudflare) പുറത്തുവിട്ട കണക്കനുസരിച്ച്, വിവരങ്ങൾ പുറത്തുവന്ന ഉടൻ ലക്ഷക്കണക്കിന് ഓട്ടോമേറ്റഡ് ബോട്ടുകളാണ് PHP സൈറ്റുകളെ ലക്ഷ്യമിട്ട് അറ്റാക്ക് അഴിച്ചുവിട്ടത്. ലോകമെമ്പാടുമുള്ള 50 ലക്ഷത്തിലധികം സെർവറുകളെ ഇത് നേരിട്ട് ബാധിക്കാൻ സാധ്യതയുണ്ടെന്നാണ് കണക്കാക്കുന്നത്.
നമ്മൾ ഒരു വെബ്‌സൈറ്റ് സന്ദർശിക്കുമ്പോൾ, ബ്രൗസർ സെർവറിനോട്‌ ആ പേജ് ആവശ്യപ്പെടുന്നു. നിങ്ങളുടെ പേര്, പോസ്റ്റുകൾ, കാർട്ട് തുടങ്ങിയ വിവരങ്ങൾ ഉൾപ്പെടുത്തി ആ നിമിഷം പേജ് നിർമ്മിച്ചു തരുന്നത് സെർവറിലെ ഒരു ചെറിയ പ്രോഗ്രാമാണ്. ഈ പ്രോഗ്രാമുകൾ എഴുതാൻ വ്യാപകമായി ഉപയോഗിക്കുന്ന ഭാഷയാണ് PHP.
ഇവിടെ പ്രശ്നം ഏതെങ്കിലും ഒരു പ്രത്യേക വെബ്‌സൈറ്റിന്റെ കോഡിലല്ല, മറിച്ച് PHP എന്ന സിസ്റ്റത്തിൽ തന്നെയാണ്. അതിനാൽ നിങ്ങളുടെ വെബ്‌സൈറ്റ് എങ്ങനെ നിർമ്മിച്ചതായാലും, അത് PHP-യിലാണ് പ്രവർത്തിക്കുന്നതെങ്കിൽ ഈ സുരക്ഷാ ഭീഷണി ബാധിക്കും.
സാധാരണ ഹാക്കിംഗിൽ നിന്ന് വളരെ വ്യത്യസ്തമാണ് PHP2Shell അറ്റാക്ക്. ലോഗിൻ വിവരങ്ങളോ പാസ്‌വേഡോ ഇല്ലാതെ, വെറുമൊരു റിക്വസ്റ്റ് സെർവറിലേക്ക് അയച്ച് മെമ്മറി തകരാറിലാക്കി സെർവറിന്റെ പൂർണ്ണ നിയന്ത്രണം കൈക്കലാക്കാൻ ഹാക്കർമാർക്ക് സാധിക്കുന്നു. ഇത് ചെറുകിട ബിസിനസ് സ്ഥാപനങ്ങൾക്കും പ്ലഗിനുകളെ ആശ്രയിക്കുന്ന വേർഡ്പ്രസ്സ് സൈറ്റുകൾക്കും വലിയ വെല്ലുവിളിയാണ് ഉയർത്തുന്നതെന്ന് കേരള സ്റ്റാര്‍ട്ടപ്പ് കമ്പനിയായ ക്ലൗഡ്‌ബോയ് ടെക്‌നോളജീസിന്റെ സി.ഇ.ഒ ബച്പന്‍ ഘോഷ് ധനം ഓണ്‍ലൈനിനോട് വ്യക്തമാക്കി. 150 ലധികം വെബ്‌സൈറ്റുകള്‍ മാനേജ് ചെയ്യുന്ന സ്ഥാപനമാണ് കേരള സ്റ്റആര്‍ട്ടപ്പ് മിഷനില്‍ പ്രവര്‍ത്തിക്കുന്ന ക്ലൗഡ്‌ബോയ്.
കേരളത്തിലെ വലിയൊരു വിഭാഗം ഡിജിറ്റൽ മീഡിയ പോർട്ടലുകളും, ഇ-കോമേഴ്സ് പ്ലാറ്റ്‌ഫോമുകളും, ബിസിനസ് വെബ്‌സൈറ്റുകളും പ്രവർത്തിക്കുന്നത് വേർഡ്പ്രസ്സ് അല്ലെങ്കിൽ മറ്റ് PHP ഫ്രെയിംവർക്കുകളിലാണ്. ഒട്ടും വൈകാതെ സുരക്ഷാ നടപടികൾ സ്വീകരിച്ചില്ലെങ്കിൽ കസ്റ്റമർ ഡാറ്റാബേസും വിവരങ്ങളും വലിയ രീതിയിൽ ചോരാൻ ഇടയാക്കും.
പ്രശ്നത്തിന് പരിഹാരമായി PHP ടീം ഔദ്യോഗികമായി സുരക്ഷാ അപ്‌ഡേറ്റ് (Fix) പുറത്തിറക്കിയിട്ടുണ്ട്. മെമ്മറി ജമ്പ് സുരക്ഷിതമാക്കിക്കൊണ്ട് 237 പുതിയ സെക്യൂരിറ്റി ടെസ്റ്റുകൾ ഉൾപ്പെടുത്തിയാണ് പുതിയ വേർഷൻ എത്തിച്ചിരിക്കുന്നത്. വെബ്‌സൈറ്റുകളോ സെർവറുകളോ മാനേജ് ചെയ്യുന്നവര്‍ ഒട്ടും വൈകാതെ താഴെ പറയുന്ന കാര്യങ്ങൾ ചെയ്യുക:
PHP വേർഷൻ പരിശോധിക്കുക: നിങ്ങളുടെ ഹോസ്റ്റിംഗ് ഡാഷ്‌ബോർഡിലോ അല്ലെങ്കിൽ വേർഡ്പ്രസ്സ് ആണെങ്കിൽ Tools > Site Health എന്ന ഭാഗത്തോ പോയി വേർഷൻ പരിശോധിക്കുക. നിലവിൽ PHP 8.2, 8.3, 8.4, 8.5 വേർഷനുകൾ റൺ ചെയ്യുന്ന എല്ലാ സിസ്റ്റങ്ങളും അപകടത്തിലാണ്.
അപ്‌ഗ്രേഡ് ചെയ്യുക: PHP എത്രയും വേഗം താഴെ പറയുന്ന ലേറ്റസ്റ്റ് പാച്ചുകളിലേക്ക് അപ്‌ഡേറ്റ് ചെയ്യുക. (പ്ലഗിന്നുകളോ വോർഡ്പ്രസ്സോ മാത്രം അപ്‌ഡേറ്റ് ചെയ്തതുകൊണ്ട് ഈ പ്രശ്നം മാറില്ല, PHP തനിയെ അപ്‌ഡേറ്റ് ചെയ്യണം).
PHP 8.2.35
PHP 8.3.36
PHP 8.4.27
PHP 8.5.12
റീസ്റ്റാർട്ട് ചെയ്യുക: അപ്‌ഡേറ്റിന് ശേഷം വെബ് സർവീസുകളും PHP വർക്കറുകളും (PHP-FPM / LiteSpeed) നിർബന്ധമായും റീസ്റ്റാർട്ട് ചെയ്യുക.
സെർവർ പരിശോധിക്കുക: അപ്‌ഡേറ്റ് ചെയ്ത ശേഷം അനാവശ്യ ഫയലുകളോ, പുതിയ അഡ്മിൻ അക്കൗണ്ടുകളോ ക്രിയേറ്റ് ചെയ്യപ്പെട്ടിട്ടുണ്ടോ എന്ന് പരിശോധിക്കുക.
നിങ്ങളുടെ വെബ്‌സൈറ്റ് ഈ പ്രശ്നം നേരിടുന്നുണ്ടോ എന്നറിയാനായി ക്ലൗഡ്‌ബോയ് ടെക്‌നോളജീസ് നല്‍കിയിട്ടുള്ള https://kloudboy.com/php2shell-scanner/എന്ന ലിങ്ക് വഴി ഫ്രീ Free PHP2Shell Scanner & Runtime Audit സേവനം പ്രയോജനപ്പെടുത്താം.
A critical PHP vulnerability discovered using AI forces global government websites offline, putting over 70% of websites worldwide—including Indian and Kerala portals—at severe cyber risk.
Read DhanamOnline in English
Subscribe to Dhanam Magazine