സാംസംഗ് ഗാലക്സി എഫ് 14 5ജി അടുത്ത ആഴ്ച, വില 15,000 ല്‍ താഴെ
ഈ വര്‍ഷം സാംസംഗ് ഇന്ത്യയില്‍ പുറത്തിറക്കുന്ന രണ്ടാമത്തെ എഫ് സീരീസ് സ്മാര്‍ട്ട്ഫോണായിരിക്കും ഇത്
image:@samsung/fb
സാധാരണക്കാര്‍ക്ക് താങ്ങാനാവുന്ന വിലയുള്ള സാംസംഗ് ഗാലക്സി എഫ് 14 5ജി സ്മാര്‍ട്ട്ഫോണ്‍ അടുത്തയാഴ്ച ഇന്ത്യയില്‍ അവതരിപ്പിക്കുമെന്ന് ബിസിനസ് സ്റ്റാന്‍ഡേര്‍ഡ് റിപ്പോര്‍ട്ട് ചെയ്തു. ഇതിന്റെ വില 15,000 രൂപയില്‍ താഴെയാകാന്‍ സാധ്യതയുണ്ടെന്ന് റിപ്പോര്‍ട്ട് പറയുന്നു.
ഒക്ടാ-കോര്‍ പ്രോസസര്‍
6000mAh ബാറ്ററിയും മികച്ച പ്രകടനം നല്‍കുന്ന 5 nm എക്സിനോസ് ചിപ്സെറ്റും ഉള്‍പ്പെടെ നിരവധി സവിശേഷതകളുമായാണ് സാംസംഗ് ഗാലക്സി എഫ് 14 5ജി എത്തുന്നതെന്ന സൂചനയുണ്ട്. എക്സിനോസ് 1330 എന്ന സാംസംഗിന്റെ പുതിയ 5nm ചിപ്സെറ്റ് മള്‍ട്ടി-ടാസ്‌ക്കുകള്‍ ചെയ്യുന്നവര്‍ക്കായി രൂപകല്‍പ്പന ചെയ്തിരിക്കുന്നതാണ്. കൂടാതെ ഇത് വേഗതയേറിയതും ദൈര്‍ഘ്യമേറിയതുമായ ബാറ്ററി ലൈഫും വാഗ്ദാനം ചെയ്യുന്ന ഒരു ഒക്ടാ-കോര്‍ പ്രോസസറാണ്.
എഫ് സീരീസില്‍ രണ്ടാമന്‍
ഈ വര്‍ഷം സാംസംഗ് ഇന്ത്യയില്‍ പുറത്തിറക്കുന്ന രണ്ടാമത്തെ എഫ് സീരീസ് സ്മാര്‍ട്ട്ഫോണായിരിക്കും ഗാലക്സി എഫ് 14 5ജി. കമ്പനി നേരത്തെ ജനുവരിയില്‍ ഗാലക്സി എഫ്04 പുറത്തിറക്കിയിരുന്നു. കമ്പനി രണ്ട് പുതിയ എ സീരീസ് സ്മാര്‍ട്ട്ഫോണുകളായ ഗാലക്സി എ 34 5ജി, ഗാലക്സി എ 54 5ജി എന്നിവ ഈ ആഴ്ച രാജ്യത്ത് അവതരിപ്പിക്കാന്‍ സാധ്യതയുണ്ടെന്നും റിപ്പോര്‍ട്ട് പറയുന്നു.