പ്രമുഖ പോര്ട്ട്ഫോളിയോ മാനേജരും നിക്ഷേപകനുമായ പൊറിഞ്ചു വെളിയത്ത് നേതൃത്വം കൊടുക്കുന്ന ഇക്വിറ്റി ഇന്റലിജന്സ് മിഡ്ക്യാപ് ഓഹരിയായ ഗ്രീവിസ് കോട്ടണില് 29.37 കോടി രൂപയുടെ നിക്ഷേപം നടത്തി. ഇന്നലെ ബള്ക്ക് ഡീല് വഴിയാണ് 12.52 ലക്ഷം ഓഹരികൾ സ്വന്തമാക്കിയത്. ശരാശരി 234.63 രൂപയ്ക്കാണ് കമ്പനിയുടെ 0.51 ശതമാനം വരുന്ന ഓഹരികള് വാങ്ങിയിരിക്കുന്നത്. ജനുവരി 27ലെ ഓഹരിയുടെ ക്ലോസിംഗ് വിലയേക്കാള് അഞ്ച് ശതമാനം ഡിസ്കൗണ്ട് വിലയാണിത്.
നിക്ഷേപ പ്രഖ്യാപനത്തിന് പിന്നാലെ ഗ്രീവ്സ് കോട്ടണ് ഓഹരി ഇന്ന് മൂന്ന് ശതമാനം ഉയര്ന്ന് 245.30 രൂപയിലാണ് ബി.എസ്.ഇയില് വ്യാപാരം ആരംഭിച്ചത്. പിന്നീട് ഓഹരിവില 258 രൂപയിലേക്ക് ഉയര്ന്നതോടെ നേട്ടം അഞ്ച് ശതമാനമായി.
കഴിഞ്ഞ 52 ആഴ്ചയ്ക്കിടെയുള്ള ഓഹരിയുടെ ഉയര്ന്ന വിലയായ 319.50 രൂപയിൽ നിന്ന് 19 ശതമാനം മാത്രം അകലെയാണ് ഇപ്പോള് വ്യാപാരം. 52 ആഴ്ചയിലെ താഴ്ന്ന വില 112.50 രൂപയാണ്. അതുമായി നോക്കുമ്പോള് 129 ശതമാനം വളര്ച്ചയുണ്ട്. കഴിഞ്ഞ ഒരു വര്ഷത്തിനിടെ ഓഹരി വില 50 ശതമാനം ഉയര്ന്നു. അതേസമയം, ജനുവരിയില് ഇതു വരെ 11 ശതമാനം ഇടിവിലാണ്.
പൊറിഞ്ചു വെളിയത്തിനെ കൂടാതെ പ്രമുഖ നിക്ഷേപകനായ വിജയ് കേഡിയയ്ക്കും ഗ്രീവ്സ് കോട്ടണില് നിക്ഷേപമുണ്ട്. കേഡിയ സെക്യൂരിറ്റീസ് എന്ന സ്ഥാപനം വഴി കഴിഞ്ഞ ഡിസംബര് 9ന് 12 ലക്ഷം ഓഹരികള് ബള്ക്ക് ഡീലിലൂടെ സ്വന്തമാക്കി. 208.87 രൂപ പ്രകാരമായിരുന്നു ഓഹരി വാങ്ങിയത്.
മികച്ച സാമ്പത്തിക പ്രകടനം കാഴ്ചവയ്ക്കുന്ന കമ്പനിയാണ് ഗ്രീവ്സ് കോട്ടണ്. 2025 സാമ്പത്തിക വര്ഷത്തിന്റെ മൂന്നാം പാദത്തില് കമ്പനിയുടെ ലാഭം 64 ശതമാനം വളര്ച്ചയോടെ 20.8 കോടിയിലെത്തി. വരുമാനം 12.8 ശതമാനം വളര്ച്ചയോടെ 750.6 കോടിരൂപയാണ്.
Read DhanamOnline in English
Subscribe to Dhanam Magazine