ഒറ്റച്ചാട്ടത്തില്‍ 58,000 കടന്ന് സ്വര്‍ണവില! ഇന്ന് കൂടിയത് 640 രൂപ
ആഗോള രാഷ്ട്രീയ പ്രശ്‌നങ്ങളും യു.എസ് പണപ്പെരുക്കണക്കിനെ കുറിച്ചുള്ള ആശങ്കകളും അന്താരാഷ്ട്ര വില ഇന്നലെ ഒരു ശതമാനത്തിനുമേല്‍ ഉയര്‍ത്തി
വിവാഹ പര്‍ച്ചേസുകാരെയും സ്വര്‍ണാഭരണ പ്രേമികളെയും ആശങ്കയിലാക്കി സംസ്ഥാനത്ത് സ്വര്‍ണ വില വന്‍ കുതിപ്പില്‍. ഇന്ന് ഒറ്റ ദിവസം കൊണ്ട് പവന് വില 640 രൂപ വര്‍ധിച്ച് 58,280 രൂപയിലെത്തി. ഗ്രാം വില 80 രൂപ ഉയര്‍ന്ന് 7,285 രൂപയുമായി. തുടര്‍ച്ചയായ മൂന്നാം ദിവസമാണ് സ്വര്‍ണ വിലയില്‍ മുന്നേറ്റമുണ്ടാകുന്നത്. ഇതോടെ ഈ ആഴ്ചയിലെ മാത്രം വര്‍ധന 1,360 രൂപയാണ്.
ഇക്കഴിഞ്ഞ ഒക്ടോബര്‍ 31ന് രേഖപ്പെടുത്തിയ ഗ്രാമിന് 7,455 രൂപയും പവന് 59,640 രൂപയുമാണ് കേരളത്തിലെ ഏറ്റവും ഉയര്‍ന്ന സ്വര്‍ണ വില. നിലവിലെ കുതിപ്പ് തുടര്‍ന്നാല്‍ അധികം വൈകാതെ സ്വര്‍ണം കേരളത്തിൽ പുതിയ റെക്കോഡ് കുറിച്ചേക്കും.
രാജ്യാന്തര വില 2,700 ഡോളര്‍ കടന്നു
ഒരു പവന് ആഭരണത്തിന് വില
ഇന്ന് ഒരു പവന് സ്വര്‍ണാഭരണത്തിന് വില 57,640 രൂപയാണ്. എന്നാല്‍ നിങ്ങള്‍ക്കിഷ്ടപ്പെട്ട ഒരു പവന് ആഭരണം കടയില്‍ നിന്ന് വാങ്ങാന്‍ ഈ തുക മതിയാകില്ല. ഇന്നത്തെ പവന് വിലയ്ക്കൊപ്പം ഏറ്റവും കുറഞ്ഞത് അഞ്ച് ശതമാനം പണിക്കൂലി, സ്വര്‍ണത്തിനും പണിക്കൂലിക്കും മൂന്ന് ശതമാനം നികുതി. 45 രൂപ ഹാള്‍മാര്‍ക്ക് ചാര്‍ജ്, അതിന് 18 ശതമാനം നികുതി എന്നിവയും ചേര്‍ത്ത് കൃത്യമായി പറഞ്ഞാല്‍ 63,803 രൂപ നല്‍കേണ്ടി വരും. തിരഞ്ഞെടുക്കുന്ന ആഭരണങ്ങളുടെ ഡിസൈനുകള്‍ക്കനുസരിച്ച് പണിക്കൂലിയില്‍ വ്യത്യാസം വരും. ബ്രാന്‍ഡഡ് ജുവലറികള്‍ക്ക് 20 ശതമാനം വരെയൊക്കെ പണിക്കൂലി ഈടാക്കാറുണ്ട്.