വാട്‌സാപ്പ് വോയ്‌സ് കോളുകള്‍ അടിമുടി മാറിയേക്കും, പുതിയ ടെക്‌നോളജി
വ്യക്തിഗത, ഗ്രൂപ്പ് വോയ്‌സ് കോളുകള്‍ മെച്ചമാകും.
വാട്‌സാപ്പ് പുത്തന്‍ ഫീച്ചറുകള്‍ പുറത്തിറക്കുന്നതിന്റെ പണിപ്പുരയിലാണെന്ന് റിപ്പോര്‍ട്ടുകള്‍. ഏറ്റവും പുതുതായി വോയ്‌സ് കോളുകള്‍ക്ക് ഒരു പുതിയ ഇന്റര്‍ഫേസ് വികസിപ്പിക്കുന്നതായാണ് റിപ്പോര്‍ട്ട്. ആപ്പിന്റെ ആന്‍ഡ്രോയ്ഡ്, ഐഒഎസ് പതിപ്പുകളുടെ ഭാഗമായിരിക്കും ഇന്റര്‍ഫേസ്. ഈ പുതിയ ഇന്റര്‍ഫേസിലൂടെ വ്യക്തിഗത, ഗ്രൂപ്പ് വോയ്‌സ് കോളുകള്‍ക്ക് മെച്ചപ്പെട്ട അനുഭവം നല്‍കാനാണ് വാട്ട്‌സാപ്പ് ലക്ഷ്യമിടുന്നത്.
പുതിയ ഫീച്ചറെത്തുന്നതോടെ ഉപയോക്താക്കള്‍ വോയ്‌സ് കോളുകള്‍ ചെയ്യുമ്പോള്‍ അവര്‍ക്കായി പുതിയതായി രൂപകല്‍പ്പന ചെയ്ത ഇന്റര്‍ഫേസ് ലഭ്യമായേക്കും. എന്നാല്‍ ബീറ്റ ടെസ്റ്ററുകള്‍ക്ക് പോലും ഈ മാറ്റങ്ങള്‍ ഇതുവരെ ലഭ്യമായിട്ടില്ല. പക്ഷേ, സ്‌ക്രീന്‍ഷോട്ടുകള്‍ പുറത്തിറങ്ങിയിട്ടുണ്ട്.
വാട്ട്‌സാപ്പ് കൂടുതല്‍ ഒതുക്കമുള്ളതും ആധുനികവുമാക്കുന്നതിനും ലഭ്യമായ ഇടം ക്രമീകരിക്കുന്നതിനുമായി പുതിയ അപ്‌ഡേറ്റ് ഒരുക്കിയിരിക്കുന്നു. പ്രത്യേകിച്ച് ഗ്രൂപ്പ് വോയ്‌സ് കോളുകള്‍ ചെയ്യുമ്പോള്‍ മനോഹരമായി കാണപ്പെടും. എല്ലാ ബട്ടണുകളും ഇന്റര്‍ഫേസ് ഘടകങ്ങളും ദൃഢമായി നിലനില്‍ക്കുന്നതിനാല്‍, കോള്‍ സ്‌ക്രീന്‍ മാറുന്നില്ല.
സ്‌ക്രീനിന്റെ മധ്യഭാഗത്ത് വൃത്താകൃതിയിലുള്ള ചാരനിറത്തിലുള്ള ചതുരം, അതില്‍ നിങ്ങളുടെ കോണ്‍ടാക്റ്റിന്റെ പേര്/നമ്പര്‍, പ്രൊഫൈല്‍ ചിത്രം എന്നിവ കാണാം. പുറമേ, എല്ലാ കോളുകളും എന്‍ഡ്-ടു-എന്‍ഡ് എന്‍ക്രിപ്റ്റ് ചെയ്തതാണെന്ന് ഉപയോക്താക്കളെ ഓര്‍മ്മിപ്പിക്കുന്ന സൂചകങ്ങള്‍ ചേര്‍ക്കാന്‍ പദ്ധതിയിടുന്നു.
വോയ്‌സ്, വീഡിയോ കോളുകള്‍ക്കായി, ഈ സന്ദേശം ആപ്പിന്റെ കോളുകള്‍ ടാബില്‍ വിളിക്കുകയോ സ്വീകരിക്കുകയോ ചെയ്യുന്ന എല്ലാ കോളുകള്‍ക്ക് കീഴിലും ദൃശ്യമാകും. 2016-ല്‍ വാട്ടസാപ്പ് ആരംഭിച്ച എന്‍ഡ്-ടു-എന്‍ഡ് എന്‍ക്രിപ്ഷന്‍ ഈ വര്‍ഷമാദ്യം, ആന്‍ഡ്രോയിഡ് ഉപയോക്താക്കള്‍ക്കായി ഗൂഗ്ള്‍ ഡ്രൈവിലും ഐഫോണ്‍ ഉപയോക്താക്കള്‍ക്കായി ഐക്ലൗഡി-ലും സംഭരിച്ചിരിക്കുന്ന ചാറ്റ് ബാക്കപ്പുകള്‍ക്കുമായി വിപുലീകരിച്ചു.
വോയ്‌സ് മെസേജുകള്‍ക്കും പുതിയ ഫീച്ചര്‍ ഈയടുത്ത് ആപ്പ് അപ്‌ഡേറ്റ് ചെയ്തിരുന്നു. ഉപയോക്താക്കളെ അവരുടെ വോയ്‌സ് സന്ദേശങ്ങള്‍ അയയ്ക്കുന്നതിന് മുമ്പ് പ്രിവ്യൂ ചെയ്യാന്‍ അനുവദിക്കുന്നതാണ് ഈ ഫീച്ചര്‍.