മാന്ദ്യം: നിക്ഷേപകർക്കു സുവർണാവസരം?

വിപണികൾ എല്ലായ്പോഴും അങ്ങനെയാണ്. ഏതു സാഹചര്യത്തിലും വിപണികൾ വലിയ ശുഭാപ്തിവിശ്വാസമാണ് പുലർത്താറ്. യുക്തിസഹമായി ചിന്തിച്ചാൽ അനുകൂലമല്ലാത്ത അന്തരീക്ഷത്തിലും പുലർത്തുന്ന

ആ ശുഭാപ്തിവിശ്വാസമാണ് വിപണികളെ നിലനിർത്തുന്നതെന്നും പറയാം. അതുള്ളതുകൊണ്ടാണ് എല്ലാവരും വിൽക്കുമ്പോൾ വാങ്ങാൻ ആളുകൾ ഉണ്ടാകുന്നത്. അങ്ങനെ വാങ്ങുന്നവർ വലിയ ലാഭം കൊയ്യുന്നതും സാധാരണം. "എല്ലാവരും പേടിച്ചു വിൽക്കുമ്പോൾ ആർത്തിയോടെ വാങ്ങുക, എല്ലാവരും ആർത്തിയോടെ വാങ്ങുമ്പോൾ പേടിച്ചു വിൽക്കുക" എന്നു വിശ്രുത നിക്ഷേപകൻ വാറൻ ബഫറ്റ് ഉപദേശിച്ചത് ഓർക്കുക.

എന്തു കൊണ്ടാണു ലോകം മാന്ദ്യത്തിലേക്കു പോകുന്നത് എന്ന് എല്ലാവർക്കും അറിയാം. 2007-2009 ലെ ആഗോള മാന്ദ്യത്തിനു ശേഷം ലോകത്തിലെ പ്രധാന കേന്ദ്ര ബാങ്കുകൾ പണലഭ്യത വർധിപ്പിക്കുന്നതിലും പലിശ നിരക്ക് കുറയ്ക്കുന്നതിലുമാണു ശ്രദ്ധിച്ചത്. ഇതു ലോകമെങ്ങും കുറഞ്ഞ പലിശയിൽ ഇഷ്ടം പോലെ പണം കിട്ടുന്ന അവസ്ഥ ഉണ്ടാക്കി. ഈ പണം വ്യാപാരം വർധിപ്പിച്ചു. ഓഹരികൾ മുതൽ റിയൽ എസ്റ്റേറ്റ് വരെ എല്ലായിനം ആസ്തികൾക്കും വില കൂട്ടി. അതു നിയന്ത്രിക്കാൻ ശ്രമിച്ചു തുടങ്ങിയപ്പോഴേക്കു കോവിഡ് മഹാമാരി വന്നു. എങ്ങും ലോക്ക്ഡൗണും അടച്ചിടലുകളും. വീണ്ടും പലിശ താഴ്ത്തിയും പണലഭ്യത കൂട്ടിയും സാമ്പത്തിക ഉത്തേജനത്തിനു കേന്ദ്ര ബാങ്കുകൾ ഉത്സാഹിച്ചു. കമ്മിയുടെ പിടിയിലമർന്ന ഗവണ്മെൻ്റുകൾക്കു കാര്യമായി ഒന്നും ചെയ്യാൻ പറ്റില്ലായിരുന്നു.

ഇങ്ങനെ സുലഭമായി, നാമമാത്ര പലിശയിൽ ഒഴുകിയെത്തിയ പണം വിലക്കയറ്റം വർധിപ്പിച്ചു. ആദ്യം എല്ലാവരും അതു നല്ലതാണല്ലോ എന്നു കരുതി. പിന്നീടു റഷ്യയുടെ യുക്രെയ്ൻ ആക്രമണം വന്നപ്പോൾ ഇന്ധന പ്രതിസന്ധിയും ആഗോള ചരക്കുനീക്കവും വീണ്ടും ഉൽപന്ന വിലകളെ ഉയർത്തി. വിലക്കയറ്റം സാധാരണപരിധിയും സഹനപരിധിയും കടന്ന് കുതിച്ചു. ഇതിനു മുൻപു കേന്ദ്രബാങ്കുകൾ തെറ്റായ നിലപാട് എടുത്തതു സാഹചര്യം വഷളാക്കി.

കോവിഡ് കാലത്തു പലതിനും വില ഉയർന്നപ്പോൾ പല വ്യാഖ്യാനങ്ങൾ ഉണ്ടായി. ഉൽപന്നങ്ങളുടെയും മറ്റും ലഭ്യത പ്രശ്നമായതുകൊണ്ട് (Supply Disruptions) വില കൂടുന്നു എന്നായിരുന്നു പ്രധാന വ്യാഖ്യാനം. ശരികളേക്കാൾ കൂടുതൽ വേഗം തെറ്റുകൾ പരക്കുകയും സ്വീകരിക്കപ്പെടുകയും ചെയ്യും. ഇക്കാര്യത്തിലും അതു തന്നെ സംഭവിച്ചു. കുറേ സാധനങ്ങളുടെ കാര്യത്തിൽ ലഭ്യത പ്രശ്‌നമായിരുന്നു എന്നതു ശരി. പൊതുവേ അതു ശരിയായിരുന്നില്ല.