ശ്രീധര്‍ വെമ്പുവും ടോണി തോമസും ചേര്‍ന്ന് സ്ഥാപിച്ച ഇന്ത്യന്‍ കമ്പനിയാണ് സോഹോ കോര്‍പ്പറേഷഷന്‍ പ്രൈവറ്റ് ലിമിറ്റഡ്. ചെന്നൈയുടെ പ്രാന്തപ്രദേശത്തുള്ള ഒരു ചെറിയ അപ്പാര്‍ട്ട്‌മെന്റില്‍ നിന്നാണ് കമ്പനി പ്രവര്‍ത്തനം ആരംഭിച്ചത്. നെറ്റ്‌വര്‍ക്ക് മാനേജ്‌മെന്റ് മാത്രമായിരുന്നു തുടക്കത്തില്‍ നല്‍കിയിരുന്ന സേവനം.
വളര്‍ച്ചയുടെ കാലം
കുടുംബത്തില്‍ നിന്നും സുഹൃത്തുക്കളില്‍ നിന്നുമുള്ള ചില സഹായങ്ങള്‍ ഒഴികെ, ബിസിനസിന് ബാഹ്യ നിക്ഷേപം ഉണ്ടായിരുന്നില്ല. തുടക്കത്തില്‍, ടോണി കമ്പനിയുടെ സി.ഇ.ഒയും ചെയര്‍മാനുമായി പ്രവര്‍ത്തിച്ചു, ശ്രീധര്‍ മുഖ്യ പ്രചാരകനുമായിരുന്നു. കമ്പനി വില്‍ക്കുന്ന സാങ്കേതികവിദ്യ ശ്രീധര്‍ പ്രമോട്ട് ചെയ്യുകയും വിപണനം ചെയ്യുകയും ചെയ്തു.
സാന്‍ഫ്രാന്‍സിസ്‌കോയിലെ ബേ ഏരിയയില്‍ ധാരാളം നെറ്റ്‌വര്‍ക്കിംഗ്‌ കമ്പനികള്‍ ആരംഭിക്കുന്നതിനാല്‍ അദ്ദേഹം അവിടെ ഉപയോക്താക്കളെ സമീപിക്കാനും തുടങ്ങി. വൈകാതെ, അവര്‍ക്ക് ഉപയോക്താക്കളെ ലഭിക്കാന്‍ തുടങ്ങി. ആദ്യത്തെ ഉപയോക്താക്കളില്‍ ഒരാളായിരുന്നു സിസ്‌കോ. സോഫ്റ്റ്‌വെയര്‍ നന്നായി വില്‍ക്കാന്‍ തുടങ്ങി, അവര്‍ അത് സിലിക്കണ്‍വാലിയിലെ പല കമ്പനികള്‍ക്കും വില്‍ക്കുകയും ജപ്പാനില്‍ നല്ലൊരു വിപണി വികസിപ്പിക്കാനും കഴിഞ്ഞു. 2000ഓടെ, അവരുടെ കമ്പനി ഇന്ത്യയില്‍ 115 എന്‍ജിനിയര്‍മാരും യു.എസില്‍ 7 ആളുകളുമായി ഏകദേശം ഒരുകോടി ഡോളറിന്റെ ബിസിനസ്സുമായി വളര്‍ന്നു.
പ്രതിസന്ധിയും തിരിച്ചുകയറ്റവും
2001ല്‍ നെറ്റ്‌വർക്ക് മേഖലയിലെ സ്ഥാപങ്ങള്‍ വലിയ സാമ്പത്തിക പ്രതിസന്ധി നേരിട്ടു. പല കമ്പനികളും പ്രവര്‍ത്തനരഹിതമായി. ശ്രീധറിന്റെ കമ്പനിയും പ്രശ്നങ്ങളെ അഭിമുഖീകരിച്ചു. 2002ല്‍, കമ്പനിക്ക് വലിയ തിരിച്ചടിയുണ്ടായി. അവരുടെ ഉപയോ ക്താക്കള്‍ ഏകദേശം 150ല്‍ നിന്ന് 3 ആയി കുറഞ്ഞു, ഇത് വലിയ തകര്‍ച്ചയിലേക്ക് നയിച്ചു. ആ സമയത്ത്, ശ്രീധര്‍ കമ്പനിയുടെ സി.ഇ.ഒ ആയി ചുമതലയേറ്റു. അദ്ദേഹത്തിന് ഏറെ നിര്‍ണായക ഘട്ടമായി മാറി. ശ്രീധര്‍ കാര്യങ്ങള്‍ പോസിറ്റീവായി എടുക്കുകയും കമ്പനിക്ക് ഒരൊറ്റ സര്‍വീസ് കൊണ്ട് നിലനില്‍ക്കാന്‍ കഴിയില്ലെന്നും മനസിലാക്കി. ആ പ്രതിസന്ധി കമ്പനിയെ കീറിമുറിച്ചില്ല, പകരം അത് മുന്നോട്ടേക്ക് നീങ്ങാനുള്ള ശരിയായ ദിശ അവതരിപ്പിച്ചു.
അടുത്ത 2 വര്‍ഷത്തിനുള്ളില്‍ ശ്രീധര്‍ ഒരുപാട് മാറ്റങ്ങള്‍ കൊണ്ടുവന്നു. ഉപയോക്താക്കളിലേക്ക് നേരിട്ട് എത്തിച്ചേരുന്നതിനായി ഗൂഗിള്‍ പരസ്യങ്ങള്‍ക്കൊപ്പം, 2005ല്‍ അവര്‍ കമ്പനിയെ AdventNet എന്ന് പുനര്‍നാമകരണം ചെയ്യുകയും Zoho യൂണിവേഴ്‌സിറ്റി എന്നറിയപ്പെടുന്ന അവരുടെ സ്വന്തം അനൗപചാരിക സര്‍വകലാശാല ആരംഭിക്കുകയും ചെയ്തു. തൊഴില്‍ നല്‍കാനാണ് സര്‍വകലാശാല തുടങ്ങാന്‍ കാരണം.
സോഹോയുടെ ജീവനക്കാര്‍
നാസ്‌കോമിന്റെ അഭിപ്രായത്തില്‍, തൊഴിലില്ലായ്മയുടെ പ്രധാന കാരണം MNCയും വലിയ കമ്പനികളും ലോകത്തിലെ മികച്ച വിദ്യാഭ്യാസ സ്ഥാപനത്തിലെ ടോപ്പര്‍മാരെ നിയമിക്കുന്നതിന് താല്‍പ്പര്യപ്പെടുന്നു എന്നതാണ്. മറ്റുള്ളവര്‍ അവഗണിക്കുന്ന യുവ പ്രൊഫഷണലുകളെ നിയമിക്കാന്‍ ശ്രീധര്‍ തീരുമാനിച്ചു. കോളേജുകള്‍, ഡിഗ്രികള്‍, ഗ്രേഡുകള്‍ എന്നിവ മാത്രം പരിഗണിക്കാതെ മിടുക്കുള്ളവരെ തേടാന്‍ അദ്ദേഹം തീരുമാനിച്ചു. സാമ്പത്തിക കാരണങ്ങളാല്‍ പഠനം പാതിവഴിയില്‍ അവസാനിപ്പിക്കേണ്ടിവന്ന ആളുകളെപോലും അവര്‍ പരിഗണിച്ചു. തിരഞ്ഞെടുപ്പിന് ശേഷം, നിയമിച്ച ഉദ്യോഗാര്‍ത്ഥികളെ കോളേജ് ബിരുദധാരികളുടെ തലത്തില്‍ എത്തിക്കാനായി ഒമ്പത് മാസത്തെ പരിശീലനം നല്‍കി. കോഡ് ചെയ്യാനുള്ള ഈ ഉദ്യോഗാര്‍ത്ഥികളുടെ കഴിവ് മറ്റുള്ളവരോടൊപ്പമോ അതിലും മികച്ചതോ ആയിരുന്നു.
2009ല്‍ കമ്പനിയെ സോഹോ കോര്‍പ്പറേഷന്‍ എന്ന് പുനര്‍നാമകരണം ചെയ്തു. അപ്പോഴേക്കും, ചെലവേറിയ സോഫ്റ്റ് വെയറുകള്‍ക്ക് ലൈസന്‍സ് വാങ്ങുന്നതിനുപകരം, ഇന്റെര്‍നെറ്റുവഴി വാടകയ്ക്ക് സോഫ്റ്റ് വെയറുകൾ വാങ്ങി ഉപയോഗിക്കുന്ന രീതിയിലേക്ക് കമ്പനികള്‍ മാറിയിരുന്നു. സോഹോയും ഈ രീതി പിന്തുടര്‍ന്ന് സോഫ്റ്റ് വെയറുകൾ വാടകയ്ക്ക് നല്‍കാന്‍ തുടങ്ങി. വര്‍ഷങ്ങളായി, Zoho Corp മൂന്ന് പ്രധാന ഡിവിഷനുകളിലാണ് ഏര്‍പ്പെടുന്നത്, Zoho.com, WebNMS, ManageEngine.
Zoho Corpന്റെ ഇന്നത്തെ വരുമാനത്തിന്റെ പകുതിയും ManageEngineല്‍ നിന്നാണ്. കൊവിഡ് പൊട്ടിപ്പുറപ്പെട്ടതിന് ശേഷം സോഹോ മധുരയും തേനിയും ഉള്‍പ്പെടെ തെക്കന്‍ തമിഴ്നാട്ടിലെ ഗ്രാമപ്രദേശങ്ങളില്‍ ശാഖകള്‍ തുറക്കാന്‍ പദ്ധതിയിട്ടു. 2022 ഫെബ്രുവരിയില്‍, യു.എസിലെ ടെക്സസിലെ ന്യൂ ബ്രൗണ്‍ഫെല്‍സില്‍ സോഹോ ഒരു ഓഫീസ് തുറന്നു. ആ വര്‍ഷം ജൂലൈയില്‍ ആ സ്ഥലത്ത് 30 ജോലിക്കാരുണ്ടായിരുന്നു.
മുന്നോട്ട്
2022 ഏപ്രിലില്‍, റിയോ ഗ്രാന്‍ഡെ വാലിയില്‍, ടെക്സസിലെ മക്അല്ലനില്‍ സോഹോ ഒരു ഓഫീസ് തുറന്നു, ഇത് ടെക്സസിലെ കമ്പനിയുടെ മൂന്നാമത്തെ സ്ഥലമാണ്. 2022 ജൂലൈയില്‍ കമ്പനി മൂന്നാമത്തെ ആഫ്രിക്കന്‍ ഓഫീസായ നൈജീരിയയിലെ ലാഗോസില്‍ ഒരു ഓഫീസ് തുറക്കാനുള്ള പദ്ധതി പ്രഖ്യാപിച്ചു. വന്‍കിട ബിസിനസ്സുകള്‍ക്ക് മാത്രമായി ഉല്പാദിക്കപ്പെട്ടിരുന്ന ബിസിനസ് ടൂളുകള്‍ നല്‍കുന്ന സ്ഥാപനങ്ങള്‍ക്കിടയില്‍ ചെറുകിട ഇടത്തരം ബിസിനസ്സുകള്‍ക്കായി കുറഞ്ഞതുകയ്ക്ക് മികച്ച ബിസിനസ് ടൂളുകള്‍ നല്‍കുന്ന സ്ഥാപനമായി നമ്മുടെ അയല്‍സംസ്ഥാനത്ത് ആരംഭിച്ച സോഹോ ഇന്ന് 12,000ലധികം ജീവനക്കാരും 150ല്‍ അധികം രാജ്യങ്ങളിലായി 9 കോടി ഉപയോക്താക്കളും 12 ഡേറ്റ സെന്ററുകളും 55ല്‍ അധികം ഉല്പന്നങ്ങളുമായി മുന്നോട്ട് കുതിക്കുന്നു.
ലേഖകന്റെ വിവരങ്ങൾ :
Siju Rajan
Business and Brand Consultant
BRANDisam LLP
www.sijurajan.com
+91 8281868299
