ആത്മഹത്യയ്ക്ക് ഇന്‍ഷുറന്‍സ് പരിരക്ഷ ലഭിക്കുമോ?
ഇത് നിര്‍ണ്ണയിക്കുന്ന പ്രധാനപ്പെട്ട ഘടകം പോളിസിയുടെ നിബന്ധനകളാണ്
Photo : Canva
ഓരോ വര്‍ഷവും ഇന്ത്യയില്‍ നിരവധി പേരാണ് ആത്മഹത്യ ചെയ്യുന്നത്. നാഷണല്‍ ക്രൈം റെക്കോര്‍ഡ്‌സ് ബ്യൂറോയുടെ കണക്കുകള്‍ പ്രകാരം 2021 ല്‍ മാത്രം ഇന്ത്യയില്‍ 1,62,033 ആത്മഹത്യകള്‍ ഉണ്ടായിട്ടുണ്ട്. ദേശീയ ആത്മഹത്യാ നിരക്ക് 12 ആയി. അതായത് രാജ്യത്ത് ഒരു ലക്ഷം ആളുകളില്‍ 12 പേര്‍ ആത്മഹത്യ ചെയ്യുന്നുണ്ടെന്നാണ് കണക്ക്. കേരളത്തിലെ ആത്മഹത്യാ നിരക്ക് 5.8 ഉം. ഇത്തരത്തിലുണ്ടാകുന്ന മരണങ്ങള്‍ക്ക് ലൈഫ് ഇന്‍ഷുറന്‍സ് പോളിസികള്‍ ബാധകമാണോ? ഈ ചോദ്യത്തിനുള്ള ഉത്തരം നിരവധി ഘടകങ്ങളെ ആശ്രയിച്ചിരിക്കുന്നു.
Image:The incidence and rate of suicides during 2010-2021-@https://ncrb.gov.in/
നയത്തിന്റെ നിബന്ധനകള്‍
ഇന്ത്യയിലെ ഒരു ലൈഫ് ഇന്‍ഷുറന്‍സ് പോളിസിയില്‍ ആത്മഹത്യ പരിരക്ഷിക്കപ്പെടുന്നുണ്ടോ എന്ന് നിര്‍ണ്ണയിക്കുന്ന ആദ്യത്തേതും പ്രധാനപ്പെട്ടതുമായ ഘടകം പോളിസിയുടെ നിബന്ധനകളാണ്. ഇന്ത്യയിലെ മിക്ക ലൈഫ് ഇന്‍ഷുറന്‍സ് പോളിസികളിലും പോളിസി ഇഷ്യൂ ചെയ്തതിന് ശേഷം ഒരു നിശ്ചിത കാലയളവിനുള്ളില്‍ സംഭവിക്കുന്ന ആത്മഹത്യകള്‍ക്കുള്ള കവറേജ് ഒഴിവാക്കുന്ന ഒരു നിബന്ധനയുണ്ടാകും.
ലൈഫ് ഇന്‍ഷുറന്‍സ് പോളിസി എടുത്ത് ഒരു വര്‍ഷത്തിനുള്ളില്‍ (12 മാസങ്ങള്‍) പോളിസി ഉടമ ആത്മഹത്യ ചെയ്താല്‍ ഈ ഇന്‍ഷുറന്‍സ് തുക ക്ലെയിം ചെയ്യാനാകില്ലെന്ന് അലയന്‍സ് ഇന്‍ഷുറന്‍സ് ബ്രോക്കേഴ്‌സ് അസിസ്റ്റന്റ് വൈസ് പ്രസിഡന്റ് ഷിനിന്‍ സണ്ണി പറഞ്ഞു. പോളിസി എടുത്ത ശേഷം താമസിയാതെ ആത്മഹത്യ ചെയ്യുക എന്ന ഉദ്ദേശ്യത്തോടെ വ്യക്തികള്‍ ഒരു പോളിസി എടുക്കുന്നത് തടയാന്‍ രൂപകല്‍പ്പന ചെയ്തിട്ടുള്ളതാണ് ഈ നിനിബന്ധനയെന്നും അദ്ദേഹം പറഞ്ഞു.
അതിനാല്‍ പോളിസി എടുത്ത് ഒരു വര്‍ഷത്തിനുള്ളില്‍ ഉടമ ആത്മഹത്യ ചെയ്യുകയാണെങ്കില്‍ മരണ ആനുകൂല്യം നല്‍കില്ല. എന്നാല്‍ പോളിസി വാങ്ങിയ തീയതി മുതല്‍ ഒരു വര്‍ഷത്തിന് (12 മാസങ്ങള്‍ക്ക്) ശേഷം ആത്മഹത്യ സാധാരണയായി പരിരക്ഷിക്കപ്പെടുമെന്നും ഇതിന് മരണ ആനുകൂല്യം ലഭിക്കുമെന്നും ഷിനിന്‍ സണ്ണി പറഞ്ഞു. അതായത് ഒഴിവാക്കല്‍ കാലയളവ് അവസാനിച്ചതിന് ശേഷമാണ് ആത്മഹത്യയെങ്കില്‍ പോളിസിയില്‍ വ്യക്തമാക്കിയിട്ടുള്ള മരണ ആനുകൂല്യം നല്‍കും.
ആത്മഹത്യയുടെ സാഹചര്യങ്ങള്‍
ഇത്തരത്തിലുള്ള മരണം ഇന്ത്യയില്‍ ലൈഫ് ഇന്‍ഷുറന്‍സ് പോളിസിയില്‍ ഉള്‍പ്പെട്ടിട്ടുണ്ടോ എന്നതിനെ സ്വാധീനിക്കുന്ന മറ്റൊരു ഘടകം ആത്മഹത്യയെ ചുറ്റിപ്പറ്റിയുള്ള സാഹചര്യങ്ങളാണ്. ഉദാഹരണത്തിന് പോളിസി ഉടമ കവര്‍ച്ചയോ തീകൊളുത്തലോ പോലുള്ള ഒരു ക്രിമിനല്‍ പ്രവൃത്തിയില്‍ ഏര്‍പ്പെടുമ്പോള്‍ മരണപ്പെട്ടാല്‍, പോളിസി ഉടമ നിയമവിരുദ്ധമായ പ്രവര്‍ത്തനത്തില്‍ ഏര്‍പ്പെട്ടിരിക്കുകയാണെന്നും അതിനാല്‍ മരണ ആനുകൂല്യം നല്‍കേണ്ടതില്ലെന്നും ഇന്‍ഷുറന്‍സ് കമ്പനിയ്ക്ക് വാദിക്കാം.
ഇത് കൂടാതെ പോളിസി ഉടമ മയക്കുമരുന്ന് അല്ലെങ്കില്‍ മദ്യത്തിന്റെ ലഹരിയില്‍ ആത്മഹത്യ ചെയ്താല്‍ പോളിസി ഉടമ ശരിയായ മാനസികാവസ്ഥയിലല്ലെന്നും അതിനാല്‍ മരണ ആനുകൂല്യം നല്‍കേണ്ടതില്ലെന്നും ഇന്‍ഷുറന്‍സ് കമ്പനിയ്ക്ക് വാദിക്കാം.
എന്നാല്‍ ജോലി സംബന്ധമായി ഗ്രൂപ്പ് ഗ്രാറ്റുവിറ്റി, ഗ്രൂപ്പ് പെന്‍ഷന്‍ പോലുള്ള ചില പോളിസികളുണ്ട്. ഇതില്‍ ഒരു വര്‍ഷത്തിനുള്ളില്‍ ഉടമ ആത്മഹത്യ ചെയ്യുകയാണെങ്കില്‍ മരണ ആനുകൂല്യം നല്‍കില്ല എന്ന നിബന്ധന ബാധകമല്ലെന്ന് ഷിനിന്‍ സണ്ണി പറഞ്ഞു. തൊഴിലിടങ്ങളില്‍ ജീവനക്കാര്‍ അഭിമുഖീകരിക്കുന്ന മാനാസിക പിരിമുറുക്കം, തൊഴിലിടങ്ങളിലെ പീഢനം തുടങ്ങി തൊഴിലുമായി ബന്ധപ്പെട്ട പ്രശ്‌നങ്ങള്‍ മൂലം ജീവനക്കാരന്‍ ആത്മഹത്യ ചെയ്താല്‍ അത് തൊഴലുടമയുടെ ബാധ്യതയായി മാറും.
നോണ്‍ ലൈഫ് ഇന്‍ഷുറന്‍സില്‍
ഇനി മെഡിക്ലെയിം, പേഴ്‌സണല്‍ ആക്‌സിഡന്റ് പോളിസി തുടങ്ങി നോണ്‍ ലൈഫ് ഇന്‍ഷുറന്‍സിന്റെ കാര്യമെടുക്കുകയാണെങ്കില്‍ ഇവിടെ വ്യക്തി സ്വമേധയാ വരുത്തിവച്ച അപകടമാണോ എന്ന് അന്വേഷിക്കുമെന്ന് ഷിനിന്‍ സണ്ണി പറഞ്ഞു. അപകടം അങ്ങനെയാണ് സംഭവിച്ചതെങ്കില്‍ ഇന്‍ഷുറന്‍സ് ലഭിക്കില്ലെന്നും അദ്ദേഹം പറഞ്ഞു.
ഉദാഹരണത്തിന് ഒരു പോളിസിയുടമ വിഷം കഴിച്ച് ആത്മഹത്യയ്ക്ക് ശ്രമിക്കുകയും ശ്രമം പരാജയപ്പെട്ട് ആശുപത്രിയിലാകുമ്പോള്‍ ചികിത്സയ്ക്കായി ഇന്‍ഷുറന്‍സ് പരിരക്ഷ ലഭിക്കില്ല. ഈ സാഹചര്യത്തില്‍ സ്വമേധയാ വരുത്തിയ അപകടമാണെന്ന് വിലയിരുത്തി ഈ ഇന്‍ഷുറന്‍സ് ക്ലെയിം പോളിസിയുടമയ്ക്ക് നിഷേധിക്കും.
സംസ്ഥാന നിയമങ്ങള്‍
ലൈഫ് ഇന്‍ഷുറന്‍സ് പോളിസി ഇഷ്യൂ ചെയ്ത സംസ്ഥാനത്തിന്റെ നിയമങ്ങള്‍ ഇന്ത്യയില്‍ ഒരു ആത്മഹത്യാ മരണം പോളിസിയുടെ പരിധിയില്‍ വരുമോ എന്നതിനെ ബാധിച്ചേക്കാം. ഇന്ത്യയിലെ ഓരോ സംസ്ഥാനത്തിനും ലൈഫ് ഇന്‍ഷുറന്‍സ് പോളിസികളും ആത്മഹത്യാ ഒഴിവാക്കല്‍ വ്യവസ്ഥകളും സംബന്ധിച്ച് അതിന്റേതായ നിയമങ്ങളുണ്ട്. എന്നിരുന്നലും അടച്ച പ്രീമിയത്തില്‍ നിന്ന് കുറച്ച് തുക (നിബന്ധന പ്രകാരം) തിരികെ നല്‍കി വൈകാരികമായി തകര്‍ന്ന കുടുംബാംഗങ്ങളെ സഹായിക്കുക എന്നതാണ് ആത്മഹത്യാ മരണ പരിരക്ഷ നല്‍കാനുള്ള ഏക കാരണം എന്ന് കരുതാം.
പ്രിയപ്പെട്ടവര്‍ക്ക് സാമ്പത്തിക പരിരക്ഷ
ഓരോ ലൈഫ് ഇന്‍ഷുറന്‍സ് പോളിസിയും വ്യത്യസ്തമാണെന്നും നിബന്ധനകളും വ്യവസ്ഥകളും ഒരു പോളിസിയില്‍ നിന്ന് മറ്റൊന്നിലേക്ക് കാര്യമായി വ്യത്യാസപ്പെടാമെന്നും നാം മനസ്സിലാക്കേണ്ടതുണ്ട്. അതിനാല്‍ ഏതെങ്കിലും ലൈഫ് ഇന്‍ഷുറന്‍സ് പോളിസി വാങ്ങുന്നതിന് മുമ്പ് അതിന്റെ നിബന്ധനകള്‍ ശ്രദ്ധാപൂര്‍വ്വം വായിക്കുകയും മനസ്സിലാക്കുകയും ചെയ്യേണ്ടത് അത്യാവശ്യമാണ്. കൂടാതെ എന്തെങ്കിലും ആശങ്കകള്‍ ഉണ്ടെങ്കില്‍ ഒരു ഇന്‍ഷുറന്‍സ് പ്രൊഫഷണലിന്റെ ഉപദേശം തേടണം. ലൈഫ് ഇന്‍ഷുറന്‍സിന്റെ പ്രാഥമിക ലക്ഷ്യം പ്രിയപ്പെട്ടവര്‍ക്ക് സാമ്പത്തിക പരിരക്ഷ നല്‍കുക എന്നതാണ് എന്നുള്ള കാര്യം ഓര്‍ക്കണം.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. Toll free helpline number: 1056, 0471-2552056).