സ്വര്‍ണമോ ഓഹരി വിപണിയോ, 2023ല്‍ കൂടുതല്‍ നേട്ടം നല്‍കിയ നിക്ഷേപമേത്‌?
പവന് ₹47,000 വരെ തൊട്ട സ്വര്‍ണം ഒരു വര്‍ഷത്തില്‍ നേടിയത് 16 ശതമാനത്തിലധം വളര്‍ച്ച
Image by Canva
നിക്ഷേപ ലോകത്തെ സംബന്ധിച്ച് ഏറെ സംഭവ ബഹുലമായ വര്‍ഷമായിരുന്നു 2023. വലിയ വീഴ്ചകളും കയറ്റിറക്കങ്ങളും ദേശീയവും അന്തര്‍ദേശീയവുമായ പ്രശ്‌നങ്ങളുമൊക്കെ നിറഞ്ഞു നിന്ന വര്ഷം. പണപ്പെരുപ്പവും പലിശ ഭീതിയും റഷ്യ-യുക്രെയിന്‍, ഇസ്രായേല്‍-ഹമാസ് യുദ്ധങ്ങളുമൊക്കെ ആശങ്കയും ഭീഷണിയും സമ്മാനിച്ചെങ്കിലും റെക്കോഡുകള്‍ മറികടന്ന് ഓഹരി വിപണിയും സ്വര്‍ണ വിപണിയും പരസ്പരം മത്സരിച്ച് മുന്നേറുന്ന കാഴ്ചയാണുണ്ടായത്. നേട്ടത്തിന്റെ കണക്കെടുക്കുമ്പോള്‍ പക്ഷേ ഇതിലേതാണ് മെച്ചമെന്നാണ് നിക്ഷേപകര്‍ ഇപ്പോള്‍ നോക്കുന്നത്.
2023ലെ സെൻസെക്സ്, നിഫ്റ്റി എന്നിവയുടെ നേട്ടം
സാധാരണ ഓഹരി വിപണിയുടെ പ്രകടനം വിലയിരുത്താന്‍ നിഫ്റ്റിയും സെന്‍സെക്‌സുമാണ് നോക്കാറുള്ളത്. എന്നാല് ഈ വര്ഷം അത് മാത്രം നോക്കുന്നത് തെറ്റിദ്ധരിപ്പിക്കുന്നതാകും. വിശാല വിപണിയും മികച്ച വളര്‍ച്ചയാണ് കാഴ്ചവച്ചത്. നിഫ്റ്റി മിഡ് ക്യാപ് 100 ഈ വര്‍ഷത്തിന്റെ തുടക്കത്തിലെ 31,509.10 പോയിന്റില്‍ നിന്ന് 46.57 ശതമാനം ഉയര്‍ന്ന് 31,509 പോയിന്റിലെത്തി. ഓഹരി വിപണിയില്‍ വ്യാപാരം നടത്തുന്ന മിഡ്ക്യാപ് ഓഹരികളുടെ നേട്ടം കാണിക്കുന്ന സൂചികയാണ് നിഫ്റ്റി മിഡ് ക്യാപ് 100. സ്‌മോള്‍ ക്യാപ് 100 ആകട്ടെ 55.62 ശതമാനം ഉയര്‍ന്ന് 15,143.65 പോയിന്റിലും.
സ്വര്‍ണത്തെ സംബന്ധിച്ച് കഴിഞ്ഞ മൂന്ന് വര്‍ഷത്തെ ഏറ്റവും മികച്ച വര്‍ഷമായിരുന്നു 2023. യു.എസില്‍ അടുത്ത വര്‍ഷമാദ്യം പലിശ നിരയ്ക്ക് കുറയ്ക്കുമെന്ന പ്രതീക്ഷകളും യുക്രെയിന്‍ യുദ്ധവും ഗള്‍ഫ് രാജ്യങ്ങളിലെ സംഘര്‍ഷാവസ്ഥയുമൊക്കെയാണ് സുരക്ഷിത നിക്ഷേപമെന്ന നിലയില്‍ സ്വര്‍ണത്തിന്റെ ഡിമാന്‍ഡ് ഉയര്‍ത്തിയത്.
സ്‌പോട്ട് ഗോള്‍ഡ് ഈ വര്ഷം ഇത് വരെ 14 ശതമാനം വളര്‍ച്ചയാണ് നേടിയത്. 2020 മുതലുള്ള ഏറ്റവും ഉയര്‍ന്ന വാര്‍ഷിക നേട്ടമാണിത്.
2023ലെ വിവിധ മാസങ്ങളിലെ സ്വര്‍ണവില
(Past performance is not indicative of future returns. Equity investing is subject to market risk. Always do your own research or consult a financial expert before investing)