കരടികളുടെ മുന്നേറ്റത്തെ ഭയപ്പെടാതെ കാളകൾ; ഏഷ്യൻ വിപണികൾ കയറ്റത്തിൽ; വളർച്ചാപ്രതീക്ഷ താഴ്ത്തി ഏജൻസികൾ

വീണ്ടും കരടികൾക്കു മേൽക്കൈ. ചൈനയിലെ കോവിഡ് വ്യാപനം തുടരുന്നതും അമേരിക്കയിലെ പലിശ വർധന നീണ്ടു നിൽക്കും എന്നതും വിപണികളെ താഴ്ചയിലേക്കു നയിച്ചു. ഇന്ത്യയും ഇക്കൊല്ലത്തെ ജിഡിപി വളർച്ച ഏഴു ശതമാനത്തിനു താഴെയാകുമെന്ന വിലയിരുത്തലും വിപണിമനോഭാവം വിപരീതമാകാൻ കാരണമാണ്. അഞ്ചു ലക്ഷം കോടി ഡോളറിൻ്റെ സമ്പദ്ഘടന 2026-27ലേ സാധ്യമാകൂ എന്നതും വിപണിയെ സഹായിക്കുന്നതല്ല. എങ്കിലും ഇതൊരു ഹ്രസ്വകാല നെഗറ്റീവ് മാത്രമാണെന്നും വീണ്ടും ഉയർച്ചയുടെ പാതയിലേക്കു സൂചികകൾ എത്തുന്നതിനു താമസമില്ലെന്നും കരുതുന്നവരാണ് ഏറെ. നിഫ്റ്റിക്കു 17,900-18,100 മേഖലയിൽ നിന്നു തിരിച്ചു കുതിക്കാനാകുമെന്ന് അവർ വിശ്വസിക്കുന്നു. ഇന്ന് ഏഷ്യൻ വിപണികൾ ഉണർവോടെ തുടങ്ങിയതും പ്രതീക്ഷ പകരുന്നു.