സാങ്കേതിക വിശകലനം; നിഫ്റ്റിയുടെ നീക്കം ഇനി എങ്ങോട്ട്?

നിഫ്റ്റി ഉയരാനുള്ള പ്രവണതയോടെ 18,420.45 - ല്‍ നല്ല നേട്ടത്തില്‍ ക്ലോസ് ചെയ്തു.

നിഫ്റ്റി 18,288.10-ല്‍ പോസിറ്റീവ് പ്രവണതയോടെ വ്യാപാരം ആരംഭിച്ചു, കൂടുതല്‍ മുകളിലേക്ക് നീങ്ങുന്നതിന് മുമ്പ് 18,244.60 എന്ന താഴ്ന്ന നിലവാരത്തിലെത്തി. തുടര്‍ന്ന് സൂചിക ഉയര്‍ന്ന് 18,431.70 എന്ന ഇന്‍ട്രാഡേയിലെ ഉയര്‍ന്ന നിലവാരം പരീക്ഷിച്ചു, ഒടുവില്‍ 151.45 (0.83%) നേട്ടത്തോടെ 18,420.45 ല്‍ ക്ലോസ് ചെയ്തു. ഐടിയും പൊതുമേഖലാ ബാങ്കും ഒഴികെയുള്ള എല്ലാ മേഖലകളും നല്ല നേട്ടത്തില്‍ ക്ലോസ്ചെയ്തു.

ഓട്ടോ, എഫ്എംസിജി, മെറ്റല്‍, ധനകാര്യ സേവനങ്ങള്‍ എന്നിവയാണ് കൂടുതല്‍ നേട്ടമുണ്ടാക്കിയത്. 1243 ഓഹരികള്‍ ഉയര്‍ന്നു, 957 എണ്ണം ഇടിഞ്ഞു, 128 എണ്ണം മാറ്റമില്ലാതെ തുടര്‍ന്നു.

ആക്കം സൂചകങ്ങളും ഹ്രസ്വകാല മൂവിംഗ് ശരാശരികളും നെഗറ്റീവ് പ്രവണത സൂചിപ്പിക്കുന്നു. പക്ഷേ, സൂചിക ഡെയ്ലി ചാര്‍ട്ടില്‍ ഒരു വെളുത്ത മെഴുകുതിരി രൂപപ്പെടുത്തി ദിവസത്തിലെ ഉയര്‍ന്ന നിലവാരത്തിനടുത്തായി ക്ലോസ് ചെയ്തു. സൂചിക 18400ന് മുകളില്‍ ട്രേഡ് ചെയ്ത് നില നിന്നാല്‍ പുള്‍ബാക്ക് റാലി ഇന്നും തുടരാം.

ഉയരുമ്പോള്‍ സൂചികയ്ക്ക് 18,500 ല്‍ ഹ്രസ്വകാല പ്രതിരോധമുണ്ട്. 18,400 ലെവലിന് താഴെ, അല്‍പ്പം നെഗറ്റീവ് പ്രവണത പ്രതീക്ഷിക്കാം. താഴുമ്പോള്‍ 18,244 എന്ന സമീപകാല താഴ്ന്ന നില സൂചികയ്ക്ക് ഇന്‍ട്രാഡേ പിന്തുണയായി പ്രവര്‍ത്തിക്കുന്നു. സൂചിക ഈ നിലയ്ക്ക് താഴെ ട്രേഡ് ചെയ്തു നില നിന്നാല്‍ വരും ദിവസങ്ങളില്‍ സൂചിക 18,000 എന്ന അടുത്ത പിന്തുണ പരീക്ഷിച്ചേക്കാം.

യുഎസ് വിപണികള്‍ താഴ്ന്നു ക്ലോസ് ചെയ്‌തെങ്കിലും യൂറോപ്യന്‍ വിപണി നേട്ടത്തിലായിരുന്നു. ഏഷ്യന്‍ വിപണികള്‍ സമ്മിശ്ര ചിത്രമാണു നല്‍കുന്നത്. എസ്ജിഎക്സ് നിഫ്റ്റി 18,462 ലെവലിലാണ്. ഇത് മുന്‍ ക്ലോസിംഗിനേക്കാള്‍ ഉയര്‍ന്നതാണ്. നിഫ്റ്റി ഇന്ന് കാര്യമായ മാറ്റമില്ലാതെ വ്യാപാരം തുടങ്ങാം. വിദേശ നിക്ഷേപ സ്ഥാപനങ്ങള്‍ 538.10 കോടിയുടെ ഓഹരികള്‍ വിറ്റു. സ്വദേശി നിക്ഷേപ സ്ഥാപനങ്ങള്‍ 687.38 കോടിയുടെ ഓഹരികള്‍ വാങ്ങി.

ഹ്രസ്വകാല പ്രവണത - താഴേക്കു ചായ്‌വ്

ബാങ്ക് നിഫ്റ്റി 194.25 പോയിന്റ് ഉയര്‍ന്ന് 43,413.75 ലാണ് ക്ലോസ് ചെയ്തത്. മൊമെന്റം സൂചകങ്ങള്‍ നെഗറ്റീവ് പ്രവണത സൂചിപ്പിക്കുന്നു, എന്നാല്‍ സൂചിക ദൈനംദിന ചാര്‍ട്ടില്‍ ചെറിയ വെളുത്ത മെഴുകുതിരി രൂപപ്പെടുത്തി ദിവസത്തിന്റെ ഉയര്‍ന്ന നിലയ്ക്കു സമീപം ക്ലോസ് ചെയ്തു. മുന്നേറ്റം തുടരാന്‍ സൂചിക 43,450-ന് മുകളില്‍ വ്യാപാരം നടത്തി നിലനിര്‍ത്തണം. അല്ലാത്തപക്ഷം ഇന്ന് നേരിയ താഴ്ച പ്രതീക്ഷിക്കാം. താഴുമ്പോള്‍ സൂചികയ്ക്ക് 43,000-ല്‍ ഹ്രസ്വകാല പിന്തുണയുണ്ട്. ഈ ലെവലിന് താഴെയാണ് സൂചിക ക്ലോസ് ചെയ്യുന്നതെങ്കില്‍ ട്രെന്‍ഡ് താഴോട്ടാകും.