യുണീക്ക് ഹെല്ത്ത് ഐഡി കാര്ഡ് രജിസ്ട്രേഷന് മുതല് അറിയേണ്ടതെല്ലാം
വാക്സിന് സര്ട്ടിഫിക്കറ്റ് പരിശോധിച്ചാല് നിങ്ങളുടെ യുണീക്ക് ഹെല്ത്ത് ഐഡി നമ്പര് കാണാവുന്നതാണ്. ഈ നമ്പര് ഉപയോഗിച്ച് നിങ്ങള്ക്ക് ഹെല്ത്ത് ഐഡി കാര്ഡ് ജനറേറ്റ് ചെയ്യാവുന്നതാണ്.
കേന്ദ്ര സര്ക്കാരിന്റെ ആയുഷ്മാന് ഭാരത് ഡിജിറ്റല് മിഷന് ഇന്നലെ തുടക്കമായി. പദ്ധതിയുടെ ഭാഗമായി എല്ലാ പൗരന്മാര്ക്കും 14 അക്ക ആരോഗ്യ തിരിച്ചറിയല് നമ്പര് ലഭ്യമാകും. യുണീക്ക് ഹെല്ത്ത് ഐഡി എന്നറിയപ്പെടുന്ന ഈ നമ്പറിലൂടെ ഓരോ പൗരന്റേയും സമഗ്രമായ ആരോഗ്യ വിവരങ്ങള് അറിയാന് സാധിക്കും. മൊബൈല് ആപ്ലിക്കേഷന് ഉപയോഗിച്ച് വ്യക്തിഗത വിവരങ്ങള് ഉള്പ്പെടുത്താം.
ഭാവിയില് സര്ക്കാരിന്റെ ആരോഗ്യ സേവനങ്ങള് ഹെല്്ത്ത് ഐഡി അടിസ്ഥാനപ്പെടുത്തി ആകും ലഭ്യമാവുക. നിലവില് കൊവിഡ് വാക്സിന് എടുത്ത എല്ലാവര്ക്കും യുണീക്ക് ഹെല്ത്ത് ഐഡി ലഭ്യമായിട്ടുണ്ട്. വാക്സിന് സര്ട്ടിഫിക്കറ്റ് പരിശോധിച്ചാല് നിങ്ങളുടെ യുണീക്ക് ഹെല്ത്ത് ഐഡി നമ്പര് കാണാവുന്നതാണ്. വ്യക്തികള്ക്ക് പുറമെ ഡോക്ടര്മാര്, ആശുപത്രികള്, ലാബുകള് തുടങ്ങിയവയ്ക്കും പ്രത്യേകം രജിസ്ട്രേഷന് ഉണ്ടാകും.
പരിശോധന ഫലങ്ങള് ലഭ്യമാകുന്നത് മുതല് കണ്സള്ട്ടേഷന്, ഇ-ഫാര്മസി സേവനങ്ങള് വരെ ഈ ഹെല്ത്ത് ഐഡി കാര്ഡ് വഴി ലഭ്യമാകും. ആരൊക്കെയായി എത്രസമയം ഹെല്ത്ത് ഐഡി കാര്ഡിലെ വിവരങ്ങള് പങ്കുവെക്കണമെന്നൊക്കെ കാര്ഡ് ഉടമയ്ക്ക് തീരുമാനിക്കാനാവും. കഴിഞ്ഞ സ്വതന്ത്യദിനത്തില് പ്രധാനമന്ത്രി പ്രഖ്യാപിച്ച പദ്ധതി പരീക്ഷണാടിസ്ഥാനത്തില് ആറ് കേന്ദ്രഭരണ പ്രദേശങ്ങളില് നടപ്പാക്കി വരുകയായിരുന്നു.
ഹെല്ത്ത് ഐഡി എങ്ങനെ ലഭ്യമാകും
- healthid.ndhm.gov.in എന്ന വെബ്സൈറ്റിലൂടെ നിങ്ങള്ക്ക് ഹെല്ത്ത് ഐഡി ജനറേറ്റ് ചെയ്യാവുന്നതാണ്. ഇതിനായി genarate your health id എന്ന ഓപ്്ഷനില് ക്ലിക്ക് ചെയ്യാം. തുടര്ന്ന് ആധാര് നമ്പറോ മൊബൈല് നമ്പറോ ഉുയോഗിച്ച് രജിസ്റ്റര് ചെയ്യാവുന്നതാണ്.
- അല്ലെങ്കില് ഇതേ വെബ്സൈറ്റിലെ ലോഗിന് ഓപ്ഷനില് നിങ്ങളുടെ കൊവിഡ് വാക്സിന് സര്ട്ടിഫിക്കറ്റില് ഉള്ള യുണീക്ക് ഹെല്ത്ത് ഐഡി നമ്പര് ഉപയോഗിച്ച് ലോഗിന് ചെയ്യാവുന്നതാണ്. തുടര്ന്ന് നിങ്ങള്ക്ക് ഹെല്ത്ത് ഐഡി ജനറേറ്റ് ചെയ്യാം
- ശേഷം വെബ്സൈറ്റില് ഇടതു വശത്തു കാണുന്ന ഓപ്ഷനുകളില് നിന്ന് എഡിറ്റ് പ്രൊഫൈല് സെലക്ട് ചെയ്ത് നിങ്ങളുടെ ജനന തിയതി, ഇമെയില്, വിലാസം, പിഎച്ച് ആര് വിലാസം( പേഴ്സണല് ഹെല്ത്ത് റെക്കോര്ഡ്) എന്നിവ നകുക. ശേഷം സെറ്റ് പാസ് വേര്ഡ് ഓപ്ഷന് തെരഞ്ഞെടുത്ത് പാസ് വേര്ഡും നല്കാവുന്നതാണ്
- തുടര്ന്ന് ആരോഗ്യ രേഖകള് ബന്ധിപ്പിക്കാന് ndhm health record app ഉപയോഗിക്കണം. പിഎച്ച് ആര് വിലാസം, പാസ് വേര്ഡ് എന്നിവ നല്കി ലോഗിന് ചെയ്യാം.
- ആരോഗ്യ രേഖകള് വ്യക്തികള്ക്ക് സ്കാന് ചെയ്ത് സൂക്ഷിക്കാനും തെരഞ്ഞെടുത്ത ആശുപത്രികളില് നിന്ന് നേരിട്ട് ലിങ്ക് ചെയ്യാനും ഉള്ള സൗകര്യം ഉണ്ടാകും.