വീണ്ടും നിക്ഷേപവുമായി കെ.കെ.ആര്; റിലയന്സ് റീറ്റെയ്ലിന്റെ വിപണി മൂല്യം ₹8.36 ലക്ഷം കോടി
കെ.കെ.ആറിന്റെ മൊത്തം ഓഹരി വിഹിതം 1.42 ശതമാനമാകും
ആഗോള നിക്ഷേപക സ്ഥാപനമായ കെ.കെ.ആര് വീണ്ടും റിലയന്സ് ഇന്ഡസ്ട്രീസിന്റെ റീറ്റെയ്ല് വിഭാഗമായ റിലയന്സ് റീറ്റെയ്ല് വെഞ്ച്വേഴ്സില് (Reliance Retail Ventures /RRVL) നിക്ഷേപമുയര്ത്തുന്നു. 2,069.5 കോടി രൂപയ്ക്ക് 0.25 ഓഹരികളാണ് കെ.കെ.ആര് സ്വന്തമാക്കുക. ഇതോടെ റിലയന്സ് റീറ്റെയ്ലിലെ കെ.കെ.ആറിന്റെ മൊത്തം ഓഹരി വിഹിതം 1.42 ശതമാനമാകും.
മുകേഷ് അംബാനിയുടെ മകള് ഇഷ അംബാനിയാണ് റിലയന്സ് റീറ്റെയ്ലിന് നേതൃത്വം നല്കുന്നത്. റിലയന്സ് റീറ്റെയ്ല് വെഞ്ച്വേഴ്സ് ലിമിറ്റഡില് 88 ശതമാനം ഓഹരികളും റിലയന്സ് ഇന്ഡസ്ട്രീസിനാണ്. 11 ശതമാനം ഓഹരികള് ആഗോള ഫണ്ടുകള്ക്കും ഒരു ശതമാനം ചെറുകിട ഓഹരിയുടമകള്ക്കുമുണ്ട്.
രാജ്യത്തെമ്പാടുമായി റിലയന്സ് റീറ്റെയ്ലിന് 26.70 കോടി ഉപയോക്താക്കളാണുള്ളത്. 18,500 ലധികം സ്റ്റോറുകളും ഗ്രോസറി, കണ്സ്യൂമര് ഇലക്ട്രിക്കല്സ്, ഫാഷന്, ലൈഫ് സ്റ്റൈല്, മെഡിസിന് എന്നിങ്ങനെ വിവിധ വിഭാഗങ്ങൾക്കായി ഇ-കൊമേഴ്സ് പ്ലാറ്റ് ഫോമുകളുമുണ്ട്.