ഏറ്റവും മികച്ച യൂബര്‍ ഡ്രൈവര്‍മാര്‍ എറണാകുളത്ത്, യൂബർ ഓട്ടോക്കും ആവശ്യക്കാരേറെ, കൂടുതല്‍ യാത്രക്കാരുളളത് ഡൽഹിയില്‍

ഓണ്‍ലൈന്‍ ടാക്സി ഉപയോഗിക്കുന്നവരുടെ എണ്ണം ദിവസവും വര്‍ധിച്ചു വരികയാണ്. പരമ്പരാഗത ഓട്ടോ, ടാക്സി സേവനങ്ങളെക്കാള്‍ പൈസ കുറവാണ് എന്നതാണ് ഉപയോക്താക്കളെ പ്രധാനമായും ഇതിലേക്ക് ആകര്‍ഷിക്കുന്നത്. ഓല, യാത്രി, യൂബര്‍ തുടങ്ങിയവയാണ് ഓണ്‍ലൈന്‍ ടാക്സി രംഗത്ത് കേരളത്തില്‍ കൂടുതലായി സജീവമായുളളത്.

ഈ അവസരത്തിലാണ് ഇന്ത്യക്കാര്‍ 2024 ല്‍ യൂബര്‍ സേവനങ്ങള്‍ പ്രയോജനപ്പെടുത്തിയ കണക്കുകള്‍ പ്രസക്തമാകുന്നത്. കഴിഞ്ഞ കൊല്ലം 920 കോടി കിലോമീറ്ററാണ് ഇന്ത്യയില്‍ യൂബര്‍ ഓടിയത്. കൂടുതല്‍ പരിസ്ഥിതി സൗഹാര്‍ദമായ ഇലക്ട്രിക് വാഹനങ്ങളും ഈ രംഗത്തേക്ക് കടന്നു വരുന്നുണ്ട്. ഇ.വി കളിലാണ് 17 കോടി കിലോമീറ്റര്‍ യൂബര്‍ ഓടിയെന്നതും ശ്രദ്ധേയമാണ്.

യൂബര്‍ സേവനങ്ങളില്‍ 2024 ൽ ഏറ്റവും കൂടുതൽ യാത്രക്കാര്‍ തിരഞ്ഞെടുത്തത് യൂബർ ഓട്ടോ ആണ്. തൊട്ടുപിന്നിലായി യൂബര്‍ ഗോ യും ഉണ്ട്.

യാത്രക്കാര്‍ യൂബര്‍ ഡ്രൈവര്‍മാര്‍ക്ക് ഏറ്റവും കൂടുതല്‍ റേറ്റിംഗ് നല്‍കിയത് കേരളത്തിലാണ്. ഏകദേശം 95.8 ശതമാനം യാത്രകൾക്കും കൊച്ചിയിൽ 5 സ്റ്റാർ റേറ്റിംഗ് ആണ് ലഭിച്ചത്. കൊച്ചിയിലെ യൂബർ ഉപയോക്താക്കള്‍ 5 ൽ ശരാശരി 4.90 റേറ്റിംഗാണ് ഡ്രൈവർമാര്‍ക്ക് നൽകിയത്.

ഡ്രൈവര്‍ റേറ്റിംഗിൽ ചണ്ഡീഗഢ് രണ്ടാം സ്ഥാനത്തും (4.816), പൂനെ മൂന്നാം സ്ഥാനത്തും (4.815) എത്തി. ഏറ്റവും കുറഞ്ഞ ഡ്രൈവര്‍ റേറ്റിംഗ് കൊൽക്കത്തയ്ക്കാണ് (4.65). തൊട്ടുപിന്നിലായുളളത് മുംബൈ (4.711), ഡൽഹി-എൻസിആർ (4.714) എന്നീ നഗരങ്ങളാണ്.

ജോലി ആവശ്യങ്ങൾക്കായി ഏറ്റവും കൂടുതൽ യൂബർ ഉപയോഗിച്ച നഗരം ബാംഗ്ലൂരാണ്. ഓഫീസ് സമയ യാത്രകളിൽ ഏറ്റവും കൂടുതൽ ബുക്ക് ചെയ്തതും ബാംഗ്ലൂരിലാണ്.

വൈകുന്നേരം 6 മണിക്കും 7 മണിക്കും ഇടയിലാണ് ഭൂരിഭാഗം യൂബർ യാത്രകളും ബുക്ക് ചെയ്തിരിക്കുന്നത്. ഏറ്റവും കൂടുതല്‍ ആളുകള്‍ ബുക്ക് ചെയ്ത ദിവസം വെള്ളിയാഴ്ചയാണ്. കഴിഞ്ഞ കൊല്ലം ഏറ്റവും കൂടുതൽ റൈഡുകൾ ബുക്ക് ചെയ്ത മാസം ഡിസംബറാണ്.

ദുർഗാ പൂജ, നവരാത്രി ഉത്സവത്തോടനുബന്ധിച്ച് ഒക്ടോബർ 9 നാണ് ഏറ്റവും കൂടുതൽ റൈഡുകൾ ബുക്ക് ചെയ്യപ്പെട്ടിരിക്കുന്നത്. യൂബർ ഇന്റർസിറ്റി സേവനം ഉപയോഗിച്ച് 2024 ൽ ഏറ്റവും കൂടുതൽ ആളുകൾ സന്ദർശിച്ച വിനോദസഞ്ചാര കേന്ദ്രം ആഗ്രയിലെ താജ്മഹലാണ്.

യൂബറിൽ യാത്ര ചെയ്യപ്പെട്ട ഏറ്റവും ദൈർഘ്യമേറിയ ഇന്റർസിറ്റി യാത്രകൾ നോയിഡ - സസാറാം - നോയിഡ (1747 കി.മീ), ഡൽഹി - അയോധ്യ - ഡൽഹി (1464 കി.മീ), നോയിഡ - ഗോരഖ്പൂർ - നോയിഡ (1458 കി.മീ) എന്നിവയാണ്.

കഴിഞ്ഞ വർഷം ഏറ്റവും കൂടുതൽ യൂബർ യാത്രകൾ ബുക്ക് ചെയ്തത് ഡൽഹി-എൻസിആർ, ബംഗളൂരു, ഹൈദരാബാദ്, മുംബൈ, പൂനെ, കൊൽക്കത്ത എന്നിവിടങ്ങളിലാണ്. രാത്രി വൈകിയുള്ള യാത്രകൾക്ക് മുംബൈയാണ് ഏറ്റവും കൂടുതൽ യൂബര്‍ റൈഡുകള്‍ ബുക്ക് ചെയ്തത്.