ദീപാവലി ദിനത്തിലും റെക്കോഡിട്ട് സ്വര്‍ണം, സംസ്ഥാനത്ത് മൂന്ന് ദിവസത്തില്‍ 1,120 രൂപയുടെ വര്‍ധന
രാജ്യാന്തര വില 2,790 ഡോളര്‍ കടന്നു, വെള്ളിക്ക് ഇന്ന് വിശ്രമം
സംസ്ഥാനത്ത് സ്വര്‍ണ വില മുന്നേറ്റം തുടരുന്നു. ഇന്ന് ഗ്രാമിന് 15 രൂപ വര്‍ധിച്ച് 7,455 രൂപയും പവന് 120 രൂപ ഉയര്‍ന്ന് 59,640 രൂപയുമായി. സ്വര്‍ണത്തിന്റെ ഇതു വരെയുള്ള ഏറ്റവും ഉയര്‍ന്ന വിലയാണിത്. കഴിഞ്ഞ് മൂന്ന് ദിവസംകൊണ്ട് കേരളത്തില്‍ പവന് വിലയില്‍ 640 രൂപയുടെ വര്‍ധനയുണ്ടായി. ദീപാവലി പര്‍ച്ചേസുകാര്‍ക്കുള്‍പ്പെടെ വന്‍ തിരിച്ചടിയാണ് ഇന്നത്തെ വില വര്‍ധന.
രാജ്യാന്തര വിലയിൽ കുതിപ്പ്
രാജ്യാന്തര വിലയിലെ മുന്നേറ്റമാണ് കേരളത്തിലും പ്രതിഫലിക്കുന്നത്. ഇന്ന് സ്വര്‍ണം ഔണ്‍സിന് 2,790.10 ഡോളര്‍ വരെയെത്തി പുതിയ റെക്കോഡിട്ടു. ഈ മാസം ഇതു വരെ 6 ശതമാനം വര്‍ധനയാണ് രാജ്യാന്തര സ്വര്‍ണ വിലയിലുണ്ടായത്. നിലവിലെ കുതിപ്പ് തുടര്‍ന്നാല്‍ വരും ദിവസങ്ങളില്‍ തന്നെ സ്വര്‍ണവില 2,800 ഡോളര്‍ എന്ന നാഴികക്കല്ല് മറികടന്നേക്കാം. ഈ വര്‍ഷം 3,000 ഡോളര്‍ ഭേദിക്കാനുള്ള സാധ്യതയും നിരീക്ഷകര്‍ പ്രവചിക്കുന്നുണ്ട്.