സൗത്ത് ഇന്ത്യന്‍ ബാങ്കിന് ₹325 കോടി ലാഭം, മൊത്തം ബിസിനസ് ₹1.90 ലക്ഷം കോടി; ഓഹരി 7 ശതമാനം ഉയര്‍ന്നു
വരുമാനവും കൂടി, നിഷ്‌ക്രിയ ആസ്തി നില മെച്ചപ്പെട്ടു
പി. ആര്‍. ശേഷാദ്രി, എം.ഡി & സി.ഇ.ഒ, സൗത്ത് ഇന്ത്യന്‍ ബാങ്ക്
തൃശൂര്‍ ആസ്ഥാനമായ പ്രമുഖ സ്വകാര്യ ബാങ്കായ സൗത്ത് ഇന്ത്യന്‍ ബാങ്ക് നടപ്പു സാമ്പത്തിക വര്‍ഷത്തെ (2024-25) രണ്ടാം പാദത്തില്‍ (ജൂലൈ-സെപ്റ്റംബര്‍) 324.79 കോടി രൂപയുടെ ലാഭം രേഖപ്പെടുത്തി. മുന്‍ സാമ്പത്തിക വര്‍ഷത്തെ സമാനപാദത്തിലെ 274.89 കോടി രൂപയേക്കാള്‍ ലാഭം 18 ശതമാനം വര്‍ധിച്ചു. ഇക്കാലയളവില്‍ ബാങ്കിന്റെ പ്രവര്‍ത്തന ലാഭം 460.57 കോടി രൂപയില്‍ നിന്ന് 550.35 കോടി രൂപയായി.
മൊത്തം ബിസിനസ് ₹1.90 ലക്ഷം കോടി
ബാങ്കിന്റെ മൊത്തം ബിസിനസ് രണ്ടാം പാദത്തില്‍ 1.90 ലക്ഷം കോടിയായി. വായ്പകള്‍ മുന്‍ വര്‍ഷത്തെ സമാനപാദത്തിലെ 74,947 കോടി രൂപയില്‍ നിന്ന് 84,714 കോടി രൂപയായി. 13.03 ശതമാനമാണ് വളര്‍ച്ച.
കോര്‍പ്പറേറ്റ് വായ്പകള്‍ 23.54 ശതമാനവും വ്യക്തിഗത വായ്പകള്‍ 9.02 ശതമാനവും വര്‍ധിച്ചു. സ്വര്‍ണ വായ്പകള്‍ 14,998 കോടി രൂപയില്‍ നിന്ന് 10.74 ശതമാനം വര്‍ധനയോടെ 16,609 കോടി രൂപയായി. ഭവന വായ്പകളില്‍ 41.94 ശതമാനവും വാഹന വായ്പകളില്‍ 18.11 ശതമാനവും വര്‍ധന രേഖപ്പെടുത്തി.
നിക്ഷേപങ്ങള്‍ 97,085 കോടി രൂപയില്‍ നിന്ന് 1,05,451 കോടിയുമായി. റീട്ടെയില്‍ നിക്ഷേപങ്ങള്‍ 93,448 കോടി രൂപയില്‍ നിന്ന് 1,01,651 കോടിയായി വർധിച്ചപ്പോൾ എന്‍.ആര്‍.ഐ നിക്ഷേപങ്ങള്‍ 28,785 കോടി രൂപയില്‍ നിന്ന് 5.92 ശതമാനം വര്‍ധിച്ച് 30,488 കോടി രൂപയായി.