ബ്രോണ് ആന്ഡ് ഓറല് ബി (Braun Oral B) തങ്ങളുടെ പുതിയ ഇലക്ട്രിക് ടൂത്ത് ബ്രഷ് രൂപകല്പ്പന (Design) ചെയ്യാന് ചുമതലപ്പെടുത്തിയത് കിം കോളിനേയും (Kim Colin) സാം ഹെച്ചിനേയുമായിരുന്നു (Sam Hecht). ബ്രോണ് ആന്ഡ് ഓറല് ബിക്ക് ആ ഇലക്ട്രിക് ടൂത്ത് ബ്രഷ് തികച്ചും വ്യത്യസ്തവും ഉപഭോക്താക്കള്ക്ക് മികച്ച അനുഭവം നല്കുന്നതുമാകണമെന്ന് നിര്ബന്ധമുണ്ടായിരുന്നു.
മൂന്ന് പ്രധാനപ്പെട്ട ആവശ്യങ്ങളാണ് നിര്മ്മാതാക്കള് ഡിസൈനര്മാരായ കിമ്മിനേയും സാമിനേയും അറിയിച്ചത്. ഒന്നാമത്തേത് ഇലക്ട്രിക് ടൂത്ത് ബ്രഷില് ഒരു മ്യൂസിക് പ്ലെയര് ഉണ്ടാവണമെന്നതാണ്. രണ്ടാമത്തേത് ഉപഭോക്താക്കള് എത്ര നല്ല രീതിയിലാണ് അവരുടെ ഓരോ പല്ലും ബ്രഷ് ചെയ്യുന്നത് എന്ന ഡാറ്റ ലഭ്യമാവണം. മൂന്നാമത്തേത് അവരുടെ മോണകളുടെ സംവേദനക്ഷമത(Sensitivtiy) അറിയുവാന് സാധിക്കണം. ഈ ഇലക്ട്രിക് ടൂത്ത് ബ്രഷ് ഉപഭോക്താക്കളുടെ ഡാറ്റ കൂടി ശേഖരിക്കുന്ന രൂപത്തിലാവണം ഡിസൈന് ചെയ്യേണ്ടത്.
എന്നാല് ഈ ആവശ്യങ്ങളെ ഒറ്റയടിക്ക് സ്വീകരിക്കുകയും ബ്രഷ് രൂപകല്പ്പന ചെയ്യുകയുമല്ല കിമ്മും സാമും ചെയ്തത്. നിര്മ്മാതാക്കളുടെ കാഴ്ചപ്പാടുകളെ മാത്രം ആധാരമാക്കിയല്ല മറിച്ച് ഉപഭോക്താക്കളുടെ പ്രശ്നങ്ങളെ ആഴത്തില് മനസിലാക്കിക്കൊണ്ട് വേണം ഉല്പ്പന്നങ്ങള് ഡിസൈന് ചെയ്യേണ്ടത് എന്നവര് നിര്ദ്ദേ ശിച്ചു. അവര് വിശദമായി ഉപഭോക്താക്കളുടെ ആവശ്യങ്ങള് പഠിക്കുകയും അവരുടെ പല പ്രശ്നങ്ങളും പരിഹരിക്കുവാന് സാധ്യമായ രണ്ട് സുപ്രധാന പരിഹാരങ്ങള് കണ്ടെത്തുകയും ചെയ്തു.
യു എസ് ബി ചാര്ജ്ജിംഗായിരുന്നു അതിലൊന്ന്. മറ്റൊന്ന് ബ്രഷ് ഹെഡുകള് അതിവേഗം ഓര്ഡര് ചെയ്യുവാനുള്ള സൗകര്യവും. ഉപഭോക്താക്കളുടെ അനുഭവങ്ങളില് നിന്നും സ്വാംശീകരിച്ച പാഠങ്ങള് പുതിയ ഉല്പ്പന്നം ഭംഗിയായി രൂപകല്പ്പന ചെയ്യുവാന് നിര്മാതാക്കളെ സഹായിച്ചു. ഓറല് ബിയുടെ ഇലക്ട്രിക് ടൂത്ത് ബ്രഷ് വിപണിയില് വന് വിജയമായി. നിര്മ്മാതാക്കളുടെ കാഴ്ചപ്പാടുകള്ക്കനുസൃതമായ ആവശ്യങ്ങള് ആയിരിക്കില്ല പലപ്പോഴും ഉപഭോക്താക്കളുടേത്.
ഒരു ഉല്പ്പന്നത്തിന്റെൃ രൂപകല്പ്പനയിലെ ഏറ്റവും പ്രധാനപ്പെട്ട ഭാഗം ഉപഭോക്താക്കളുടെ ആവശ്യങ്ങള് അറിയുക എന്നതാണ്. ഓരോ ഉല്പ്പന്നവും പ്രശ്നങ്ങള് പരിഹരിക്കുവാനാണ് അവര് ഉപയോഗിക്കുന്നത്. എന്താണ് ഉപഭോക്താവ് അവര്ക്ക് നല്കുവാന് സാധിക്കുകയില്ല. ഡിസൈന് തിങ്കിംഗ് (Design Thinking) ഉപഭോക്താവിന്റെ പ്രശ്നങ്ങളെ കണ്ടെത്താന് സംരംഭകരെ സഹായിക്കുന്നു.
ഓരോ ബിസിനസ് ആശയവും ഒന്നോ അതിലധികമോ പ്രശ്നങ്ങളുടെ പരിഹാരമാണ്. ഉല്പ്പന്ന രൂപകല്പ്പന (Design) ചെയ്യുമ്പോള് ഉപഭോക്താക്കളുടെ ഏതൊക്കെ പ്രശ്നങ്ങളെയാണ് അവ പരിഹരിക്കുന്നതെന്നും അതാണോ അവരുടെ യഥാര്ത്ഥ ആശങ്കകളെന്നും നിര്മ്മാതാവ് മനസിലാക്കിയിരിക്കണം. ഉപഭോക്താക്കളുടെ ആവശ്യങ്ങളെ പഠിക്കാതെ രൂപകല്പ്പന ചെയ്യുന്ന ഒരു ഉല്പ്പന്നവും വിപണിയില് വിജയിക്കുകയില്ല.
ഉപഭോക്താക്കളുടെ പ്രശ്നങ്ങള് കണ്ടെത്തിക്കഴിഞ്ഞാല് അവയ്ക്കുള്ള വിവിധ പരിഹാര മാര്ഗ്ഗങ്ങള് കണ്ടെത്തുകയാണ് അടുത്ത തലം. ഇതിനായി വിവിധ ആശയങ്ങള് ചര്ച്ച ചെയ്യുന്നു. അവയില് നിന്നും ഏറ്റവും മികച്ച ആശയം (പരിഹാരം) തിരഞ്ഞെടുക്കുന്നു. ഈ ആശയത്തില് നിന്നുമാണ് ഉല്പ്പന്നം പിറവിയെടുക്കുന്നത്. പ്രശ്നങ്ങള് കണ്ടെത്തുന്നതില് പിശകു പറ്റിയാല് ആശയം പരാജയപ്പെടും, ഉല്പ്പന്നങ്ങളെ ഉപഭോക്താക്കള് തിരസ്ക്കരിക്കും.
ഡിസൈന് തിങ്കിംഗിന്റെ ബാലപാഠം ഉപഭോക്താവിനെ അടുത്തറിയുക എന്നതാണ്. ഉപഭോക്താവിന്റെ യഥാര്ത്ഥ പ്രശ്നങ്ങള് സംരംഭകന് ചിന്തിക്കുന്നവ തന്നെയാവണമെന്ന് നിര്ബന്ധമില്ല. അത് അവരില് നിന്ന് തന്നെ അറിയണം. സംരംഭങ്ങള് തങ്ങളുടെ ഉപഭോക്താക്കളെ മനസിലാക്കുവാന് ശ്രമിക്കണം. അവരെ ശ്രവിക്കുവാന് തയ്യാറാകുന്ന സംരംഭങ്ങള്ക്ക് നല്ല ഉല്പ്പന്നങ്ങള് രൂപകല്പ്പന ചെയ്യുവാന് സാധിക്കും. അതിനായി ഡിസൈന് തിങ്കിംഗ് തന്ത്രം ഉപയോഗിക്കാം.
Read DhanamOnline in English
Subscribe to Dhanam Magazine
