അമേരിക്കന്‍ കണക്കുകളില്‍ ആശ്വാസം കണ്ടെത്തി ഇന്ത്യന്‍ സൂചികകള്‍ ഇന്ന് നേട്ടത്തില്‍ അവസാനിപ്പിച്ചു. ഫെഡറല്‍ റിസര്‍വിന്റെ കഴിഞ്ഞ മീറ്റിംഗിന്റെ മിനിറ്റ്‌സ് ഇന്നലെ പുറത്തുവന്നിരുന്നു. പണപ്പെരുപ്പ കണക്കുകളും മറ്റും പ്രതീക്ഷിച്ചതുപോലെ തുടര്‍ന്നാല്‍ അടുത്ത മീറ്റിംഗില്‍ നിരക്ക് കുറയ്ക്കുമെന്നാണ് ഇതില്‍ സൂചിപ്പിക്കുന്നത്. വിപണി പ്രതീക്ഷിക്കുന്നതും ഇതാണ്. 2023 ജൂലൈയിക്ക്‌ ശേഷം ഇതുവരെ മാറ്റമില്ലാതെ തുടരുകയായിരുന്നു പലിശ നിരക്കുകള്‍. നാളെ നടക്കുന്ന ജാക്‌സണ്‍ഹോള്‍ ഉച്ചകോടിയില്‍ ഫെഡ് ചെയര്‍മാന്‍ ജെറോം പവല്‍ ഇതേകുറിച്ച് സൂചന നല്‍കുമോ എന്നാണ് വിപണി ഉറ്റുനോക്കുന്നത്.
ദിവസം മുഴുവന്‍ റേഞ്ച് ബൗണ്ടായി നീങ്ങിയ ശേഷം സെന്‍സെക്‌സ് ഇന്ന് 147.89 ശതമാനം ഉയര്‍ന്ന് 81,053ലും നിഫ്റ്റി 40.70 പോയിന്റ് ഉയര്‍ന്ന് 24,810ലും ആണ് വ്യാപാരം അവസാനിപ്പിച്ചത്.
വിവിധ സൂചികകളുടെ പ്രകടനം
വിശാല വിപണിയിലിന്ന് നിഫ്റ്റി മിഡ്ക്യാപ് സൂചിക 0.69 ശതമാനവും സ്‌മോള്‍ക്യാപ് സൂചിക 0.17 ശതമാനവും ഉയര്‍ന്നു.
വിവിധ സൂചികകളുടെ ഇന്നത്തെ പ്രകടനം
മറ്റ് സൂചികകളെടുത്താല്‍ ഇന്ന് വലിയ കുതിപ്പ് ഒന്നിലും കണ്ടില്ല. നിഫ്റ്റി ഓട്ടോ, ഐ.ടി, മീഡിയ, ഫാര്‍മ, ഹെല്‍ത്ത്‌കെയര്‍, ഓയില്‍ ആന്‍ഡ് ഗ്യാസ് സൂചികകള്‍ മാത്രമാണ് നഷ്ടത്തില്‍ അവസാനിപ്പിച്ചത്.
ബി.എസ്.ഇയില്‍ ഇന്ന് 4,053 ഓഹരികളാണ് വ്യാപാരം നടത്തിയത്. അതില്‍ 2,451 ഓഹരികളും നേട്ടത്തിലേറി. 1,513 ഓഹരികള്‍ താഴേക്ക് പോയി. 89 ഓഹരികളുടെ വിലയില്‍ മാറ്റമില്ല. അശോക് ലൈലാന്‍ഡ്, എസ്.ബി.ഐ ലൈഫ്, ടി.വി.എസ് മോട്ടോര്‍ എന്നിവ ഉള്‍പ്പെടെ 342 ഓഹരികളആണ് ഇന്ന് 52 ആഴ്ചയിലെ ഉയര്‍ന്ന വില തൊട്ടത്. 15 ഓഹരികള്‍ താഴ്ന്ന വില കണ്ടു.15 ഓഹരികള്‍ ഇന്ന് അപ്പര്‍ സര്‍ക്യൂട്ടിലുണ്ട്. മൂന്ന് ഓഹരികള്‍ ലോവര്‍ സര്‍ക്യൂട്ടിലും.
ബി.എസ്.ഇയിലെ ലിസ്റ്റഡ് കമ്പനികളുടെ വിപണിമൂല്യം 459.2 ലക്ഷം കോടി രൂപയില്‍ നിന്ന് 460.5 ലക്ഷം കോടിയായി. നിക്ഷേപകരുടെ സമ്പത്തിലുണ്ടായത് ഒരു ലക്ഷം കോടി രൂപയുടെ വര്‍ധന.
ബി.എസ്.ഇയിലെ രജിസ്‌ട്രേഡ് നിക്ഷേപകരുടെ എണ്ണം 18.7 കോടിയായി മുന്‍ വര്‍ഷത്തെ സമാനകാലയളവിനെ അപേക്ഷിച്ച് 33 ശതമാനമായി. മുന്‍പാദത്തേക്കാള്‍ 8 ശതമാനവും വര്‍ധിച്ചു.
ഗ്രാസിം ഇന്‍ഡസ്ട്രീസ്, ടാറ്റ കണ്‍സ്യൂമര്‍ പ്രോഡക്ട്‌സ്, ഭാരതി എയര്‍ടെല്‍, ടാറ്റ സ്റ്റീല്‍, ഐ.സി.ഐ.സി.ഐ ബാങ്ക്, ടൈറ്റന്‍ കമ്പനി, അപ്പോളോ ഹോസ്പിറ്റല്‍സ്, ഏഷ്യന്‍ പെയിന്റ്‌സ് എന്നിവയാണ് ഇന്ന് സെന്‍സെക്‌സിന് കരുത്തു പകര്‍ന്നത്. അതേസമയം വിപ്രോ, ടാറ്റ മോട്ടോഴ്‌സ്, എന്‍.ടി.പി.സി, ഡോ.റെഡ്ഡീസ് ലാബ്‌സ്, മഹീന്ദ്ര ആന്‍ഡ് മഹീന്ദ്ര, ടി.സി.എസ്, ഒ.എന്‍.ജി.സി എന്നിവ വില്‍പ്പന സമ്മര്‍ദ്ദത്തിലായി.
നിഫ്റ്റിക്ക് തിളക്കമായി കല്യാണും ഫാക്ടും
കല്യാണ്‍ ജുവലേഴ്‌സ് ആണ് ഇന്ന് നിഫ്റ്റി 200ല്‍ നേട്ടത്തിൽ ഒന്നാമത്. ഓഹരി വില 10.71 ശതമാനം ഉയര്‍ന്ന് 602 രൂപയിലെത്തി. എക്കാലത്തെയും ഉയര്‍ന്ന വിലയ്ക്കടുത്താണ് ഓഹരി ഇപ്പോള്‍.
കല്യാണ്‍ ജുവലേഴ്‌സിന്റെ പ്രമോട്ടര്‍ ടി.എസ് കല്യാണരാമന്‍ കമ്പനിയില്‍ ഓഹരി പങ്കാളിത്തം 2.36 ശതമാനം വര്‍ധിപ്പിച്ചതാണ് ഓഹരിയെ ഉയര്‍ത്തിയത്. കല്യാണില്‍ 9.1 ശതമാനം ഓഹരികളുള്ള വിദേശ നിക്ഷേപക സ്ഥാപനമായ ഹൈഡെല്‍ ഇന്‍വെസ്റ്റ്‌മെന്റില്‍ നിന്നാണ് 535 രൂപ നിരക്കില്‍ ഓഹരികള്‍ സ്വന്തമാക്കിയത്. മൊത്തം 1,300 കോടി രൂപയുടെ ഇടപാടാണിത്. കഴിഞ്ഞ ഒരു വര്‍ഷത്തിനുള്ളില്‍ 160 ശതമാനത്തിലധികം വില ഉയര്‍ന്ന ഓഹരിയാണിത്. വില ഇത്രയും ഉയരത്തില്‍ നില്‍ക്കുമ്പോഴും ഓഹരി പങ്കാളിത്തം ഉയര്‍ത്തുന്നത് പ്രമോട്ടര്‍മാര്‍ക്ക് കമ്പനിയിലുള്ള വിശ്വാസത്തെയാണ് സൂചിപ്പിക്കുന്നത്.
കേരളം ആസ്ഥാനമായ വളം നിര്‍മാണ കമ്പനിയായ ഫെര്‍ട്ടിലൈസേഴ്‌സ് ആന്‍ഡ് കെമിക്കല്‍സ് ട്രാവന്‍കൂര്‍ (ഫാക്ട്) ആണ് നിഫ്റ്റി200ലെ രണ്ടാം സ്ഥാനക്കാര്‍. ഓഹരി വില 6.09 ശതമാനം ഉയര്‍ന്ന് 1,010 രൂപയിലെത്തി. ഒരുവേള 1,064 രൂപ വരെയെത്തിയിരുന്നു. ജൂണ്‍ 26ന് കുറിച്ച 1,187 രൂപയാണ് ഓഹരിയുടെ എക്കാലത്തെയും ഉയര്‍ന്ന വില. വിപണിയിലെ ഉയര്‍ച്ചയ്‌ക്കൊപ്പം ഫെര്‍ട്ടിലൈസേഴ്‌സ് ഓഹരികളായ നാഷണല്‍ ഫെര്‍ട്ടിലൈസേഴ്‌സ് (6.97 ശതമാനം), രാഷ്ട്രീയ കെമിക്കല്‍സ് ആന്‍ഡ് ഫെര്‍ട്ടിലൈസേഴ്‌സ് (6.05 ശതമാനം), രാമ ഫോസ്‌ഫേറ്റ്‌സ് (4.52 ശതമാനം), മദ്രാസ് ഫെര്‍ട്ടിലൈസേഴ്‌സ് (4.43 ശതമാനം) എന്നിവയെല്ലാം മുന്നേറ്റം നടത്തിയിരുന്നു.
ഓഹരികളിലെ കുതിപ്പും കിതപ്പും
എ.പി.എല്‍ അപ്പോളോ ട്യൂബ്‌സ് 4.44 ശതമാനം ഉയര്‍ന്നു. ഇന്‍ഡിഗോയുടെ മാതൃകമ്പനിയായ ഇന്റര്‍ഗ്ലോബ് ഏവിയേഷനാണ് നേട്ടത്തില്‍ മുന്നിലെത്തിയ മറ്റൊരു ഓഹരി. ജെഫ്രീസും എച്ച്.എസ്.ബി.സിയും കമ്പനിയുടെ വളര്‍ച്ചാ സാധ്യത മുന്‍നിര്‍ത്തി ഓഹരിക്ക് റേറ്റിംഗ് നല്‍കിയതാണ് വില ഉയര്‍ത്തിയത്. ഓഹരിയുടെ റേറ്റിംഗ് ബൈയില്‍ നിന്ന് 'ഹോള്‍ഡ്' എന്ന് മാറ്റിയ ജെഫ്രീസ് ലക്ഷ്യവില നിശ്ചയിച്ചിരിക്കുന്നത് 5,225 രൂപയാണ്. നിലവിലെ വിലയില്‍ നിന്ന് 21.5 ശതമാനം ഉയര്‍ച്ച. എച്ച്.എസ്.ബി.സി 'ബൈ' സ്റ്റാറ്റസ് നിലനിറുത്തി.
ഇന്ത്യന്‍ ഹോട്ടല്‍സ് ഓഹരി വില 4.04 ശതമാനം ഉയര്‍ന്ന് 646.25 രൂപയിലെത്തി.
വ്യക്തിഗത ഓഹരികളിൽ ടി.വി.എസ് മോട്ടോര്‍ കമ്പനി ഓഹരി ഇന്ന് മൂന്ന് ശതമാനം ഉയര്‍ന്നു. പുതിയ ജൂപിറ്റർ സ്‌കൂട്ടര്‍ അവതരിപ്പിച്ചതാണ് ഓഹരിയെ ഉയർത്തിയത്.
അദാനി പവര്‍ ഓഹരികളാണ് ഇന്ന് നിഫ്റ്റി 200ലെ ഏറ്റവും വലിയ ഇടിവ് രേഖപ്പെടുത്തിയത്. ഓഹരി വില 3.34 ശതമാനം താഴ്ന്ന് 671.90 രൂപയിലെത്തി. പ്രമോട്ടര്‍മാര്‍ ഓഹരി വില്‍ക്കുന്നുവെന്ന വാര്‍ത്തകളാണ് ഓഹരിയില്‍ ഇടിവുണ്ടാക്കിയത്. അതേസമയം പ്രമോട്ടര്‍ ഓഹരി വില്‍ക്കുന്ന അംബുജ സിമന്റ് ഓഹരി വില രണ്ട് ശതമാനത്തോളം ഉയര്‍ന്നു.
ടിക്കറ്റിംഗ് ബിസിനസ് സൊമാറ്റോയ്ക്ക് വില്‍ക്കാന്‍ തീരുമാനിച്ച പേയ്ടിഎം ഓഹരികളാണ് നഷ്ടത്തില്‍ രണ്ടാമത്. സിനിമ, സ്‌പോര്‍ട്‌സ്, ഇവന്റ്‌സ് എന്നിവ ഉള്‍പ്പെടെയുള്ള ടിക്കറ്റ് ബിസിനസ് ഇനി സൊമാറ്റോ നടത്തും. സൊമാറ്റോ ഓഹരികളും ഇന്ന് ഇടിവിലാണ്.
ചോളമണ്ഡലം ഇന്‍വെസ്റ്റ്‌മെന്റ് ആന്‍ഡ് ഫിനാന്‍സ് കമ്പനി (2.96 ശതമാനം), ഡെല്‍ഹിവെറി (2.44 ശതമാനം), എസ്.ജെ.വി.എന്‍ (2.37 ശതമാനം) എന്നിവയാണ് ഇടിവിലായ മറ്റ് ഓഹരികള്‍.
കേരള ഓഹരികളിൽ കിറ്റെക്‌സും മുത്തൂറ്റും
കേരള ഓഹരികളില്‍ കല്യാണ്‍ കഴിഞ്ഞാല്‍ ഏറ്റവും മുന്നേറ്റമുണ്ടാക്കിയത്‌ കിറ്റെക്‌സ് ഗാര്‍മെന്റ്‌സ് ഓഹരികളാണ്. കുഞ്ഞുടുപ്പ് നിര്‍മാതാക്കളായ കിറ്റെക്‌സിന്റെ ഓഹരി ഇന്ന് 7.18 ശതമാനം ഉയര്‍ന്നു. ടെക്‌സ്‌റ്റൈല്‍ കമ്പനിയായ സ്‌കൂബി ഡേ ഇന്ന് രണ്ട് ശതമാനത്തോളം നേട്ടത്തിലാണ്. അതേസമയം ജി.ടി.എന്‍ ടെക്‌സ്‌റ്റൈല്‍സ് ഓഹരി നേരിയ ഇടിവിലാണ്.
തുടർച്ചയായ രണ്ടാം ദിനവും വലിയ മുന്നേറ്റത്തിലാണ് മുത്തൂറ്റ് ക്യാപിറ്റല്‍ സര്‍വീസസ്‌. ഓഹരി വില 6.19 ശതമാനം ഉയര്‍ന്ന് 338.8 രൂപയിലെത്തി. നേട്ടത്തിൽ നാലാമതാണ് ഫാക്ട്.
ഇന്‍ഡിട്രേഡ് (5 ശതമാനം), സൗത്ത് ഇന്ത്യന്‍ ബാങ്ക് ( 3.50 ശതമാനം), മണപ്പുറം (2.89 ശതമാനം) എന്നിവയാണ് ഇന്ന് മികച്ച നേട്ടം കാഴ്ചവച്ച മറ്റ് കേരള ഓഹരികള്‍. മണപ്പുറം ഫിനാന്‍സ് ഓഹരികള്‍ക്ക് ഐ.സി.ഐ.സി.ഐ സെക്യൂരിറ്റീസ് 260 രൂപ ലക്ഷ്യ വില നിശ്ചയിച്ചിട്ടുണ്ട്. ഇന്ന് ഓഹരി വില 217.90 രൂപയാണ്.
സെല്ല സ്‌പേസ് ഓഹരികളാണ് ഇന്ന് ഇടിവില്‍ മുന്നില്‍. കൊച്ചിന്‍ ഷിപ്പ്‌യാര്‍ഡ് ഓഹരികള്‍ ഇന്ന് 2.68 ശതമാനം താഴ്ന്നാണ് വ്യാപാരം അവസാനിപ്പിച്ചത്. ഇസാഫ്, ഫെഡറല്‍ ബാങ്ക്, വി-ഗാര്‍ഡ് തുടങ്ങിയ ഓഹരികളും ഇടിവിലാണ്.
