നിഫ്റ്റിയിൽ കുറച്ച് ദിവസം കൂടി സമാഹരണം തുടർന്നേക്കാം

നിഫ്റ്റി ഉയർന്ന് 21,688 ൽ വ്യാപാരം തുടങ്ങി. 21,726.50 ൽ ഉയർന്ന നിലവാരം പരീക്ഷിച്ചു. സൂചിക ക്രമേണ ഇടിഞ്ഞ് 21,647.20 ൽ ക്ലോസ് ചെയ്യുന്നതിനുമുമ്പ് ഇൻട്രാഡേയിലെ ഏറ്റവും താഴ്ന്ന നിലവാരമായ 21,593.80 ൽ എത്തി.

ഓട്ടോ, ബാങ്കുകൾ, ധനകാര്യ സേവനങ്ങൾ എന്നിവ നേട്ടമുണ്ടാക്കിയപ്പോൾ മാധ്യമങ്ങൾ, ഐ.ടി, എഫ്.എം.സി.ജി, ഫാർമ എന്നിവയ്ക്കാണ് പ്രധാന നഷ്ടം. വിശാലവിപണി പോസിറ്റീവ് ആയിരുന്നു, 1466 ഓഹരികൾ ഉയർന്നു, 906 എണ്ണം ഇടിഞ്ഞു, 142 എണ്ണം മാറ്റമില്ലാതെ തുടരുന്നു.

നിഫ്റ്റിയിൽ ഹീറാേ മോട്ടോ കോർപ്, ബജാജ് ഓട്ടോ, റിലയൻസ്, ആക്സിസ് ബാങ്ക് എന്നിവ കൂടുതൽ നേട്ടം ഉണ്ടാക്കിയപ്പോൾ ഇൻഫോസിസ്, ഡോ. റെഡ്ഡീസ്, എസ്.ബി.ഐ. ലൈഫ്, ഹിന്ദുസ്ഥാൻ യൂണിലീവർ എന്നിവയ്ക്കാണ് കൂടുതൽ നഷ്ടം.

നിഫ്റ്റി ഹ്രസ്വകാല മൂവിംഗ് ശരാശരിക്ക് മുകളിൽ ക്ലോസ് ചെയ്തു. മൊമെന്റം സൂചകങ്ങൾ നിഷ്പക്ഷ പ്രവണത കാണിക്കുന്നു. ഡെയ്‌ലി ചാർട്ടിൽ സൂചിക ചെറിയ ബ്ലായ്ക്ക് കാൻഡിൽ രൂപപ്പെടുത്തി കഴിഞ്ഞ ദിവസത്തെ ക്ലോസിംഗിനു തൊട്ടു മുകളിൽ ക്ലോസ് ചെയ്തു. ഈ പാറ്റേൺ അല്പം പോസിറ്റീവ് പക്ഷപാതം സൂചിപ്പിക്കുന്നു. നിഫ്റ്റി 21,450-21,835 എന്ന കൺസോളിഡേഷൻ ബാൻഡിനുള്ളിൽ തുടരുന്നു, ഈ സമാഹരണം കുറച്ച് ദിവസത്തേക്ക് കൂടി തുടരാം. ഒരു ദിശ നിർണ്ണയിക്കുന്നതിന്, സൂചിക ഈ ലെവലുകളിൽ ഏതെങ്കിലും ഒന്നിൽ നിന്ന് പുറത്തുകടക്കണം.