ഓഹരി വിപണി വാരാന്ത്യ റിപ്പോര്‍ട്ട്; വിപണി ബുള്ളിഷ് ആയി നീങ്ങാന്‍ ഈ ഘടകങ്ങള്‍ അനിവാര്യം

തിങ്കളാഴ്ച നിഫ്റ്റി 18,376.40-ൽ ഓപ്പൺ ചെയ്ത് 18,442.20 എന്ന ആഴ്‌ചയിലെ ഉയർന്ന നിലവാരത്തിൽ എത്തി. എന്നാൽ വെള്ളിയാഴ്ച സൂചിക 18,209.80 എന്ന താഴ്ന്ന നിലയിലെത്തി. ഒടുവിൽ 18,307.70 ൽ ക്ലോസ് ചെയ്തു. പ്രതിവാര നഷ്ടം 42.00 പോയിന്റ് (0.20%). ബാങ്കുകൾ, ധനകാര്യ സേവനങ്ങൾ, ഐടി, റിയൽറ്റി തുടങ്ങിയ മേഖലകൾ നേട്ടമുണ്ടാക്കിയപ്പോൾ ഓട്ടോ, എഫ്എംസിജി, മീഡിയ, ഫാർമ എന്നിവ നഷ്ടത്തിലായി.

സാങ്കേതികമായി മൊമെന്റം സൂചകങ്ങളും മൂവിംഗ് ശരാശരിയും പോസിറ്റീവ് പ്രവണത സൂചിപ്പിക്കുന്നു. പ്രതിവാര ചാർട്ടിൽ, നിഫ്റ്റി ഒരു ചെറിയ കറുത്ത മെഴുകുതിരി രൂപപ്പെടുത്തി മുൻ പ്രതിവാര ക്ലോസിംഗിനു തൊട്ടുതാഴെ ക്ലോസ് ചെയ്തു. ഉയരുമ്പോൾ സൂചികയ്ക്ക് 18,606-ൽ പ്രതിരോധമുണ്ട്, പിന്തുണ 18,000-ലാണ്.

കുറച്ച് ദിവസത്തേക്ക് സൂചിക ഈ മേഖലയിൽ സമാഹരണം തുടരാം. സൂചിക ഈ മേഖലയിൽ നിന്നു പുറത്തു കടക്കുമ്പോഴേ വിപണി ഏതു ഗതിക്കാണു നീങ്ങുക എന്നു വ്യക്തമാകൂ.

ബാങ്ക് നിഫ്റ്റി 300.30 പോയിന്റ് നേട്ടത്തോടെ 42,437.40 എന്ന റെക്കോർഡ് ഉയരത്തിൽ ക്ലോസ് ചെയ്തു. മൊമെന്റം സൂചകങ്ങളും ഹ്രസ്വകാല മൂവിംഗ് ശരാശരികളും പോസിറ്റീവ് പ്രവണത സൂചിപ്പിക്കുന്നു. സൂചിക പ്രതിവാര ചാർട്ടിൽ ഒരു ചെറിയ വെളുത്ത മെഴുകുതിരി രൂപപ്പെടുത്തി മുമ്പത്തെ ക്ലോസിംഗിനു മുകളിൽ ക്ലോസ് ചെയ്തു. ഇതെല്ലാം ബുള്ളിഷ് ട്രെൻഡ് തുടരാനുള്ള സാധ്യത സൂചിപ്പിക്കുന്നു. ഉയരുമ്പോൾ മധ്യകാല പ്രതിരോധം 44,000 ൽ തുടരുന്നു. പിന്തുണ 41830 ലാണ്. സൂചിക ഇതിനു മുകളിൽ തുടരുന്നിടത്തോളം ബുള്ളിഷ് ആക്കം തുടരും. (പ്രതിവാര ചാർട്ടിനെ അടിസ്ഥാനമാക്കിയുള്ള വിശകലനം)