ബൈജൂസിന്റെ രക്ഷകനാകുമോ മണിപ്പാല്‍ ഗ്രൂപ്പ് ചെയര്‍മാന്‍?
രഞ്ജന്‍ പൈ ആകാശില്‍ 740 കോടി രൂപയുടെ നിക്ഷേപത്തിനൊരുങ്ങുന്നു
Ranjan Pai/Image: manipal.edu/
പ്രമുഖ വിദ്യാഭ്യാസ സാങ്കേതിക (EdTech/എഡ്ടെക്) സ്റ്റാര്‍ട്ടപ്പായ ബൈജൂസിന്റെ ഉടമസ്ഥതയിലുള്ള ആകാശ് എജ്യൂക്കേഷണല്‍ സര്‍വീസസില്‍ മണിപ്പാൽ ഗ്രൂപ്പ് ചെയര്‍മാന്‍ ഡോ. രഞ്ജന്‍ പൈ നിക്ഷേപം നടത്തിയേക്കും. ഇതുമായി ബന്ധപ്പെട്ട ആദ്യഘട്ട ചര്‍ച്ചകള്‍ നടക്കുന്നതായി മണികണ്‍ട്രോള്‍ റിപ്പോര്‍ട്ട് ചെയ്തു. ബൈജൂസിന്റെ മുന്‍കാല നിക്ഷേപകരിലൊരാളാണ് രഞ്ജന്‍ പൈ.
2021 ലാണ് 7,500 കോടി രൂപയ്ക്ക് ബൈജൂസ് ആകാശിനെ ഏറ്റെടുക്കുന്നത്. ബൈജൂസിന്റെ ഏറ്റവും മികച്ച ഏറ്റെടുക്കലുകളിലൊന്നായാണ് ഇതിനെ വിലയിരുത്തുന്നത്. നിരവധി പ്രതിസന്ധികൾ അഭിമുഖീകരിക്കുന്ന ബൈജൂസിനെ സംബന്ധിച്ച് പുതിയ നിക്ഷേപം ഒരു കച്ചിത്തുരുമ്പാണ്. രഞ്ജന്‍ പൈ ബോര്‍ഡിലെത്തുന്നതോടെ ബൈജൂസിന് കൂടുതല്‍ നിക്ഷേപകരെ ആകര്‍ഷിക്കാനാകുമെന്ന് വിദഗ്ധര്‍ പ്രതീക്ഷ പ്രകടിപ്പിക്കുന്നുണ്ട്.