ഭ്രാന്തന്‍ ആശയങ്ങളുമായി വന്നു, ഇപ്പോള്‍ ലോകത്തെ ഏറ്റവും വലിയ സമ്പന്നന്‍

ലോകത്തെ പ്രമുഖ ഇലക്ട്രിക് കാര്‍ ഉത്പാദകരായ ടെസ്‌ലയുടെയും ആദ്യത്തെ സ്വകാര്യ ബഹിരാകാശയാത്ര കമ്പനിയായ സ്‌പേസ് എക്‌സിന്റെയും തലവനായ എലോണ്‍ മസ്‌ക് ആമസോണിന്റെ ജെഫ് ബെസോസിനെ മറികടന്നു വ്യാഴാഴ്ച ലോകത്തിലെ ഏറ്റവും സമ്പന്നനായ വ്യക്തിയായി. ബ്ലൂംബര്‍ഗ് ശതകോടീശ്വരന്‍ സൂചിക ഉപയോഗിച്ചുള്ള കണക്കുകൂട്ടലുകളുടെ അടിസ്ഥാനത്തിലാണ് ഈ നിഗമനം.

'എത്ര വിചിത്രമാണ് ഇത്. ശരി, ഇപ്പോള്‍ ജോലിയിലേക്ക് മടങ്ങുക,' മസ്‌ക് ഈ വാര്‍ത്തയ്ക്ക് മറുപടിയായി ട്വീറ്റ് ചെയ്തു.

ടെസ്‌ല ഓഹരികള്‍ വ്യാഴാഴ്ച 8 ശതമാനം ഉയര്‍ന്ന് 816 ഡോളറിലെത്തി. സിഇഒ എന്ന നിലയില്‍ മസ്‌ക്കിന്റെ മൊത്തം ആസ്തി 186 ബില്യണ്‍ ഡോളറിലെത്തി. അതേസമയം, ആമസോണിന്റെ ഓഹരികള്‍ ഒരു ശതമാനത്തില്‍ താഴെയാണ് ക്ലോസ് ചെയ്തത്. ബെസോസിന്റെ സമ്പത്ത് നിലവില്‍ 185 ബില്യണ്‍ ഡോളറായി കണക്കുകൂട്ടപ്പെടുന്നു.

ബ്ലൂംബെര്‍ഗ് ശതകോടീശ്വരന്‍ സൂചിക അനുസരിച്ചു ബുധനാഴ്ച അവസാനത്തോടെ മസ്‌ക്, ബെസോസ് എന്നിവരുടെ സമ്പത്ത് യഥാക്രമം 181 ബില്യണ്‍, 184 ബില്യണ്‍ ഡോളര്‍ എന്നിങ്ങനെയായിരുന്നു.

മസ്‌ക്കിന്റെ സമ്പത്ത് ടെസ്‌ലയിലെ ഏകദേശം 20% ഓഹരികളും സ്‌പേസ് എക്‌സിന്റെ 48% ഓഹരികളും 57 ദശലക്ഷം നിക്ഷിപ്ത ടെസ്‌ല സ്‌റ്റോക്ക് ഓപ്ഷനുകളില്‍ നിന്നാണ്, ബ്ലൂംബര്‍ഗ് പറയുന്നു. ആമസോണിലെ 11% ഓഹരിയില്‍ നിന്നാണ് ബെസോസിന്റെ മൊത്തം മൂല്യം ലഭിക്കുന്നത്.

ടെസ്‌ല സിഇഒയുടെ സമ്പാദ്യം കഴിഞ്ഞ വര്‍ഷം 150 ബില്യണ്‍ ഡോളറിലധികം ഉയര്‍ന്നുവെന്ന് ബ്ലൂംബെര്‍ഗ് പറഞ്ഞു. ഈ ഇലക്ട്രിക് വെഹിക്കിള്‍ കമ്പനിയുടെ ഓഹരി വില 2020ല്‍ 740 ശതമാനം ഉയര്‍ന്നു.

മൈക്രോസോഫ്റ്റ് സഹസ്ഥാപകന്‍ ബില്‍ ഗേറ്റ്‌സിന്റെ പതിറ്റാണ്ടുകളുടെ പടയോട്ടം അവസാനിപ്പിച്ച് 2017ലാണ് ബെസോസ് ലോകത്തിലെ ഏറ്റവും ധനികനായ വ്യക്തിയായി മാറിയത്. ബെസോസിന്റെ സ്വത്ത് കുറയാനുള്ള ഒരു കാരണം അദ്ദേഹം വിവാഹമോചനത്തിന് കൊടുത്ത നഷ്ടപരിഹാരമാണ്. 2019 ഏപ്രിലില്‍ ഭാര്യ മക്കെന്‍സിയുമായി വിവാഹമോചനം തീരുമാനിച്ചപ്പോള്‍ ബെസോസ് ഏകദേശം 36 ബില്യണ്‍ ഡോളര്‍ വിലമതിക്കുന്ന ഓഹരികള്‍ കൈമാറി. ചരിത്രത്തിലെ ഏറ്റവും വലിയ വിവാഹമോചന നഷ്ടപരിഹാരമാണിത്.

ടെസ്‌ലയുടെ ഓഹരി വിലയിലെ കുതിച്ചുചാട്ടം പല കാരണങ്ങളാല്‍ വ്യത്യസ്തമാണ്. കഴിഞ്ഞ വര്‍ഷം അരലക്ഷത്തിലധികം കാറുകള്‍ മാത്രമാണ് ടെസ്‌ല ഉത്പാദിപ്പിച്ചത്. ഫോര്‍ഡ് മോട്ടോര്‍ കമ്പനിയുടെയും ജനറല്‍ മോട്ടോഴ്‌സ് കമ്പനിയുടെയും ഉല്പാദനത്തിന്റെ ചെറിയ ഒരു ഭാഗം മാത്രം. അമേരിക്കയില്‍ ഡെമോക്രാറ്റുകള്‍ ജോര്‍ജിയ സെനറ്റ് സീറ്റുകള്‍ പിടിച്ചെടുക്കുകയും കോണ്‍ഗ്രസിന്റെ നിയന്ത്രണം ഏറ്റെടുക്കുകയും ചെയ്തത് ടെസ്‌ലക്കു പ്രയോജനം ചെയ്യുമെന്ന് നിരീക്ഷകര്‍ കരുതുന്നു. ഇലക്ട്രിക് വാഹനങ്ങളിലേക്ക് എത്രയും വേഗം മാറണമെന്ന് വാദിക്കുന്നവരാണ് ഡെമോക്രാറ്റിക് പാര്‍ട്ടി.

ലോകത്തെ 500 സമ്പന്നരായ ആളുകള്‍ കഴിഞ്ഞ വര്‍ഷം അവരുടെ മൊത്തം ആസ്തി 1.8 ട്രില്യണ്‍ ഡോളര്‍ വര്‍ധിപ്പിച്ചു. ഇത് 31% വര്‍ദ്ധനവിന് തുല്യമാണ്. അഞ്ച് വ്യക്തികള്‍ക്ക് 100 ബില്യണ്‍ ഡോളറില്‍ കൂടുതല്‍ സമ്പാദ്യവും മറ്റൊരു 20 പേര്‍ക്ക് കുറഞ്ഞത് 50 ബില്യണ്‍ ഡോളറുമുണ്ട്.

പുതുവര്‍ഷത്തിലേക്ക് കടന്ന് ഒരാഴ്ചയ്ക്കുള്ളില്‍ തന്നെ അസാധാരണമായ ഓഹരി റാലികള്‍ കാരണം ചിലരുടെ റാങ്കിംഗ് വളരെ ഉയര്‍ന്നു. ചൈനയിലെ ചോങ് ഷാന്‍ഷന്‍ വാറന്‍ ബഫെറ്റിനെ മറികടന്ന് ലോകത്തെ പണക്കാരില്‍ ആറാം സ്ഥാനത്തെത്തി. തന്റെ കുപ്പിവെള്ള കമ്പനിയുടെ ഓഹരികള്‍ ഉയര്‍ന്നതിനെ തുടര്‍ന്ന് ഇദ്ദേഹത്തിന്റെ സമ്പാദ്യം 15.2 ബില്യണ്‍ ഡോളര്‍ വര്‍ധിച്ചു.

ഇക്കഴിഞ്ഞ നവംബറിലാണ് മസ്‌ക് ബില്‍ ഗേറ്റ്‌സിനെ മറികടന്ന് ലോകത്തിലെ രണ്ടാമത്തെ ധനികനായി മാറിയത്. കഴിഞ്ഞ വര്‍ഷത്തില്‍ അദ്ദേഹത്തിന്റെ ആസ്തി 150 ബില്യണ്‍ ഡോളറിലധികം ഉയര്‍ന്നു, ചരിത്രത്തിലെ ഏറ്റവും വേഗത്തിലുള്ള സമ്പത്ത് വര്‍ധനവായി ഇത് വിലയിരുത്തപ്പെടുന്നു. സ്ഥിരതയാര്‍ന്ന ലാഭം, എസ് ആന്റ് പി 500 സൂചികയില്‍ ഉള്‍പ്പെടുത്തല്‍, വാള്‍സ്ട്രീറ്റില്‍ നിന്നും ചില്ലറ നിക്ഷേപകരില്‍ നിന്നും ഒരുപോലെ നിക്ഷേപം എന്നീ കാരണങ്ങള്‍ മൂലം കഴിഞ്ഞ വര്‍ഷം 743 ശതമാനം ഉയര്‍ന്ന ടെസ്‌ലയുടെ ഓഹരി വിലയിലെ അഭൂതപൂര്‍വമായ റാലിയായിരുന്നു അദ്ദേഹത്തിന്റെ ഉയര്‍ച്ചയ്ക്ക് ഇന്ധനമായി തീര്‍ന്നത്.

1971ല്‍ ദക്ഷിണാഫ്രിക്കയിലെ പ്രിട്ടോറിയയില്‍ ജനിച്ച എലോണ്‍ തികച്ചും വ്യത്യസ്തമായ നിരവധി സംരംഭങ്ങള്‍ക്ക് നേതൃത്വം നല്‍കുന്നതില്‍ സജീവമായി ഏര്‍പ്പെട്ടിരിക്കുന്ന ഒരാള്‍ എന്ന നിലയില്‍ അറിയപ്പെട്ടിരുന്നു. ഈ സംരംഭങ്ങളില്‍ പലതും ഭ്രാന്തന്‍ ആശയങ്ങള്‍ എന്ന് പറഞ്ഞു പലരും ആക്ഷേപിച്ചിട്ടുണ്ട്. എന്നാല്‍ വര്‍ഷങ്ങള്‍ കടന്നുപോയപ്പോള്‍ ടെസ്‌ലയുടെയും സ്‌പേസ് എക്‌സിന്റെയും സിഇഒ ഇത്തരക്കാരുടെ സംശയങ്ങള്‍ തെറ്റാണെന്ന് തെളിയിച്ചു.

1988ല്‍ ഉന്നതപഠനത്തിനായി കാനഡയിലുള്ള ഒന്റാറിയോയിലെ ക്വീന്‍സ് യൂണിവേഴ്‌സിറ്റിയില്‍ ചേര്‍ന്നത് മസ്‌കിന് പുതിയ ആശയങ്ങളിലേക്കുള്ള വാതില്‍ തുറന്നു കൊടുത്തു. ക്വീന്‍സില്‍ നിന്ന് ബിരുദം നേടിയ ശേഷം, ദക്ഷിണാഫ്രിക്കയില്‍ തിരിച്ചെത്തിയെങ്കിലും എങ്ങനെയും 'പരിധിയില്ലാത്ത സാധ്യതകളുടെ' നാടായ അമേരിക്കയിലേക്ക് കടക്കാന്‍ അദ്ദേഹം തീരുമാനിച്ചു.

1992ല്‍ അമേരിക്കയില്‍ എത്തിയ മസ്‌ക് പെന്‍സില്‍വാനിയ സര്‍വകലാശാലയില്‍ ചേര്‍ന്നു. 1997 ല്‍ സാമ്പത്തിക ശാസ്ത്രത്തിലും ഭൗതികശാസ്ത്രത്തിലും ബിരുദം നേടി. പിന്നീട് 24ാം വയസ്സില്‍ സ്റ്റാന്‍ഫോര്‍ഡിലെ പിഎച്ച്ഡി പ്രോഗ്രാമില്‍ പ്രവേശിച്ചു. എന്നിരുന്നാലും, ഇന്റര്‍നെറ്റ് ലോകത്ത് കൂടുതല്‍ വലിയ അവസരങ്ങള്‍ ഉണ്ടെന്ന് തോന്നിയതിനാല്‍ വെറും രണ്ട് ദിവസത്തിനുശേഷം അദ്ദേഹം പഠനം ഉപേക്ഷിച്ചു.

എലോണിന്റെ പ്രോജക്റ്റുകള്‍ക്ക് എല്ലായ്‌പ്പോഴും ഒരു ദര്‍ശനം ഉണ്ടായിരുന്നു. ഇത് ഒരു വിജയകരമായ ബിസിനസ്സ് കെട്ടിപ്പടുക്കുക മാത്രമല്ല, ലോകത്തെ മെച്ചപ്പെടുത്തുകയും ധാരാളം ആളുകളില്‍ നല്ല സ്വാധീനം ചെലുത്തുകയും ചെയ്യുക എന്നതായിരുന്നു.

1995ല്‍ സിപ്പ് 2 സ്ഥാപിച്ച് എലോണ്‍ തന്റെ സംരംഭക യാത്ര ആരംഭിച്ചു. വിലാസങ്ങള്‍ കണ്ടുപിടിക്കാന്‍ സഹായിക്കുന്ന യെല്ലോ പേജുകളുടെ ഒരു ഇലക്ട്രോണിക് പതിപ്പ് (മാപ്പ് പിന്തുണയോടെ) ഉള്ളത് ആളുകള്‍ക്ക് ഇന്റര്‍നെറ്റിന്റെ സഹായത്തോടെ ഇവ വളരെ എളുപ്പത്തില്‍ തിരയാനും കണ്ടെത്താനും കഴിയും എന്ന ആശയത്തെ അടിസ്ഥാനമാക്കിയാണ് കമ്പനി തുടങ്ങിയത്.

സിപ്പ് 2 1999 ല്‍ 307 മില്യണ്‍ ഡോളറിന് കോംപാക്കിന് വിറ്റു. ഓണ്‍ലൈനില്‍ പണം കൈമാറുന്ന പ്രക്രിയ ലളിതമാക്കിയ കമ്പനിയായ എക്‌സ്.കോം എന്നാണ് മസ്‌ക് തന്റെ അടുത്ത സംരംഭത്തിന് പേരിട്ടത്. 1998ല്‍ പീറ്റര്‍ തീലും മറ്റ് രണ്ട് സഹസ്ഥാപകരും ചേര്‍ന്ന് സ്ഥാപിച്ച കോണ്‍ഫിനിറ്റി എന്ന മറ്റൊരു കമ്പനിയില്‍ നിന്ന് എക്‌സ്.കോമിന് മത്സരം ഉണ്ടായിരുന്നു. ഡോട്ട് കോം ബബിള്‍ സമയത്ത് രണ്ട് കമ്പനികളും പരസ്പരം നേരിട്ട് മത്സരിക്കുന്നത് തുടരുകയാണെങ്കില്‍ ഏത് സമയത്തും പൊട്ടിത്തെറിക്കുമെന്ന് അദ്ദേഹം ഭയപ്പെട്ടിരുന്നുവെന്ന് പീറ്റര്‍ തീല്‍ മനസ്സിലാക്കി.

തല്‍ഫലമായി, എക്‌സ്.കോം 2000ല്‍ കോണ്‍ഫിനിറ്റിയുമായി ലയിച്ചു. കമ്പനിയുടെ പേര് പേപാല്‍ എന്ന് 2001ല്‍ പുനര്‍നാമകരണം ചെയ്തു. ഐപിഒയ്ക്ക് തൊട്ടുപിന്നാലെ 1.5 ബില്യണ്‍ ഡോളറിന് പേപാല്‍ ഇബേ ഏറ്റെടുത്തു.

2002ല്‍ സ്‌പേസ് എക്‌സ്‌പ്ലോറേഷന്‍ ടെക്‌നോളജീസ് (സ്‌പേസ് എക്‌സ്) സ്ഥാപിച്ചപ്പോള്‍ അദ്ദേഹം ഒരു പുതിയ യാത്ര ആരംഭിച്ചു. ബഹിരാകാശ പറക്കലുമായി ബന്ധപ്പെട്ട തന്റെ രണ്ട് പ്രധാന ആശങ്കകള്‍ക്ക് പരിഹാരം തേടുകയായിരുന്നു പിന്നീട്. റോക്കറ്റുകള്‍ വളരെ ചെലവേറിയതാണെന്നും അവ വീണ്ടും ഉപയോഗിക്കാന്‍ സാധിക്കുന്നില്ല എന്നിവയായിരുന്നു ഈ ആശങ്കകള്‍.

സ്‌പേസ് എക്‌സ് രൂപകല്‍പ്പന ചെയ്ത സാങ്കേതികവിദ്യ ഉപയോഗിച്ച് ഈ രണ്ട് വശങ്ങളും ശരിയാക്കാന്‍ അദ്ദേഹം ശ്രമിച്ചു. 2018ല്‍ സ്‌പേസ് എക്‌സ് 'ഫാല്‍ക്കണ്‍ ഹെവി' പുറത്തിറക്കി, അത് അതിന്റെ അടുത്തുള്ള എതിരാളിയുടെ ഇരട്ടി വലുപ്പമുള്ള പേലോഡിനെ ഏകദേശം മൂന്നിലൊന്ന് ചെലവില്‍ വഹിക്കാന്‍ പ്രാപ്തമായിരുന്നു. രണ്ട് വര്‍ഷത്തിന് ശേഷം, 2020ല്‍ സ്‌പേസ് എക്‌സ് രണ്ട് ബഹിരാകാശയാത്രികരെ അന്താരാഷ്ട്ര ബഹിരാകാശ നിലയത്തിലേക്ക് (ഐഎസ്എസ്) കൊണ്ടുപോയ 'ഡ്രാഗണ്‍' വിക്ഷേപിച്ചു. അങ്ങനെ യാത്രികരെ ബഹിരാകാശത്ത് എത്തിക്കുന്ന ആദ്യത്തെ സ്വകാര്യ കമ്പനിയായി സ്‌പേസ് എക്‌സ് മാറി.

എന്നാല്‍ 2020ല്‍ ഏകദേശം 740 ശതമാനം നേട്ടമുണ്ടാക്കിയ ടെസ്‌ല ഷെയറുകളാണ് മസ്‌ക്കിന്റെ മൊത്തം ആസ്തിയുടെ 75%.

ഒരു ഇലക്ട്രിക് കാറിന്റെ ആശയം ടെസ്‌ല തീര്‍ച്ചയായും കണ്ടുപിടിച്ചിട്ടില്ല. വാസ്തവത്തില്‍, ആദ്യത്തെ ഇലക്ട്രിക് കാറുകള്‍ പത്തൊന്‍പതാം നൂറ്റാണ്ടിന്റെ അവസാനമാണ് നിര്‍മ്മിച്ചത്. ലിഥിയം അയണ്‍ ബാറ്ററികള്‍ ഉപയോഗിച്ച് ഓടുന്ന ആദ്യത്തെ ഹൈവേ ലീഗല്‍ പ്രൊഡക്ഷന്‍ കാര്‍ (ദി റോഡ്സ്റ്റര്‍) നിര്‍മ്മിച്ചതിന്റെ അംഗീകാരം ടെസ്‌ലയ്ക്ക് അവകാശപ്പെടാം. 2008ലാണ് റോഡ്സ്റ്റര്‍ ആദ്യമായി ഉപയോക്താക്കള്‍ക്ക് കൈമാറിയത്. ഇതിനെത്തുടര്‍ന്ന് മിത്സുബിഷി, നിസ്സാന്‍ തുടങ്ങിയ കമ്പനികള്‍ സ്വന്തമായി ഇലക്ട്രിക് കാറുകള്‍ നിര്‍മ്മിക്കുകയും അത് വന്‍തോതില്‍ ഉത്പാദിപ്പിക്കുകയും ചെയ്തു. എന്നാല്‍, ടെസ്‌ല വാഹനങ്ങള്‍ അതിന്റെ എതിരാളികളില്‍ നിന്ന് വേറിട്ടുനില്‍ക്കുന്നത് അവയുടെ മികച്ച രൂപകല്‍പ്പനയിലൂടെയാണ്.

ടെസ്‌ല റോഡ്സ്റ്റര്‍ അനാവരണം ചെയ്തപ്പോള്‍ അത് ലോകത്തെ മുഴുവന്‍ അത്ഭുതപ്പെടുത്തി. അതിന്റെ രൂപകല്‍പ്പന ഒരു സ്‌പോര്‍ട്‌സ് കാറിന്റേതാണ്. റോഡ്സ്റ്റര്‍ ഒരു സ്‌പോര്‍ട്‌സ് കാറായതിനാല്‍ വളരെ ചെലവേറിയതും സാധാരണക്കാരന് അപ്രാപ്യവുമായിരുന്നു. ഇത് പരിഹരിക്കാനാണ് ടെസ്‌ല 2012ല്‍ മോഡല്‍ എസ് അവതരിപ്പിച്ചത്. മോഡല്‍ എസിന്റെ വിജയത്തെത്തുടര്‍ന്ന്, ടെസ്‌ല 2015 ല്‍ മോഡല്‍ എക്‌സ് അവതരിപ്പിച്ചു, ഇത് ഒരു ഫാമിലി എസ്‌യുവിയായിരുന്നു ഇത്.

ടെസ്‌ല ഇതിനോടകം തന്നെ 'സൂപ്പര്‍ചാര്‍ജറുകളുടെ' വിപുലമായ ശൃംഖല നിര്‍മ്മിച്ചിരുന്നു. ഈ ചാര്‍ജിംഗ് സ്‌റ്റേഷനുകള്‍ പ്രധാനമായും ടെസ്‌ല വാഹനങ്ങള്‍ ചാര്‍ജ് ചെയ്യുന്നതിനാണ് നിര്‍മ്മിച്ചത്, മാത്രമല്ല എല്ലാ ടെസ്‌ല ഉടമകള്‍ക്കും ഉപയോഗിക്കാന്‍ സൗജന്യവുമായിരുന്നു. ഒരു താങ്ങാനാവുന്ന ഇലക്ട്രിക് കാര്‍ നിര്‍മ്മിക്കുകയെന്ന തന്റെ ലക്ഷ്യം പൂര്‍ത്തീകരിക്കുന്നതിന്, ടെസ്‌ല 2017 ല്‍ 'മോഡല്‍ 3' യുടെ ആദ്യ യൂണിറ്റ് പുറത്തിറക്കി. 500,000 യൂണിറ്റിലധികം വിറ്റ ഈ കാര്‍ ചരിത്രത്തില്‍ ഏറ്റവും കൂടുതല്‍ വിറ്റഴിക്കപ്പെട്ട ഇലക്ട്രിക് കാര്‍ എന്ന റെക്കോര്‍ഡിന് അര്‍ഹത നേടി. ലോകമെമ്പാടുമുള്ള രണ്ടായിരത്തിലധികം സൂപ്പര്‍ചാര്‍ജര്‍ സ്‌റ്റേഷനുകളും താങ്ങാനാവുന്ന ഒരു ഇലക്ട്രിക് കാര്‍ ഓഫറും ഉള്ളതിനാല്‍, ടെസ്‌ലയുടെ മൂല്യനിര്‍ണ്ണയം വളരുന്നതില്‍ അതിശയിക്കാനില്ല.

ടെസ്‌ല ഈ വര്‍ഷം ഇന്ത്യന്‍ വിപണിയില്‍ പ്രവേശിക്കും എന്നാണ് കരുതുന്നത്.