43 ശതമാനം വര്‍ധന, പാസഞ്ചര്‍ വാഹന കയറ്റുമതിയില്‍ വന്‍കുതിപ്പ്
മാരുതി സുസുകി ഇന്ത്യയുടെ പാസഞ്ചര്‍ വാഹന കയറ്റുമതി ഇരട്ടിയിലധികം വര്‍ധിച്ചു
Representational image
പാസഞ്ചര്‍ വാഹന കയറ്റുമതിയില്‍ വന്‍ കുതിപ്പുമായി ഇന്ത്യ. 2022 സാമ്പത്തിക വര്‍ഷത്തിലെ ഇന്ത്യയിലെ പാസഞ്ചര്‍ വാഹനങ്ങളുടെ കയറ്റുമതി 43 ശതമാനത്തോളമാണ് വര്‍ധിച്ചത്. എസ്‌ഐഎഎമ്മിന്റെ (Society of Indian Automobile Manufacturers) കണക്കുകള്‍ പ്രകാരം വിവിധ രാജ്യങ്ങളിലേക്ക് 2.3 ലക്ഷത്തിലധികം യൂണിറ്റുകള്‍ അയച്ച മാരുതി സുസുകിയാണ് കയറ്റുമതിയില്‍ മുന്നിലുള്ളത്. മൊത്തത്തില്‍ 2020-21 സാമ്പത്തിക വര്‍ഷത്തിലെ 4,04,397 യൂണിറ്റിനേക്കാള്‍ 2021-22 സാമ്പത്തിക വര്‍ഷത്തില്‍ 5,77,875 യൂണിറ്റ് വാഹനങ്ങളാണ് ഇന്ത്യയില്‍നിന്ന് കയറ്റുമതി ചെയ്തത്. പാസഞ്ചര്‍ കാര്‍ കയറ്റുമതി 42 ശതമാനം വളര്‍ച്ച നേടി 3,74,986 യൂണിറ്റിലെത്തി. അതേസമയം യൂട്ടിലിറ്റി വാഹന കയറ്റുമതി 46 ശതമാനം ഉയര്‍ന്ന് 2,01,036 യൂണിറ്റിലെത്തി. വാനുകളുടെ കയറ്റുമതി 2020-21 സാമ്പത്തിക വര്‍ഷത്തിലെ 1,648 യൂണിറ്റില്‍ നിന്ന് 2021-22 സാമ്പത്തിക വര്‍ഷത്തില്‍ 1,853 യൂണിറ്റായി ഉയര്‍ന്നു.