എല്‍.ഐ.സിയുടെ വിപണിവിഹിതം ഇടിയുന്നു; സ്വകാര്യ കമ്പനികള്‍ മുന്നേറുന്നു
സ്വകാര്യ ലൈഫ് ഇന്‍ഷുറന്‍സ് കമ്പനികളുടെ വിപണി പങ്കാളിത്തത്തില്‍ ക്രമാനുഗതമായ വളര്‍ച്ച
പുതിയ ബിസിനസ് പ്രീമിയത്തില്‍ (New Business Premium/NBP) ലൈഫ് ഇന്‍ഷുറന്‍സ് കോര്‍പ്പറേഷന്‍ ഓഫ് ഇന്ത്യയുടെ വിപണി വിഹിതം സെപ്റ്റംബറില്‍ 58.50 ശതമാനമായി കുറഞ്ഞു. 2022 സെപ്റ്റംബറിലെ 68.25 ശതമാനത്തില്‍ നിന്ന് 9.75 ശതമാനമാണ് ഇടിഞ്ഞത്. പുതിയ ഉത്പന്നങ്ങളിലും വിതരണത്തിലുമുണ്ടായ കുറവാണ് പ്രീമിയത്തെ ബാധിച്ചത്. അതേസമയം, ഓഗസ്റ്റിലെ 57.37 ശതമാനം വിപണി വിഹിതവുമായി നോക്കുമ്പോള്‍ നേരിയ വര്‍ധനയുണ്ട്.
96 ശതമാനവും ഏജന്റുമാര്‍ വഴി
യുവാക്കള്‍ കൂടുതലും ഓണ്‍ലൈന്‍ വഴി പോളിസികളെടുക്കാന്‍ ആഗ്രഹിക്കുന്ന കാലഘട്ടത്തില്‍ ഏജന്റുമാരെ ആശ്രയിച്ചാണ് പോളിസി വില്‍പനയെന്നതാണ് എല്‍.ഐ.സിക്ക് തിരിച്ചടിയായതെന്ന് ചില അനലിസ്റ്റുകള്‍ അഭിപ്രായപ്പെട്ടു.
എന്നാല്‍, ഈ വാദം അവാസ്തവവും തെറ്റിദ്ധാരണാജനകവുമാണെന്ന് ഓള്‍ ഇന്ത്യ എല്‍.ഐ.സി ഏജന്റ്‌സ് ഫെഡറേഷന്‍ നാഷണല്‍ സെക്രട്ടറി ജനറൽ തോന്നക്കല്‍ രാമചന്ദ്രന്‍ 'ധനംഓണ്‍ലൈന്‍.കോമിനോട്' പറഞ്ഞു. എല്‍.ഐ.സിയുടെ ശക്തി അടിസ്ഥാനപരമായി തന്നെ ഏജന്റുമാരാണ്. ഈ പ്രസ്ഥാനത്തെ വളര്‍ത്തിയതില്‍ മുഖ്യപങ്ക് വഹിച്ചവരും സ്ഥാപനത്തിന്റെ നെടുംതൂണുമാണ് ഏജന്റുമാര്‍. വിപണിവിഹിതം കുറയാന്‍ കാരണം ഏജന്റുമാരെ ആശ്രയിക്കുന്നതാണെന്ന അനലിസ്റ്റുകളുടെ വാദം അതിനാല്‍ ശരിയല്ലെന്നും വിപണിവിഹിതം വളര്‍ത്താന്‍ പിന്തുണയ്ക്കുകയാണ് ഏജന്റുമാര്‍ ചെയ്തിട്ടുള്ളതെന്നും തോന്നക്കല്‍ രാമചന്ദ്രന്‍ പറഞ്ഞു.