എടിഎമ്മില്‍ നിന്ന് ഉപയോഗിക്കാനാവാത്ത നോട്ടുകള്‍ കിട്ടിയാല്‍ എന്ത് ചെയ്യും? അറിയാം!

ബാങ്കിൽ ക്യൂ നിന്നോ ചെക്ക്​ എഴുതി നൽകിയോ പണം ​സ്വീകരിക്കാതെ എ.ടി.എം കാർഡ്​ വഴി എളുപ്പത്തിൽ ഇപ്പോൾ പണം ലഭിക്കും. എന്നാൽ, ഈ നോട്ടുകൾ കീറിയതോ, ഒരു ഭാഗം നഷ്​ടമായതോ അല്ലെങ്കിൽ കഷ്​ണങ്ങളായി മാറിയ നോട്ടുകളോ ആണ്​ വികലമാക്കിയ നോട്ടുകളായി കണക്കാക്കുക. ഈ നോട്ടുകൾ ഉപയോഗിച്ച്​ യാതൊരു ഇടപാടുകളും നടത്താൻ കഴിയി​ല്ല. ഇത്തരത്തിൽ കീറിയ നോട്ടുകൾ ലഭിച്ചാൽ നിങ്ങളുടെ പണം നഷ്​ടമാകുമെന്ന ആശങ്ക വേണ്ട. റിസർവ്​ ബാങ്ക്​ ഓഫ്​ ഇന്ത്യയുടെ ഈ നിർദേശങ്ങൾ പാലിച്ചാൽ മതി.

ഉപയോഗിക്കാനാവാത്ത നോട്ടുകൾ ലഭിച്ചാൽ ഏത്​ ബാങ്കിന്‍റെ എ.ടി.എമ്മിൽനിന്നാണോ പണം പിൻവലിച്ചത്​ ആ ബാങ്കിലെത്തണം. എ.ടി.എമ്മിൽനിന്ന്​ പണം ലഭിച്ചപ്പോൾ കിട്ടിയ സ്ലിപ്പിനൊപ്പം കീറിയ നോട്ടുകളും പണം പിൻവലിച്ച സമയം, തീയതി, എ.ടി.എം സ്​ഥിതി ചെയ്യുന്ന സ്​ഥലം എന്നിവ​ എഴുതിചേർത്ത അപേക്ഷയും നൽകണം. പണം പിൻവലിച്ചതിന്‍റെ സ്ലിപ്പ്​ ഇല്ലെങ്കിൽ മൊബൈൽ ഫോണിൽ പണം പിൻവലിച്ചത്​ സംബന്ധിച്ചുവന്ന മെസേജ്​ രേഖയായി നൽകിയാലും മതിയാകും. പിന്നീട്​ ബാങ്ക്​ അപേക്ഷ പരിശോധിച്ച ശേഷം കീറിയ നോട്ടുകൾക്ക്​ പകരം പുതിയ നോട്ടുകൾ നൽകും.

തങ്ങൾ എ.ടി.എമ്മുകളിൽ പണം നിറയ്​ക്കുന്നതിന്​ മുമ്പ്​ അത്യാധുനിക മെഷീൻ ഉപയോഗിച്ച്​ പരിശോധിക്കും. അതിനാൽ തന്നെ വികലമാക്കിയ നോട്ടുകൾ ലഭിക്കാൻ സാധ്യതയില്ല. എങ്കിലും ഇത്തരം നോട്ടുകൾ ലഭിക്കുകയാണെങ്കിൽ തൊട്ടടുത്ത ബ്രാഞ്ച്​ സന്ദർശിച്ചാൽ മതിയാകും' -ഒരു ഉപഭോക്താവ്​ ട്വിറ്ററിൽ പങ്കുവെച്ച ചോദ്യത്തിന് മറുപടിയായി സ്​റ്റേറ്റ്​ ബാങ്ക്​ ഓഫ്​ ഇന്ത്യയുടെ പ്രതിനിധി കുറിച്ചു.

എസ് ​ബി ഐയുടെ *https://crcf.sbi.co.in/ccf/* എന്ന ലിങ്ക്​ വഴിയും നോട്ടുകളുമായി ബന്ധപ്പെട്ട പരാതികൾ ഉന്നയിക്കാം. എസ്​.ബി.ഐയുടെ എ.ടി.എം സേവനങ്ങൾക്കായിരിക്കും ഈ ഓൺലൈൻ സേവനം ലഭ്യമാകുക.

വികലമാക്കപ്പെട്ട നോട്ടുകൾ മാറി നൽകുന്നതിനുള്ള റിസർവ്​ ബാങ്കിന്‍റെ നി​ർദേശങ്ങൾ ബാങ്ക്​ ജീവനക്കാർ ലംഘിച്ചാൽ ഉപഭോക്താക്കൾക്ക്‌ പരാതി നൽകാൻ സാധിക്കും. ബാങ്കിനെതിരെ 10,000 രൂപ വരെ പിഴ ഈടാക്കാനും കഴിയും.