റഷ്യന്‍ ക്രൂഡിന് മേലുള്ള ഉപരോധം, ക്രൂഡ് ഓയ്ല്‍ വില 200 ഡോളര്‍ കടക്കുമോ?
നിലവില്‍ എണ്ണ ഉപരോധമില്ലാഞ്ഞിട്ടും ക്രൂഡ് ഓയ്ല്‍ വില കുതിക്കുകയാണ്
റഷ്യയില്‍നിന്നുള്ള ക്രൂഡ് ഓയ്‌ലും പ്രകൃതി വാതകവും വിലക്കാന്‍ അമേരിക്കയിലെ ഭരണ-പ്രതിപക്ഷ അംഗങ്ങള്‍ ധാരണയായതോടെ ആഗോളവിപണയില്‍ ക്രൂഡ് ഓയ്ല്‍ വില 200 ഡോളറും കടന്ന് കുതിക്കുമോ എന്ന ആശങ്കയിലാണ് ലോകം. അമേരിക്കയില്‍ റഷ്യക്കെതിരേ പൊതുജനരോഷം ഉയര്‍ന്നതോടെയാണ് യുഎസില്‍ റഷ്യന്‍ എനര്‍ജി ഇറക്കുമതി നിയമം അവതരിപ്പിച്ചത്. നേരത്തെ, പണപ്പെരുപ്പവും ഉയര്‍ന്ന ഇന്ധന വിലയും കാരണം പ്രസിഡന്റ് ജോ ബൈഡന്റെ ഭരണകൂടം എണ്ണ നിരോധനത്തെ എതിര്‍ത്തിരുന്നു. എന്നാല്‍ നിലവില്‍ തീരുമാനമൊന്നും എടുത്തിട്ടില്ലെങ്കിലും നിരോധനത്തെക്കുറിച്ച് സഖ്യകക്ഷികളുമായി ചര്‍ച്ചയിലാണെന്ന് വൈറ്റ് ഹൗസ് ഇപ്പോള്‍ പറയുന്നു. യുഎസ് ഇറക്കുമതി ചെയ്യുന്ന എണ്ണയുടെയും പെട്രോളിയം ഉല്‍പന്നങ്ങളുടെയും 10 ശതമാനത്തില്‍ താഴെ മാത്രമാണ് റഷ്യയുടെ പങ്ക്. എന്നിരുന്നാലും ഇത് ആഗോളതലത്തില്‍ വന്‍ പ്രത്യാഘാതങ്ങള്‍ സൃഷ്ടിക്കുമെന്ന് റഷ്യയും മുന്നറിയിപ്പ് നല്‍കിയിട്ടുണ്ട്.