44,000 ഡോളറില്‍ താഴേക്ക് പോയി ബിറ്റ്കോയിന്; ക്രിപ്റ്റോ കറന്‍സികള്‍ ഇടിവില്‍
നവംബറിലെ മൂല്യവുമായി താരതമ്യം ചെയ്യുമ്പോള്‍ 25000 ഡോളറോളമാണ് ബിറ്റ്‌കോയിന്റെ ഇടിവ്.
ക്രിപ്റ്റോകറന്‍സി വില ഇന്ന് വീണ്ടും ഇടിഞ്ഞു. ഏറ്റവുമധികം മാര്‍ക്കറ്റ് കാപിറ്റലൈസേഷന്‍ ഉള്ള ബിറ്റ്കോയിന് 44,000 ഡോളറില്‍ താഴെയായി. ഡിസംബറിലെ ഫ്‌ളാഷ് ക്രാഷിന് ശേഷമുള്ള ഏറ്റവും താഴ്ന്ന നിലയിലേക്കാണ് ബിറ്റ്കോയിന് ഇടിഞ്ഞത്. ഏകദേശം 7% കുറഞ്ഞ് 43,028.00 എന്ന നിലയിലാണ് വ്യാപാരം നടക്കുന്നത്.
ഏറെ ചാഞ്ചാട്ടത്തിന് പേരുകേട്ട ബിറ്റ്കോയിന്,നവംബര്‍ ആദ്യം ഏകദേശം 69,000 ഡോളര്‍ എന്ന റെക്കോര്‍ഡ് ഉയരത്തില്‍ എത്തിയിരുന്നു. അതിനുശേഷം 25,000-ലധികം കുറവാണ് ഇപ്പോള്‍ രേഖപ്പെടുത്തുന്നത്.
രണ്ടാമത്തെ വലിയ ക്രിപ്റ്റോകറന്‍സിയും ബ്ലോക്ക്ചെയിനുമായി ബന്ധിപ്പിച്ചിട്ടുള്ള നാണയവുമായ ഈഥറും 8% ത്തില്‍ കൂടുതല്‍ ഇടിഞ്ഞ് 3,494 ഡോളറിലേക്ക് പതിച്ചു. കോയിന്‍ ഡെസ്‌ക് റിപ്പോര്‍ട്ട് ചെയ്യുന്നത് പ്രകാരം, ഡോഷ്‌കോയിന്‍ / Dogecoin വിലകള്‍ ഏകദേശം 6% ഇടിഞ്ഞ് 0.15 ഡോളര്‍ ആയി. ഷിബ ഇനു 7% കുറഞ്ഞ് 0.000030 ഡോളറായപ്പോള്‍ ബിനാന്‍സ് കോയിന്‍ 7 ശതമാനം ഇടിഞ്ഞ് 476 ഡോളറിലെത്തി.
അതേസമയം, സോളാന, പോളിഗോണ്‍, യൂണിസ്വാപ്പ്, സ്റ്റെല്ലാര്‍, കാര്‍ഡാനോ, എക്‌സ്ആര്‍പി, ടെതര്‍, ലിറ്റ്‌കോയിന്‍ തുടങ്ങിയ മറ്റ് ഡിജിറ്റല്‍ ടോക്കണുകളും കഴിഞ്ഞ 24 മണിക്കൂറിനുള്ളില്‍ 5-7% പരിധിയില്‍ ഇടിവ് രേഖപ്പെടുത്തി. ആഗോള ക്രിപ്റ്റോ വിപണി മൂലധനം 6% ഇടിഞ്ഞ് 2.22 ട്രില്യണ്‍ ഡോളറിലെത്തി.