സാമ്പത്തിക കാര്യങ്ങളില്‍ ഒക്ടോബര്‍ മുതലുള്ള ഈ മാറ്റങ്ങള്‍ അറിയാം

ഒക്ടോബര്‍ ഒന്ന് മുതല്‍ നിരവധി സാമ്പത്തിക കാര്യങ്ങളില്‍ മാറ്റം വരികയാണ്. കൂടാതെ പല കാര്യങ്ങളുടെയും സമയപരിധി ഈ മാസം അവസാനിക്കുകയാണ്. പുതിയ ടി.സി.എസ് നിയമം, പ്രത്യേക എഫ്.ഡി നിയമം, പുതിയ ഡെബിറ്റ്/ ക്രെഡിറ്റ് കാര്‍ഡ് നിയമം തുടങ്ങി ഈ ഒക്ടോബറിലെ വിവിധ മാറ്റങ്ങളറിയാം.

ടി.സി.എസ് നിയമം

2023 ഒക്ടോബര്‍ 1ന് സ്രോതസ്സില്‍ നിന്നുള്ള നികുതി ശേഖരണത്തിന്റെ (TCS) പുതിയ നിയമം പ്രാബല്യത്തില്‍ വരും. നിങ്ങള്‍ വിദേശത്തേക്ക് ഒരു യാത്ര നടത്തുകയോ, വിദേശ ഓഹരികള്‍, മ്യൂച്വല്‍ ഫണ്ടുകള്‍ അല്ലെങ്കില്‍ ക്രിപ്റ്റോകറന്‍സികള്‍ എന്നിവയില്‍ നിക്ഷേപിക്കുകയോ, തുടര്‍ വിദ്യാഭ്യാസത്തിനായി വിദേശത്തേക്ക് പോകുകയോ ചെയ്യുമ്പോള്‍ ഒരു സാമ്പത്തിക വര്‍ഷത്തില്‍ നിങ്ങളുടെ ചെലവ് ഒരു നിശ്ചിത പരിധി കവിയുന്നുവെങ്കില്‍ നിങ്ങള്‍ ടി.സി.എസ് നല്‍കേണ്ടി വരും.

റിസര്‍വ് ബാങ്കിന്റെ (ആര്‍.ബി.ഐ) ലിബറലൈസ്ഡ് റെമിറ്റന്‍സ് സ്‌കീം (എല്‍.ആര്‍.എസ്) പ്രകാരം ഒരു സാമ്പത്തിക വര്‍ഷത്തില്‍ 2.5 ലക്ഷം ഡോളര്‍ വരെ അയയ്ക്കാനാകും. മെഡിക്കല്‍, വിദ്യാഭ്യാസ ചെലവുകള്‍ ഒഴികെ ഒരു സാമ്പത്തിക വര്‍ഷത്തിനുള്ളില്‍ നടത്തിയ 7 ലക്ഷം രൂപയ്ക്ക് മുകളിലുള്ള എല്ലാ അന്താരാഷ്ട്ര പണമയയ്ക്കലുകള്‍ക്കും 20% ടി.സി.എസ് ഒക്ടോബര്‍ 1 മുതല്‍ നല്‍കേണ്ടി വരും.

ഡെബിറ്റ്/ ക്രെഡിറ്റ് കാര്‍ഡ് നിയമം

ഡെബിറ്റ് കാര്‍ഡ്, ക്രെഡിറ്റ് കാര്‍ഡ് അല്ലെങ്കില്‍ പ്രീപെയ്ഡ് കാര്‍ഡ് എന്നിവയ്ക്കായി നെറ്റ്വര്‍ക്ക് പ്രൊവൈഡറെ തിരഞ്ഞെടുക്കുന്നതിനുള്ള ഓപ്ഷന്‍ നല്‍കണമെന്ന് റിസര്‍വ് ബാങ്ക് നിര്‍ദ്ദേശിച്ചിരുന്നു. വിസ (VISA), മാസ്റ്റര്‍ കാര്‍ഡ് (Master Card) തുടങ്ങി ബാങ്ക് സെര്‍വറുകളുമായി ബന്ധിപ്പിക്കുന്ന അഞ്ച് നെറ്റ്വര്‍ക്ക് പ്രൊവൈഡര്‍മാരാണ് രാജ്യത്തുള്ളത്. ഇപ്പോള്‍ ഡെബിറ്റ് അല്ലെങ്കില്‍ ക്രെഡിറ്റ് കാര്‍ഡിനായി അപേക്ഷിക്കുമ്പോള്‍ നെറ്റ്വര്‍ക്ക് ദാതാവിനെ സാധാരണയായി നിര്‍ണ്ണയിക്കുന്നത് കാര്‍ഡ് നല്‍കുന്നവരാണ്.

ഒക്ടോബര്‍ 1 മുതല്‍ ബാങ്ക് ഒന്നിലധികം ഉപയോക്താക്കള്‍ക്ക് അവരുടെ ഇഷ്ടപ്പെട്ട കാര്‍ഡ് നെറ്റ്വര്‍ക്ക് തിരഞ്ഞെടുക്കാനുള്ള ഓപ്ഷന്‍ ബാങ്കുകള്‍ നല്‍കണമെന്നും റിസര്‍വ് ബാങ്ക് ആവശ്യപ്പെട്ടു. ഈ ഓപ്ഷന്‍ ഇഷ്യൂ ചെയ്യുന്ന സമയത്തോ തുടര്‍ന്നുള്ള ഏത് സമയത്തും ഉപഭോക്താക്കള്‍ക്ക് ഉപയോഗിക്കാവുന്നതാണ്.

നിക്ഷേപ കാലാവധികളിലെ മാറ്റം

* ഇന്ത്യന്‍ ബാങ്ക്

പൊതുമേഖലാ ബാങ്കായ ഇന്ത്യന്‍ ബാങ്ക് ഉയര്‍ന്ന പലിശ നിരക്കിലുള്ള 'ഇന്‍ഡ് സൂപ്പര്‍ 400', 'ഇന്‍ഡ് സുപ്രീം 300 ഡേയ്സ്' എന്നീ പ്രത്യേക സ്ഥിര നിക്ഷേപങ്ങള്‍ കാലാവധി ഒക്ടോബര്‍ 31 വരെ നീട്ടി.

* എസ്.ബി.ഐ

എസ്.ബി.ഐയുടെ മുതിര്‍ന്ന പൗരന്മാര്‍ക്കുള്ള വീകെയര്‍ പദ്ധതിയുടെ കാലാവധി സെപ്റ്റംബര്‍ 30ന് അവസാനിക്കും. അതേസമയം ബാങ്ക് ഈ സമയപരിധി നീട്ടാന്‍ സാധ്യതയുണ്ട്.

* ഐ.ഡി.ബി.ഐ

ഐ.ഡി.ബി.ഐ 375, 444 ദിവസത്തെ നിബന്ധനകളോടെ അമൃത് മഹോത്സവ് എഫ്.ഡി എന്ന പേരില്‍ ഒരു പുതിയ സ്ഥിര നിക്ഷേപ പദ്ധതി ആരംഭിച്ചിരുന്നു. ഈ പ്രത്യേക സ്ഥിര നിക്ഷേപ പദ്ധതിയില്‍ നിക്ഷേപിക്കാനുള്ള സമയപരിധി 2023 ഒക്ടോബര്‍ 31 ആണ്.

എല്‍.ഐ.സി പുനരുജ്ജീവന കാമ്പയിന്‍

കാലഹരണപ്പെട്ട പോളിസികള്‍ വീണ്ടും സജീവമാക്കുന്നതിനായി ലൈഫ് ഇന്‍ഷുറന്‍സ് കോര്‍പ്പറേഷന്‍ (എല്‍.ഐ.സി) ഒരു പ്രത്യേക കാമ്പെയ്ന്‍ ആരംഭിച്ചിരുന്നു. വ്യക്തിഗത പോളിസികള്‍ക്കായി 2023 സെപ്റ്റംബര്‍ 1 മുതല്‍ പ്രത്യേക റിവൈവല്‍ കാമ്പെയ്‌നും നടന്നുവരുന്നുണ്ട്. ഇത് ഒക്ടോബര്‍ 31ന് അവസാനിക്കും.