മുംബൈയില്‍ 41 കോടിയുടെ അപ്പാര്‍ട്ട്‌മെന്റ് സ്വന്തമാക്കി മണപ്പുറം എം.ഡി വി.പി നന്ദകുമാര്‍
മണപ്പുറം കുടുംബം മുംബൈയില്‍ നടത്തുന്ന ആദ്യ നിക്ഷേപമാണിത്
Image: Canva
മണപ്പുറം ഫിനാന്‍സ് മാനേജിംഗ് ഡയറക്ടറും സി.ഇ.ഒയുമായ വി.പി നന്ദകുമാര്‍ മുംബൈയില്‍ അപ്പാര്‍ട്ട്‌മെന്റ് സ്വന്തമാക്കി. 41.25 കോടി രൂപ മുടക്കിയാണ് കടലിന് അഭിമുഖമായി നില്‍ക്കുന്ന അപ്പാര്‍ട്ട്‌മെന്റ് വാങ്ങിയത്. 4,500 ചതുരശ്രയടി വിസ്തീര്‍ണമുള്ളതാണ് ആഡംബര ഭവനം.
വെസ്റ്റ് ബാന്ദ്രയിലെ പ്രൈം കാര്‍ട്ടര്‍ റോഡിലാണ് ഈ അപ്പാര്‍ട്ട്‌മെന്റ്. അതിസമ്പന്നരായ സെലിബ്രിറ്റികള്‍ ഉള്‍പ്പെടെയുള്ളവര്‍ ഇവിടെ നിക്ഷേപം നടത്തിയിട്ടുണ്ട്. ബംഗളൂരു ആസ്ഥാനമായ നോബ്രോക്കര്‍ എന്ന റിയല്‍ എസ്റ്റേറ്റ് കമ്പനിയാണ് ഇടപാട് സാധ്യമാക്കിയത്.
സ്റ്റാമ്പ് ഡ്യൂട്ടി 2.3 കോടി രൂപ
'മണികണ്‍ട്രോള്‍' റിപ്പോര്‍ട്ട് ചെയ്യുന്നതനുസരിച്ച് ഈ അപ്പാര്‍ട്ട്‌മെന്റിന്റെ സ്റ്റാമ്പ് ഡ്യൂട്ടി 2.3 കോടി രൂപയാണ്. ഏപ്രിലില്‍ ഇടപാട് പൂര്‍ത്തിയാക്കിയെന്നാണ് റിപ്പോര്‍ട്ട്. രഹേജ ഡെവലപ്പേഴ്‌സില്‍ നിന്നാണ് വി.പി. നന്ദകുമാര്‍ ഉടമസ്ഥാവകാശം സ്വന്തമാക്കിയത്.
മണപ്പുറം കുടുംബം മുംബൈയില്‍ നടത്തുന്ന ആദ്യ നിക്ഷേപമാണിത്. മുംബൈയിലെ ബിസിനസ് കൈകാര്യം ചെയ്യുന്ന മകന് താമസിക്കാനാണ് നന്ദകുമാര്‍ ഈ അപ്പാര്‍ട്ട്‌മെന്റ് വാങ്ങിയതെന്ന് റിപ്പോര്‍ട്ടില്‍ പറയുന്നു.
17,649 കോടി രൂപ വിപണിമൂല്യമുള്ള കമ്പനിയാണ് മണപ്പുറം ഫിനാന്‍സ്. രാജ്യത്തുടനീളം ശാഖകളുള്ള കമ്പനിയുടെ മാര്‍ച്ചില്‍ അവസാനിച്ച സാമ്പത്തിക വര്‍ഷത്തെ വരുമാനം 8,848 കോടി രൂപയാണ്. അറ്റലാഭം 2,197 കോടി രൂപയും.