ഇലക്ട്രിക് ചക്കിലൂടെ ലൈവ് വെളിച്ചെണ്ണ നിര്‍മാണം

സ്വന്തം നാട്ടില്‍ ആളുകൂടുന്ന ജംഗ്ഷനില്‍ ചെറിയ വെളിച്ചെണ്ണ മില്ല് സ്ഥാപിച്ചു ഗുണമേന്മയുള്ള വെളിച്ചെണ്ണ എല്ലാവരും കാണ്‍കെ നിര്‍മിച്ച് നാട്ടുകാര്‍ക്ക് വില്‍ക്കുക എന്നത് മികച്ച സംരംഭമാണ്. ഈ സംരംഭത്തിന് ഉപയോഗിക്കുന്നത് ഇലക്ട്രിക്ക് ചക്കാണ്. മുമ്പ് പാരമ്പര്യ രീതിയില്‍ എണ്ണ ആട്ടാന്‍ ഉപയോഗിച്ചിരുന്ന ചക്കിനെ നവീകരിച്ച് ചെറുതാക്കിയ ഇലക്ട്രിക്ക് മോഡലാണിത്. ചെറിയ സ്ഥലസൗകര്യത്തിലും സ്ഥാപിക്കാം എന്നതും സ്ത്രീകള്‍ക്ക് പോലും പ്രവര്‍ത്തപ്പിക്കാം എന്നതുമാണ് ഉല്‍പ്പാദനപ്രക്രിയ സുഗമമാക്കുന്ന ഘടകങ്ങള്‍. ഉല്‍പ്പാദന പ്രക്രിയയില്‍ ചൂട് വര്‍ധിക്കുന്നില്ലാത്തതിനാല്‍ ഗുണമേന്മയുള്ള വെളിച്ചെണ്ണയും ലഭിക്കും. ആട്ടിയെടുക്കുന്ന വെളിച്ചെണ്ണ സ്റ്റീല്‍ ബോണികളില്‍ രണ്ട് ദിവസം സൂക്ഷിച്ച് വച്ചാല്‍ തെളിഞ്ഞ വെളിച്ചെണ്ണ പകര്‍ത്തിയെടുക്കാന്‍ സാധിക്കും.