ജപ്പാനില്‍ ഡ്രൈവർമാർക്ക് വന്‍ അവസരങ്ങള്‍, ₹1.5 ലക്ഷം ശമ്പളം, വീസ പ്രക്രിയകള്‍ ലളിതമാക്കി രാജ്യം
ജപ്പാനിലെ ഗതാഗത മേഖല കാര്യക്ഷമതയ്ക്കും സാങ്കേതിക നവീകരണത്തിനും ലോക പ്രശസ്തമാണ്
Image Courtesy: Canva
ജപ്പാനിലെ അതിവേഗം വികസിച്ചു കൊണ്ടിരിക്കുന്ന ഗതാഗത മേഖലയിൽ തൊഴിലന്വേഷകർക്ക് അവസരങ്ങള്‍. ടാക്സി, ബസ്, ട്രക്ക് ഡ്രൈവർമാർ എന്നിവരെ ഉള്‍പ്പെടുത്തി ജപ്പാൻ സ്‌പെസിഫൈഡ് സ്കിൽഡ് വർക്കർ (എസ്.എസ്.ഡബ്ല്യു) വീസ പ്രോഗ്രാമിൻ്റെ വിപുലീകരണം പ്രഖ്യാപിച്ചു.
ജപ്പാനിലെ ഗതാഗത ഇൻഫ്രാസ്ട്രക്ചർ കാര്യക്ഷമതയ്ക്കും സുരക്ഷയ്ക്കും സാങ്കേതിക നവീകരണത്തിനും ലോക പ്രശസ്തമാണ്. ഭൂമിയിലെ ഏറ്റവും മനോഹരമായ രാജ്യങ്ങളിലൊന്നിലൂടെ വാഹനമോടിക്കാന്‍ കഴിയുക എന്നത് ഏതൊരാളെയും മോഹിപ്പിക്കുന്നതാണ്.
പ്രായമാകുന്ന ജനസംഖ്യയും കുറഞ്ഞുവരുന്ന തൊഴിൽ ശക്തിയും ജപ്പാന്‍ അഭിമുഖീകരിക്കുന്ന വെല്ലുവിളികാണ്. അതിനാൽ വിദഗ്ധരായ വിദേശ തൊഴിലാളികളെ രാജ്യത്തേക്ക് ക്ഷണിക്കുന്നതില്‍ അധികൃതര്‍ പ്രത്യേക താല്‍പ്പര്യമാണ് എടുക്കുന്നത്.
പ്രതിവര്‍ഷം 18 ലക്ഷം മുതല്‍ 30 ലക്ഷം രൂപ വരെയാണ് ഡ്രൈവര്‍മാര്‍ക്ക് ലഭിക്കുന്ന വരുമാനം. കുടുംബത്തെ രാജ്യത്തേക്ക് കൊണ്ടു വരുന്നതിനുളള സാധ്യതയും ലളിതമാണ്. 2025 ജനുവരി മുതല്‍ എസ്.എസ്.ഡബ്ല്യു പ്രോഗ്രാമിൻ്റെ വിപുലീകരണം നടപ്പാക്കുമെന്നാണ് കരുതുന്നത്.
ജപ്പാനിൽ ഡ്രൈവിംഗ് ജോലികൾക്കുള്ള യോഗ്യതാ മാനദണ്ഡങ്ങള്‍ ഇവയാണ്
ജപ്പാനില്‍ സാധുവായ ഡ്രൈവിംഗ് ലൈസൻസ് ഉണ്ടായിരിക്കുക.
നൈപുണ്യ, ഭാഷാ പരീക്ഷകളില്‍ വിജയം: ഡ്രൈവിംഗ് നൈപുണ്യ പരിശോധനയും ജാപ്പനീസ് ഭാഷാ പ്രാവീണ്യ പരിശോധനയും ഉൾപ്പെടുന്നു (സാധാരണയായി ഭാഷാ പരിജ്ഞാനത്തിന് JLPT N4 അല്ലെങ്കിൽ തത്തുല്യ യോഗ്യതകളാണ് പരിഗണിക്കുന്നത്).
ശാരീരിക യോഗ്യതകൾ: വ്യക്തമായ കാഴ്ചയും നല്ല ശാരീരിക ക്ഷമതയും പ്രധാനമാണ്.
പ്രവര്‍ത്തി പരിചയം: ട്രക്കുകൾ പോലുളള വാഹനങ്ങള്‍ ഓടിക്കാന്‍ മുൻകാല ഡ്രൈവിംഗ് പരിചയത്തിന് മുൻഗണന നൽകുന്നുണ്ട്.
ജോബ് പോർട്ടലുകൾ: ഗൈജിൻപോട്ട് ജോബ്‌സ്, ഡെയ്‌ജോബ്, ജപ്പാൻഡ്രൈവർ (GaijinPot Jobs, Daijob, JapanDriver) തുടങ്ങിയ വെബ്‌സൈറ്റുകൾ വൈദഗ്ധ്യമുള്ള തൊഴിലാളികള്‍ക്ക് അവസരങ്ങള്‍ വാഗ്ദാനം ചെയ്യുന്നു.
അപേക്ഷാ പ്രക്രിയ
ഒരു ജോലി കണ്ടെത്തുക: നിങ്ങളുടെ എസ്.എസ്.ഡബ്ല്യു വീസ സ്പോൺസർ ചെയ്യാൻ തയ്യാറുള്ള ഒരു ജാപ്പനീസ് കമ്പനിയിൽ നിന്ന് തൊഴിൽ ഓഫർ ഉറപ്പാക്കുക.
യോഗ്യത പരിശോധിക്കുക: ഡ്രൈവിംഗ് പരിചയം, ഭാഷ, ശാരീരിക ക്ഷമത എന്നിവ ഉൾപ്പെടെ എല്ലാ മാനദണ്ഡങ്ങളും നിങ്ങൾ പാലിക്കുന്നുണ്ടെന്ന് ഉറപ്പാക്കുക.
വീസ സർട്ടിഫിക്കറ്റിനായി അപേക്ഷിക്കുക (COE, Certificate of Eligibility): നിങ്ങളുടെ തൊഴിലുടമയാണ് ഇതിന് വേണ്ടി അപേക്ഷിക്കേണ്ടത്.
വീസ അപേക്ഷ സമർപ്പിക്കുക: സി.ഒ.ഇ ലഭിച്ചുകഴിഞ്ഞാൽ, നിങ്ങളുടെ പ്രാദേശിക ജാപ്പനീസ് കോൺസുലേറ്റിലോ എംബസിയിലോ എസ്.എസ്.ഡബ്ല്യു വീസയ്ക്കായി അപേക്ഷിക്കാവുന്നതാണ്.
ജപ്പാനിൽ എത്തിയാല്‍ അധിക പരീക്ഷകളിൽ വിജയിക്കുക: ചില സാഹചര്യങ്ങളിൽ, ജോലിസ്ഥലത്ത് പരിശീലനവും പ്രാദേശിക ലൈസൻസിംഗ് ടെസ്റ്റുകളും ആവശ്യമായി വന്നേക്കാം.
കുടുംബം: എല്ലാ നടപടി ക്രമങ്ങളും പൂര്‍ത്തിയായാല്‍ നിങ്ങളുടെ കുടുംബത്തെ ജപ്പാനിലേക്ക് കൊണ്ടു വരുന്നതിനുളള സാധ്യതകള്‍ പരിശോധിക്കാവുന്നതാണ്. കുടുംബത്തെ കൊണ്ടു വരുന്നതിന് ചില വ്യവസ്ഥകൾ ബാധകമായേക്കാമെന്ന കാര്യം ശ്രദ്ധിക്കേണ്ടതുണ്ട്.