യു.പി.ഐ പേയ്‌മെൻ്റുകൾക്കായി ക്രെഡിറ്റ് കാർഡ് ഉപയോഗിക്കുന്നത് എങ്ങനെ?

യൂണിഫൈഡ് പേയ്‌മെൻ്റ് ഇൻ്റർഫേസ് (യു.പി.ഐ) ഇടപാടുകൾ 2024 ഡിസംബറിൽ 1673 കോടി എന്ന റെക്കോഡ് നിരക്കിലെത്തിയിരിക്കുകയാണ്. നവംബറില്‍ 1548 കോടി യു.പി.ഐ ഇടപാടുകളാണ് നടന്നതെന്നും നാഷണൽ പേയ്‌മെൻ്റ് കോർപ്പറേഷൻ ഓഫ് ഇന്ത്യ (എൻ.പി.സി.ഐ) വ്യക്തമാക്കുന്നു.

ഇടപാടുകള്‍ക്കായി ക്രെഡിറ്റ് കാർഡ് ഉപയോക്താക്കള്‍ ഡിജിറ്റൽ പേയ്‌മെൻ്റുകള്‍ തിരഞ്ഞെടുക്കുന്ന പ്രവണതയും വര്‍ധിച്ചു വരികയാണ്. യു.പി.ഐ പേയ്‌മെൻ്റുകൾക്കായി ക്രെഡിറ്റ് കാർഡുകൾ എങ്ങനെ ഉപയോഗിക്കാമെന്നാണ് ഇവിടെ പരിശോധിക്കുന്നത്.

ആദ്യമായി യു.പി.ഐ ആപ്പ് ഡൗൺലോഡ് ചെയ്യുകയാണ് വേണ്ടത്.

ക്രെഡിറ്റ് കാർഡ് യുപിഐയുമായി ലിങ്ക് ചെയ്യുക: യുപിഐ ആപ്പ് തുറന്ന് 'പേയ്‌മെൻ്റ് രീതി ചേർക്കുക' (add payment method) വിഭാഗത്തിലേക്ക് പോകുക. ക്രെഡിറ്റ് കാർഡ് ഓപ്‌ഷൻ തിരഞ്ഞെടുത്ത് നിങ്ങളുടെ കാർഡിൽ സൂചിപ്പിച്ചിരിക്കുന്ന ക്രെഡിറ്റ് കാർഡ് നമ്പർ, സി.വി.വി (CVV), കാലഹരണപ്പെടുന്ന തീയതി എന്നിവ പോലുള്ള വിശദാംശങ്ങൾ നല്‍കുക. തുടര്‍ന്ന് നിങ്ങളുടെ രജിസ്റ്റർ ചെയ്ത ഫോൺ നമ്പറിലേക്ക് ഒറ്റത്തവണ പാസ്‌വേഡ് (OTP) ലഭിക്കുന്നതാണ്.

യു.പി.ഐ ഐഡി സൃഷ്ടിക്കുക: നിങ്ങളുടെ ക്രെഡിറ്റ് കാർഡ് ഉപയോഗിച്ച് ഒരു യു.പി.ഐ ഐഡി സൃഷ്‌ടിക്കുക. അക്കങ്ങൾ, അക്ഷരങ്ങൾ, ചിഹ്നങ്ങൾ എന്നിവ ഉള്‍പ്പെടുന്നതാണ് യു.പി.ഐ ഐഡി. നിങ്ങളുടെ ബാങ്ക് അക്കൗണ്ടുമായി ലിങ്ക് ചെയ്‌തിരിക്കുന്ന ഈ ഐഡി യു.പി.ഐ വഴി പണം അടയ്ക്കാനും സ്വീകരിക്കാനും സഹായിക്കും. നിങ്ങളുടെ യു.പി.ഐ ഐഡി പരിശോധിക്കുന്നതിനായി ആപ്പിലെ പ്രൊഫൈൽ വിഭാഗത്തിലേക്ക് പ്രവേശിച്ച് 'യു.പി.ഐ ഐഡി' എന്ന ഓപ്ഷന്‍ തിരഞ്ഞെടുക്കുക.

ക്യുആർ കോഡ് സ്‌കാൻ ചെയ്തോ 'പേ ഫോൺ നമ്പർ' അല്ലെങ്കിൽ 'പേ കോൺടാക്‌റ്റുകൾ' പോലുള്ള ഓപ്ഷനുകൾ തിരഞ്ഞെടുത്തോ ക്രെഡിറ്റ് കാർഡുകൾ വഴി യു.പി.ഐ പേയ്മെന്റുകള്‍ നടത്താം. നിങ്ങൾക്ക് ഒരു അക്കൗണ്ടിൽ നിന്ന് മറ്റൊന്നിലേക്ക് പണം കൈമാറുന്നതിനായി 'സ്വയം കൈമാറ്റം' (self-transfer) ഓപ്ഷനും തിരഞ്ഞെടുക്കാം.

ആപ്പ് ക്യു.ആര്‍ കോഡോ ഫോൺ നമ്പറോ കോൺടാക്റ്റ് നമ്പറോ പരിശോധിച്ച് കഴിഞ്ഞാൽ, കൈമാറ്റം ചെയ്യേണ്ട തുക നൽകുക.

ട്രാൻസ്ഫർ ചെയ്യേണ്ട തുക നൽകിയ ശേഷം, പണമയയ്ക്കാന്‍ ക്രെഡിറ്റ് കാർഡ് തിരഞ്ഞെടുക്കുക.

നിങ്ങളുടെ ഇടപാട് പ്രോസസ് ചെയ്യുന്നതിനായി പിൻ നൽകിയാല്‍ പേയ്‌മെൻ്റ് പൂർത്തിയാകുന്നതാണ്.

നിലവിൽ റുപേ ക്രെഡിറ്റ് കാർഡുകൾ മാത്രമാണ് യു.പി.ഐ ആപ്പുകളുമായി ലിങ്ക് ചെയ്യാൻ എൻ.പി.സി.ഐ അനുവദിക്കുന്നത് എന്ന കാര്യം ഉപയോക്താക്കള്‍ ശ്രദ്ധിക്കുക. വിസ, മാസ്റ്റർകാർഡ് ക്രെഡിറ്റ് കാര്‍ഡുകള്‍ യു.പി.ഐ യുമായി ലിങ്ക് ചെയ്യാൻ സാധിക്കില്ല.

പണം ഉടൻ കൈമാറ്റം ചെയ്യാം.

യു.പി.ഐ പേയ്‌മെൻ്റുകൾ നടത്തുന്നതിന് അധിക ഫീസുകളൊന്നുമില്ല.

എല്ലാ ഇടപാടുകൾക്കും ക്രെഡിറ്റ് കാർഡ് അക്കൗണ്ട് വിശദാംശങ്ങൾ നല്‍കേണ്ട ആവശ്യമില്ല.

ക്രെഡിറ്റ് കാർഡ് വഴി കോൺടാക്റ്റ്‌ലെസ് പേയ്‌മെൻ്റുകൾ നടത്താനുള്ള മറ്റൊരു മാർഗമാണ് യുപിഐ.

എളുപ്പത്തില്‍ പേയ്‌മെൻ്റുകൾ നടത്താനുള്ള സൗകര്യം യു.പി.ഐ മൂലം ലഭിക്കുന്നു. അതേസമയം ഉപയോക്താക്കൾ കാര്‍ഡിന്റെ ക്രെഡിറ്റ് പരിധിക്കപ്പുറം കാർഡ് ഉപയോഗിക്കാതിരിക്കാന്‍ പ്രത്യേകം ശ്രദ്ധിക്കുക.

ക്രെഡിറ്റ് കാർഡ് പേയ്‌മെൻ്റുകൾ നടത്താൻ എൻ.പി.സി.ഐ അംഗീകരിച്ച യു.പി.ഐ ആപ്പുകൾ മാത്രം ഉപയോഗിക്കുക. ആന്‍ഡ്രോയിഡ്, ഐ.ഒ.എസ് ഫോണുകളുടെ ഔദ്യോഗിക ആപ്പ് സ്റ്റോറുകളിൽ നിന്നാണ് ആപ്പുകൾ ഇൻസ്റ്റാൾ ചെയ്യേണ്ടത്.

വ്യക്തിഗത വിവരങ്ങൾ പരിരക്ഷിക്കുന്നതിനും സാമ്പത്തിക തട്ടിപ്പ് ഒഴിവാക്കുന്നതിനും സുരക്ഷിതമായ ഇടപാടുകൾ ഉറപ്പാക്കുന്നതിനും യു.പി.ഐ ഉപയോക്താക്കൾ ശക്തമായ പിൻ ആണ് കണ്ടെത്തേണ്ടത്.